1 Cronica 3:1 - Manobo Western Bukidnon OT

¹ Iyan heini menge anak ni David he neetew ziyà te Hebron: Is kinekekayan iyan si Amnon he anak din diyà te ki Ahinoam he tig-Jezreel. Is ikezuwa iyan si Daniel he anak din diyà te ki Abigail he tig-Carmel.

1 Cronica 3:1 ပူးပေါင်းရင်းမြစ်များ

2 Samuel 13:1

Duen utew mekempet he anak he raǥa ni David he egngezanan ki Tamar, he suled ni Absalom. Si Amnon ne suled ni Tamar ziyà te amey, ne mibmahal ni Amnon si Tamar.

2 Samuel 13:29

Ne zutun midhimetayan te menge sakup ni Absalom si Amnon su insuǥù din. Ne nen-untud is duma he menge anak he maama ni David te menge kudè dan ne nemelaǥuy zan.

2 Samuel 3:1

Iyan haazà puunà te meluǥayad he tebek te edapig ki Saul wey te edapig ki David. Ed-iseg ebmelig-en is grupu ni David ne ebmeluya mulà is grupu ni Saul.

2 Samuel 5:13

Hein midhalin si David diyà te Jerusalem is ebpuun diyà te Hebron, mahabet pa is mid-esawa zin; is duma he mid-esawa zin ne kenà lavew is ked-etew, ne neumanan is menge anak din.

1 Cronica 2:55

wey menge pemilya te utew memetau he edsurat te menge dukumintu he ziyà ed-ubpà te inged he Jabez he iyan is menge Tiratnen, menge Simiyatnen, wey menge Sucatnen. Iyan heini sikandan menge Kinhanen he ebpuun ki Hammat, he iyan midtukud te Bet Recab.

1 Cronica 28:5

Mibeǥayan e zin te mezakel he menge anak he menge maama, ne ebpuun dutun te kandan mibpilì din si Solomon he edhadì te ginhedian din he iyan is Israel.

1 Cronica 3:2

Is iketelu iyan si Absalom ne iyan iney zin si Maaca he anak ni Hadì Talmai he hadì te Geshur. Is ikeepat iyan si Adonia ne iyan iney zin si Hagit.

Josue 15:56

Jezreel, Jokdeam, Zanoa,

1 Samuel 27:3

Diyè dan med-ubpà te Gat duma ki Akish. Miduma zan en diyà is pemilya zan. Miduma zaan ni David is dezuwa he esawa zin he si Ahinoam he tig-Jezreel wey si Abigail he tig-Carmel he iyan esawa zengan ni Nabal.