Parahulit 2:24 - Marahay na Bareta Biblia

²⁴ Mayo nin marahay para sa sarong tawo kundi an magkakan asin mag-inom patin mag-ogma sa saiyang pinagalan. Alagad nahiling ko na maski ini gikan man sa kamot nin Dios;

Parahulit 2:24 ပူးပေါင်းရင်းမြစ်များ

1 Mga Hade 4:20

An mga tawo sa Juda asin sa Israel siring kadakul kan baybay sa dagat; nagkarakan sinda saka nag-irinom asin mga maogma sinda.

Nehemias 8:10

Magpuli na kamo asin magbangkete. Hirasan nindo nin kakanon saka inomon an mga mayo kaiyan. An aldaw na ini banal para sa satong Kagurangnan, kaya dai kamo magmondo. An kaogmahan na itinao saindo nin Kagurangnan magigin kakosogan nindo.”

Parahulit 2:10

Nakamtan ko an anoman na minawot ko. Dai ko isinayuma sa sadiri ko an anoman na kaogmahan. Ipinag-orgulyo ko an gabos na ginibo ko, asin ini an premyo kan gabos kong ginibo.

Parahulit 2:25

huli ta kun siblag saiya, siisay an pwedeng magkakan o mag-ogma?

Parahulit 2:3

Sa maigot kong pagmawot na makamtan an kadonongan, nag-isip akong paogmahon an sakong hawak sa paagi nin arak asin nin kalolongan. Nagsaboot ako na tibaad iyo ini an pinakamarahay na paagi sa paggamit nin tawo kan halipot niyang buhay sa daga.

Parahulit 3:22

Kaya nahiling ko na mayo nin marahay para sa tawo kundi an mag-ogma sa saiyang trabaho, huli ta iyan an saiyang palad. Mayo kita nin paagi tanganing maaraman ta an mangyayari pakatapos na kita magadan.

Parahulit 5:17

An bilog niyang aldaw ipinapamuhay niya sa kadikloman, sa kamondoan, sa kahandalan, sa kaanggotan, asin sa kahelangan.

Parahulit 6:12

Siisay an nakakaaram kun ano an marahay para sa tawo digdi sa halipot saka mayo nin halagang buhay—sarong buhay na minaagi sana siring sa sarong anino? Siisay an makakasabi kun ano an mangyayari sa kinaban pagkatapos na magadan siya?

Parahulit 6:2

an sarong tawo tinatawan nin Dios nin yaman, rogaring, kaomawan, saka gabos niyang kamawotan; alagad dai niya tinatawan nin kapangyarihan na gamiton iyan sa kaogmahan. An sarong dayuhan logod an igwa kan kapangyarihan na iyan. Ini mayo man nin halaga; sarong dakulang karaotan.

Parahulit 8:15

Kaya napatotoohan ko sa sadiri ko na an tawo dapat na maghanap nin kaogmahan, huli ta an marahay saiya sa buhay na ini iyo an pagkakan saka pag-inom asin pagpaogma sa sadiri. Ini magigibo niya mantang nagpapagal siya sa buhay na itinao saiya nin Dios sa kinaban na ini.

Isaias 56:12

‘Madya, magkua kita nin arak’, an sabi ninda, ‘asin mag-inom kita sagkod na kaya ta! An sunod na aldaw magigin mas maogma ki sa ngunyan.’”

Malakias 2:2

Kaipuhan na omawon nindo ako sa paagi kan saindong ginigibo. Kun dai kamo magdangog sa sakong sinasabi, dadarahan ko kamo nin maldisyon. Mamaldisyonon ko man an mga biyaya na inaako nindo. Sa katunayan, minaldisyon ko na an mga iyan, huli ta dai nindo pinahalagahan an sakong pagboot.

Mga Gibo 14:17

Alagad danay siyang nagpapahiling nin mga patotoo tanganing mamidbidan nindo siya sa paagi kan mga karahayan na ginigibo niya: pinapadarhan niya kamo nin uran, tinatawan nin marahay na ani sa tamang panahon saka tinatawan pa niya kamo nin kakanon asin pinapano nin kaogmahan an saindong puso.”

1 Corinto 15:32

Ano an papakinabangon ko kun nakipaglaban man ako sa maisog na kaiwal digdi sa Efeso para sana sa mga katuyohan na sa tawo? Kun dai binubuhay liwat an gadan, mas marahay pang, “Magkakan kita saka mag-inom, ta sa aga magagadan kita.”

Deuteronomio 12:12

Mag-ogma kamo sa atubang niya, kaiba an saindong mga aki, mga oripon sagkod an mga Levita na nag-eerok sa saindong mga banwaan; giromdomon nindo na an mga Levita mayo nin sadiring daga.

Deuteronomio 12:18

Alagad kakakanon nindo iyan asin kan saindong mga aki, kaiba an saindong mga oripon saka an mga Levita na nag-eerok sa saindong mga banwaan, duman nanggad sana sa atubang nin Kagurangnan na saindong Dios, sa lugar na saiyang pinili. Duman mag-oogma kamo, huli kan gabos na saindong naginibo.

1 Timoteo 6:17

Pagbotan mo an mga mayaman sa kinaban na ini na dai sinda magin mapaabaw-abaw; dai sinda magsarig sa mga bagay na dai malalaoman arog baga kan kayamanan, kundi magsarig sa Dios na matinao sato kan gabos na bagay para sa satong kaogmahan.