1 Samuel 8:3 - Manobo Western Bukidnon OT

³ Piru wazè dan sunuza is ulaula te amey zan. Edhuna ziyà te gehinawa zan is selapì, edawat dan te sipsip, wey edtuisen dan is hustu he kukuman.

1 Samuel 8:3 ပူးပေါင်းရင်းမြစ်များ

2 Samuel 15:4

Emun pezem iyan e zà ebpekehusey, ne ebpekeuvey is langun he zuen idsumbung etawa insumbung, ne wazà duwazuwa he ebeǥayan ku te hustu he kedhusey.”

Salmo 15:5

Kenè din ibpaanak is selapì he ibpeutang din, wey kenà sikandin egkeuwit te suhul emun ibpetistiǥus sikandin su wey mehukumi te silut is kenà dait he edsilutan.” Is etew he iyan heeyan ulaula zin, ne egkehimu sikandin he layun melig-en ne kenà sikandin egkewaleng te minsan keenu.

Salmo 26:10

Heini sikandan, layun ebevaal te mezaat ne ebpenepian dan is duma.

Exodus 18:21

Iyan, pilì ka te metau he menge etew he ebpekeuǥup kenikew te kebpenhusey nu. Kinahanglan he metau sikandan he edhusey, edtahud te Megbevayà, egkeseriǥan, ne kenà edawat te sipsip. Himuwa sikandan he menge zatù te menge grupu te menge etew he tig-1,000, tig-100, tig-50 wey tig-10.

Exodus 23:6

“Kenè niw limbungi ziyà te hukmanan is egkaayuayu.

Exodus 23:8

“Kenè kew medawat te sipsip, su is sipsip iyan ebpekepelakap te etew su minsan netuenan din en is tutuu, edtuisen din gihapun is menge lalag te metazeng he etew.

Megwewali 2:19

Ne wazà ku en metueni ke metau ve wey ke tulebung is ebpekepangevilin. Piru iyan dan en ebpekevayàbayà te minsan hengkey he egkekuwa ku pinaaǥi te ketau ku wey kedhaǥù ku. Wazè kayi pulus.

Isaias 1:23

Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.

Isaias 33:15

Is ebpekeubpà dutun, iyan is etew he nengungubpaan he metazeng wey tutuu is menge lalag din, ne wazà mebpenapì, wey wazà medawat te sipsip. Wazà sikandin mebpekiduma te mibpelanu te kebpemenhimatey wey te kebaal te zuma pa he mezaat he menge vaal.

Micas 3:11

Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te Nengazen, su egkaǥi kew te, ‘Zuma zey is Nengazen. Umbe wazà mezaat he egkehitavù kenami.’

Deuteronomio 16:19

Kenè dan bulegkua is hustu he kukuman ne emun edhukum sikandan kinahanglan he wazè dan edlevanan. Kenè dan medawat te suhul su is suhul ebpekepelakap te uluwanen wey metazeng, wey ebpekeipiktu te kedhukum dan.

1 Samuel 12:2

Guntaan duen niw en hadì he ebpengulu keniyu. Siak, nehimu a he pengulu niw puun pa te betan-en e pa taman guntaan piru meǥurang ad su uvanen e en, ne guntaan, duma niw en daan is menge anak ku he maama.

1 Samuel 2:35

Ne ebpilì a te metazeng wey metinumanen he memumuhat he edsunud te egkesuatan ku. Ne ebeǥayan ku sikandin te menge kevuwazan he ebpenilbi te mibpilì ku he hadì taman te taman.