1 Samuel 17:36 - Manobo Western Bukidnon OT

³⁶ Neveelan ku en heini ziyà te erimaung wey ziyà te bir, ne ebeelan ku zaan heini keniyan te Filistihanen he wazà medtuu te Megbevayà, tenged te edhinggaten din is menge sundaru te uuyag he Megbevayà.

1 Samuel 17:36 ပူးပေါင်းရင်းမြစ်များ

2 Cronica 32:17

Mibpeuwit pa si Hadì Senakerib te menge surat he ed-insultu te Nengazen he Megbevayà te Israel. Iyan heini insurat din: “Is menge ed-ezapen diyà te zuma he menge nasyun ne wazè dan melibri is menge etew zan puun te ǥehem ku. Umbe is megbevayà he ed-ezapen ni Hezekia ne kenà daan ebpekelibri te menge etew zin puun te menge gehem ku.”

Isaias 10:15

Lavew ve is wasey etawa gavas te migamit duen? Iyan be egkevitbit te lagkut is migawed duen?

Isaias 36:15

Kenè kew petuntu kandin mehitenged te kedsarig te Nengazen, emun egkaǥi sikandin te, ‘Siguradu he edlibriyen kiw te Nengazen; heini is inged tew, kenè din ibeǥey ziyà te hadì te Asiria.’

Isaias 36:18

Kenè kew pelimbung ki Hezekia emun egkaǥi sikandin te edlibriyen kew te Nengazen. Duen be menge ed-ezapen diyà te minsan hendei he menge nasyun he nekelibri te menge meǥinged duen para kenà sikandan mezaag te hadì te Asiria?

Ezekiel 28:10

Iyan edhimatey kenikew is ebpuun diyà te sengelulugar en. Iring is kemetayen nu te kemetayen te etew he wazà medtuu kediey. Egkeula-ula iyan heini, su iyan a, is Nengazen he MEGBEVAYÀ, is migkaǥi kayi.”

Ezekiel 32:19

Keǥiyi nu sikandan te, ‘Edlavew kew ve te zuma? Idtimbag kew zaan diyà te zizalem duma te menge wazà medtuu te Megbevayà

Daniel 5:23

mid-isip nu he lavew ka te Nengazen diyà te langit. Impekuwa nu is menge inumà he puun diyà te valey te Megbevayà ne mid-inuman nu heini zuma te menge meǥeliyug nu he memetikang is ked-etew, menge esawa nu he lavew, wey is menge esawa nu he kenè lavew. Ne liyu keniyan, mid-azap nu is menge ledawan he ed-ezapen he pelata, bulawan, brunsi, putew, kayu, wey vatu–menge ed-ezapen he kenà ebpekaahà, kenà ebpekezineg, wey kenà ebpekesavut. Piru wazè nu mulà deliǥa is Megbevayà he iyan migawed te untung nu wey iyan ebayàbayà ke hengkey is egketemanan nu.

Zacarias 12:3

Dutun he andew edhimuwen ku is Jerusalem he iring te meveǥat he vatu. Ne is minsan hengkey he nasyun he ebitbit kayi ne egkesazir. Is langun he menge nasyun kayi te kelibutan edsevaha te kedsurung diyà te Jerusalem.

Zacarias 2:8

Hein nepasad is kegkaahaa ku zuen te menge nelewasan ku, midsugù a te Nengazen he megkaǥi a te ebpekesuǥat diyà te menge nasyun he nenurung keniyu wey nenguwa te menge azen niw. Su is minsan hentei he ebpesipala keniyu, ebpesipelahan din is utew mahal te Nengazen. Ne iyan heini kes migkaǥi te Nengazen he Mekeǥeǥehem he ebpekesuǥat diyà te menge nasyun:

1 Samuel 14:6

Migkeǥiyan ni Jonatan kes tig-uwit te ǥumaan din te, “Hengkayi ke en, ebeyaan ta is kampu te menge etew he wazà mekekilala te Megbevayà. Kela ke edtevangan ki te Nengazen, su wazà ebpekevelavag kandin emun edhimuwen din he mekezaag is etew, mezakel man wey ke deisey.”

1 Samuel 17:10

Guntaan, edhinggaten ku sikiyu! Ipehendini niw is egkeseriǥan niw he ebpekidtebek kedì.”

1 Samuel 17:26

Mid-insaan ni David is menge etew he nemenhitindeg diyà te uvey zin, “Hentei ves heeyan is Filistihanen he wazà mekekilala te Megbevayà? Maan is ebpemenhinggat te menge sundaru te uuyag he Megbevayà? Ne hengkey is egkezawat te etew he ebpekepatey kandin wey meengked is kebpeel-elezi zin te Israel?”

1 Samuel 17:35

edel-asen ku heini ne edlegkuten ku, ne egkuwaan ku haazà is kerehidu. Ne emun edsukul kedì edekepen ku ne egewezan ku ziyà te lieg ne ebpenlegkuten ku taman te ebpatey.

1 Samuel 17:37

Is Nengazen he midluwas kedì dutun te erimaung wey bir edluwas daan kedì kayi te gehem te Filistihanen.” Migkeǥiyan ni Saul si David te, “Uya, hipanew kad, berakat he iyan is Nengazen eduma kenikew.”

1 Samuel 18:17

Ne zutun migkeǥiyan ni Saul si David te, “Andam ad he ibpeesawa ku kenikew is kinekekayan he anak ku he si Merab asal ibpeehè nu kedì is kevurut nu te kebpekidtebek para te Nengazen.” Diyà te isip ni Saul he te heini he paaǥi ne kenè en iyan sikandin ebpekepatey ki David ke kenà menge Filistihanen is ebpekepatey kandin.

1 Samuel 31:4

Migkeǥiyan ni Saul is tig-uwit te ǥumaan din te, “Hulevuta nu heeyan is ispada nu wey a himatayi, su emun kenà, ne iyan is wazà mekekilala te Megbevayà edhimatey kedì, ne ed-un-undahan e zan.” Piru nahandek haazà is tig-uwit te ǥumaan din he edhimatey kandin, ne zutun migkuwa ni Saul kes ispada zin, ne midsundang din is lawa zin.