2 Cronica 32:4 - Manobo Western Bukidnon OT

⁴ Umbe, midtiǥum dan is mahabet he menge etew ne midtembuan dan is tudeey te menge wahig pehendiyà te menge tanà he ebpuun diyà te menge serebseb. Su ke sikandan te, “Emun ebpekeume en kayi is menge hadì te Asiria, ne wazè dan en egkekuwaan te wahig.”

2 Cronica 32:4 ပူးပေါင်းရင်းမြစ်များ

1 Hadì 19:21

Midlikù si Elisha, su migkuwa zin is menge vaka zin ne mibpenlapè din. Ne iyan intavun din te kedhilutua zutun te menge vaka is menge himan din te ked-eradu. Ne hein nelutù en haazà, mibeǥayan din sikan is menge zuma zin te ed-eradu ne migkaan sikandan is langun. Ne zutun mibpekidume en sikandin ki Elias su ed-uǥup kandin.

1 Hadì 3:9

Umbe, beǥayi a te ketau te kedumala kayi te menge etew nu wey te kedsavut ke hengkey is meupiya wey ke hengkey is mezaat. Su iyan dà heeyan ibpekehimu ku te kedumala kayi te menge etew nu he utew mahabet.”

2 Hadì 18:13

Hein ike-14 he tuig te kedhadì ni Hezekia ziyà te Juda, midsurung ni Hadì Senakerib he hadì te Asiria is langun he vinerengbeng he menge inged diyà te Juda, ne naaǥew zin heini.

2 Hadì 18:9

Hein ikeepat he tuig te kedhadì ni Hezekia, he iyan ikepitu he tuig te kedhadì ni Hoshea ziyà te Israel, midsurung ni Hadì Salmanaser he hadì te Asiria is Samaria ne medliǥuyan dan heini.

2 Hadì 19:17

Tutuu, Nengazen, he mibpendezeetan te menge hadì diyà te Asiria is mahabet he menge nasyun

2 Hadì 20:20

Is duma pa he ǥuǥud mehitenged te kedhadì ni Hezekia, wey is langun he nevantug he menge vaal zin wey is kebaal zin te peneng wey ebpetudaan dutun pehendiyà te inged, ne ingkesurat diyà te Libru he Midsuratan te menge Keguǥuza te menge Hadì te Juda.

2 Cronica 30:14

Mibpen-awè dan is menge pemuhatà diyà te Jerusalem he para ebpemuhatan te zuma he menge ed-ezapen, ragkes is menge pemuhatà he tutungà te veyewà, ne pudu zan heini intimbag diyà te zal-ug he Kidron.

2 Cronica 32:1

Hein nepasad ni Hezekia is buluhaten din duma is kebmetinumanen din, midsurung ni Hadì Senakerib he hadì te Asiria is Juda. Duma sikandin te menge sundaru zin ne midliǥuyan dan is binerengbeng he menge inged, su neisip din he egkezaag din heini para te keugelingen din.

2 Cronica 32:3

Mibpekidlalag sikandin te menge upisyal zin wey te menge pengulu te menge sundaru zin. Ne iyan nepesazan dan is ibpeengked dan is kedtudà te menge wahig diyà te gawas te Jerusalem.

2 Cronica 32:30

Si Hezekia is midsuǥù te kedtambun te lepawà te wahig he ziyà te zivavew he vahin te serebseb diyà te Gihon ne ziyà heini ipetudà te zapit te edsenlepan dutun te Inged ni David. Midlampus si Hezekia te langun he mibeelan din.

Isaias 10:8

Ebpahambug sikandin he egkaǥi te, “Is menge peremandar te menge sundaru ku ne henduen be te menge hadì.

Isaias 22:11

Mibaal kew te punduwà te wahig diyà te mid-elangan te zezuwa he verengbeng, su para egketiǥum dutun is wahig he ebpuun diyà te zaan he peneng. Iyan, wazà kew medsarig wey medseǥipà te Megbevayà he iyan mibpelanu kayi, wey iyan mibayàbayà te kegkehitevùa kayi.

Isaias 22:9

Mid-ehè niw is menge verengbeng te Inged ni David su wey niw metueni ke hendei is nengeǥevà kayi. Midtiǥum kew te wahig he ebpuun diyà te peneng he ziyà te alug.

Nahum 3:14

Sigi, pengendami niw is kebpekeuma te menge kuntada niw. Sekezu kew su wey niw zuen meinum. Lig-eni niw pa is menge verengbeng he nekeliǥuy te inged niw; baal kew te menge brik ne purungi niw heini he menge verengbeng.