1 Samuel 17:26 - Manobo Western Bukidnon OT

²⁶ Mid-insaan ni David is menge etew he nemenhitindeg diyà te uvey zin, “Hentei ves heeyan is Filistihanen he wazà mekekilala te Megbevayà? Maan is ebpemenhinggat te menge sundaru te uuyag he Megbevayà? Ne hengkey is egkezawat te etew he ebpekepatey kandin wey meengked is kebpeel-elezi zin te Israel?”

1 Samuel 17:26 ပူးပေါင်းရင်းမြစ်များ

2 Hadì 19:4

Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.’ ”

2 Cronica 32:17

Mibpeuwit pa si Hadì Senakerib te menge surat he ed-insultu te Nengazen he Megbevayà te Israel. Iyan heini insurat din: “Is menge ed-ezapen diyà te zuma he menge nasyun ne wazè dan melibri is menge etew zan puun te ǥehem ku. Umbe is megbevayà he ed-ezapen ni Hezekia ne kenà daan ebpekelibri te menge etew zin puun te menge gehem ku.”

Nehemias 5:9

Ne impelaus ku is lalag ku, “Kenà meupiya is baal niw. Ereg pezem he egkezumahan te kegkahandek te Megbevayà is kebpengungubpaan niw su para kenè kiw sudia te menge etew ziyà te zuma he menge nasyun he menge kuntada tew.

Salmo 44:13

Kenikew he ketau is kegkepeel-elezi kenami wey ked-eengiti kenami te siringan dey he menge nasyun.

Salmo 74:18

Tentenuzi nu, Nengazen, is kebpeel-elezi wey kedsudia kenikew te menge tulebung he menge kuntada.

Salmo 79:12

Nengazen, kepipitu nu tekepa is penimales nu te uvey zey he menge nasyun te kebpeel-elezi zan kenikew.

Isaias 37:23

Hentei is mid-insultuwan nu wey edwelwelien? Hentei is midhenggeran nu wey mibpehembuǥan? Kenè be iyan a is Waǥas he Megbevayà te Israel?

Jeremias 10:10

Piru iyan is Nengazen tutuu he Megbevayà. Iyan sikandin uuyag he Megbevayà ne Hadì sikandin te wazà pidtemanan. Emun egkepauk sikandin, egkehuyung is kelibutan ne ed-eles is diyà te menge nasyun.

Jeremias 9:25

Migkaǥi pa is Nengazen te, “Egkeuma is timpu he edsilutan ku is langun he nesirkunsidar he wazà mahalin is ulaula zan:

Jeremias 9:26

is menge tig-Ehipto, tig-Juda, tig-Edom, tig-Amon, tig-Moab wey is langun he ebpemen-ubpà diyà te sibsivayan he mibpen-elutan is dapit te kendingen dan. Iyan tutuu is, heini is langun he meǥinged diyà te menge nasyun, ragkes en is langun he menge etew ziyà te Israel, henduen be te neked-iring dà he wazà menge sirkunsidar su meremerik is netaǥù diyà te gehinawa zan.”

Ezekiel 28:10

Iyan edhimatey kenikew is ebpuun diyà te sengelulugar en. Iring is kemetayen nu te kemetayen te etew he wazà medtuu kediey. Egkeula-ula iyan heini, su iyan a, is Nengazen he MEGBEVAYÀ, is migkaǥi kayi.”

Daniel 5:23

mid-isip nu he lavew ka te Nengazen diyà te langit. Impekuwa nu is menge inumà he puun diyà te valey te Megbevayà ne mid-inuman nu heini zuma te menge meǥeliyug nu he memetikang is ked-etew, menge esawa nu he lavew, wey is menge esawa nu he kenè lavew. Ne liyu keniyan, mid-azap nu is menge ledawan he ed-ezapen he pelata, bulawan, brunsi, putew, kayu, wey vatu–menge ed-ezapen he kenà ebpekaahà, kenà ebpekezineg, wey kenà ebpekesavut. Piru wazè nu mulà deliǥa is Megbevayà he iyan migawed te untung nu wey iyan ebayàbayà ke hengkey is egketemanan nu.

Daniel 6:27

Edlibri sikandin wey ebaal te menge singyal wey menge egkein-inuwan he menge vaal ziyà te langit wey kayi te tanà. Midlibri zin si Daniel te kegkaid te menge erimaung.”

Daniel 9:16

Umbe, Nengazen, tenged dà te kenikew he keupiya, edhangyù a ziyà te kenikew he iawè nu en is pauk nu te menge meǥinged diyà te Jerusalem te inged nu he segradu he vuvungan. Tenged te menge salè dey wey menge salà te menge kepuun dey, mibpeel-elezan key wey is menge tig-Jerusalem te menge etew he nekeelingkus kenami.

Joel 2:19

Ne midtavak din is ampù dan he ke sikandin diyà te kandan te, “Ebeǥayan ku sikiyu te menge trigu, beǥu he vinu, wey lana; ne egkeperahan kew. Ne kenè ku en idtuǥut he peel-elezi kew te menge etew ziyà te zuma he menge nasyun.

Deuteronomio 5:26

Duen be etew he egkeuyag minsan nezineg din is laǥeng te uuyag he Megbevayà he ebpuun te hapuy iring te nezineg tew?

Josue 3:10

Guntaan egketuenan niw he mibpekiduma keniyu is uuyag he Megbevayà, su emun edsurung kew en ne iyan sikandin edsegseg te menge Canaanhen, menge Hitihanen, menge Hivihanen, menge Pirisihanen, menge Girgasihanen, menge Amorihanen, wey menge Jebusihanen.

1 Samuel 11:2

Midtavak si Nahash te, “Egkehimu he ebaal a te kesebutan tew asal iyan egkesuatan ku is edluǥiten ku is kewanan he mata te kada sevaha keniyu wey mepeel-elezi is tivuuk he Israel.”

1 Samuel 14:6

Migkeǥiyan ni Jonatan kes tig-uwit te ǥumaan din te, “Hengkayi ke en, ebeyaan ta is kampu te menge etew he wazà mekekilala te Megbevayà. Kela ke edtevangan ki te Nengazen, su wazà ebpekevelavag kandin emun edhimuwen din he mekezaag is etew, mezakel man wey ke deisey.”

1 Samuel 17:10

Guntaan, edhinggaten ku sikiyu! Ipehendini niw is egkeseriǥan niw he ebpekidtebek kedì.”

1 Samuel 17:30

Ne midhendiyà si David te zuma is ebpenginginsà te iyan ded kes impenginginsè din, ne iyan tavak te menge etew kes intavak ded kandin.

1 Samuel 17:36

Neveelan ku en heini ziyà te erimaung wey ziyà te bir, ne ebeelan ku zaan heini keniyan te Filistihanen he wazà medtuu te Megbevayà, tenged te edhinggaten din is menge sundaru te uuyag he Megbevayà.

1 Samuel 31:4

Migkeǥiyan ni Saul is tig-uwit te ǥumaan din te, “Hulevuta nu heeyan is ispada nu wey a himatayi, su emun kenà, ne iyan is wazà mekekilala te Megbevayà edhimatey kedì, ne ed-un-undahan e zan.” Piru nahandek haazà is tig-uwit te ǥumaan din he edhimatey kandin, ne zutun migkuwa ni Saul kes ispada zin, ne midsundang din is lawa zin.