Santiago 5:7 - Manobo Western Bukidnon

⁷ Ne sikiyu is menge zuma ku he tumutuu, kinahanglan he meinentusen kew taman te kedlikù te Nengazen. Su is ebasuk, ebpekeantus te kedtag̵ad din taman te edsebpet en is impemula zin diyà te tanè din. Edteg̵azan din is uzan he ebpetuvù te pinemula zin wey is ebpeketesan te pinemula zin.

Santiago 5:7 ပူးပေါင်းရင်းမြစ်များ

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 16:28

Kenè niw heini lipati he zuen menge zuma tew kayi he kenà ebpatey taman te egkeehè e zan is Kakey te Menusiyà he ebpekeuma su edhadì.”

Mateo 24:27

Su siak is Kakey te Menusiyà, iring is kedlikù ku te kilat he idtik-ew ibmerayag te tivuuk he langit puun te edsilaan pehendiyà te edsenlepan. Egkeahà heini te langun.

Mateo 24:44

Iring din ded daan, layun kew andam su ebpekeuma a is Kakey te Menusiyà te uras he kenà a keniyu ebperetengen.

Lucas 18:8

Egkeg̵iyen ku keniyu he utew meg̵aan is kedtevangi zin keniyu. Kenà ebungasen is Megbevayà he edtavang keniyu. Iyan, keuzemà emun edlikù a is Kakey te Menusiyà dini te kelibutan mezelag dà is etew zutun he neketuu kedì.”

Lucas 21:27

Ne zutun, siak is Kakey te Menusiyà, egkeahà a ziyà te menge g̵apun is ebpekeuma he utew zekelà is gehem ku wey utew merayag is ked-anlag ku.

Lucas 8:15

Ne haazà is benì he ziyà mengeulug te meupiya he tanà, ne iyan egkeg̵iyen dutun is Lalag te Megbevayà he nezineg te menge etew ne midawat dan, ne midtuman dan haazà, ne mibpeniguduwan dan te edtuman taman te mibpulus te zekelà is Lalag te Megbevayà diyà te kandan.”

Juan 21:22

Ne midtavak si Jesus te, “Emun iyan ku egkesuatan he kemulu pa sikandin uuyag keuzemà dutun te kedlikù ku zini te kelibutan, wazè nu kelavet. Sunud ke zà kediey.”

Juan 21:23

Ne ziyà te langun he menge tumutuu nekeeneb is tudtul he kenà ebpatey haazà he sumusundan, iyan, wazà iyan keg̵iya ni Jesus kandin he kenè en ebpatey haazà he tumutuu su iyan migkag̵i zin is, “Emun iyan ku egkesuatan he uuyag pa keuzemà dutun te kedlikù ku, wazè nu kelavet.”

Ruma 15:4

Su is minsan hengkey he insurat dengan he Lalag te Megbevayà, ne umba impesurat din su wey kiw mepenurù. Su pinaag̵i te Lalag te Megbevayà ibpenurù kenitew is kebmeinentusen te kemereg̵enan wey edsembag̵an kiw su wey kenà maawà is kebpeebuta tew te meupiya he egkeulaula keuzemà.

Ruma 2:7

Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

1 Kurintu 1:7

Ne tenged kayi imbeg̵ey en daan keniyu te Wag̵as he Mulin-ulin is minsan hengkey he ketau he egkinehenglanen niw kayi te kedtag̵ad niw te ked-uman kebulus te Nengazen tew he si Jesu Kristu.

Gelasya 5:5

Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà.

Gelasya 6:9

Umba kenè ki ebpepepeg̵ul te ked-ulaula te meupiya su emun ebpeniguduwan ta heini, egkeuma is timpu keuzemà he zuen idsuhul kenita te Megbevayà he utew meupiya.

Kulusas 1:11

Ne ibeg̵ey zin keniyu is dekelà he g̵ehem he ebpuun te zekelà he g̵ehem din, ne tenged kayi te g̵ehem layun niw egkeantus is kemereg̵enan he zekelà is kelipey niw.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

1 Tiselunika 2:19

Umba egkesuatan ku he ed-uman a ebpenumbaley ziyan su tenged keniyu utew meheg̵et is kebperetenga zey te kedlikù ni Jesus su iyan kew igkelipey zey. Tenged keniyu kenè key egkeeled keuzemà, kekenà, igkezantal zey is kedtuu niw emun ed-etuvang kiw ki Jesus dutun te kedlikù din.

1 Tiselunika 3:13

Berekati zin daan he mebmelig-en kew te kedtuu niw su wey wazà igkesewayi keniyu te menge g̵aked te Megbevayà emun diyè kew ed-etuvang te Amey tew he Megbevayà dutun te kebpekeuma te Nengazen tew he si Jesus he edumahan te langun he tumutuu kandin.

Hibriyuhanen 6:15

Ne si Abraham, utew sikandin meinentusen he edsarig te Megbevayà taman te netuman te Megbevayà is penaad din kandin.

Santiago 4:11

Menge suled, kenè kew mebpesudsudiey wey mebpesewsewayà su is edsudì wey edsawey te zuma zin he tumutuu, ne iring te edsudien din wey edsewayen din is lavew he sug̵ù. Ne emun edsewayen ta haazà is sug̵ù, kenè ta edtumanen, kekenà, edsumpeliten ta.

Santiago 5:10

Menge suled, ed-iringan ta is kebmeinentusen te menge ebpeneuven dengan te Megbevayà su zutun te kebpesevuta zan te Lalag te Nengazen nekeantus dan te kemeresayan.

Santiago 5:3

Midtangis is menge selapì niw wey vulawan su wazè niw g̵emita he idtavang. Ne is tangis, iyan tuus te keleleg̵ed niw ne tenged dutun utew mepait is silut keniyu keuzemà te andew te kedlimasa te menusiyà; su midtipig̵an niw is dekelà he kewasa kayi te menge ketepusan he andew.

2 Pedro 3:4

“Hendei vuwa si Kristu su impenaad din dengan he edlikù dini te kelibutan, iyan, kenè key ebpeketuu te iring dutun su puun pa te timpu zengan te kebpatey te menge tipehuna he kepuun tew taman en guntaan, wazà mahalin is minsan hengkey; iyan ded gihapun genat dà te kedtukuza te kelibutan taman en guntaan.”