Oseas 2:8 - Marahay na Bareta Biblia

⁸ Dai niya nanggad aakoon na ako an nagtao saiya nin trigo, arak, lana nin oliba, asin kan gabos na plata saka bulawan na ginamit niya sa pagsamba ki Baal.

Oseas 2:8 ပူးပေါင်းရင်းမြစ်များ

1 Mga Cronica 29:16

O Kagurangnan, samuyang Dios, an gabos na kayamanan na ini, na samuyang tinipon para sa pagtugdok kan templo sa kaomawan nin saimong ngaran, gikan saimo asin sadiri mo.

An Libro ni Job 19:8

Sinerahan nin Dios an dalan, asin dai ako nakakaagi; tinahoban niya nin kadikloman an sakong agihan.

Isaias 1:3

Midbid kan baka an kagurangnan niya, asin aram kan asno an lugar na pinagbabahogan saiya, alagad an Israel dai nakakaaram; dai nakakasabot an sakong banwaan.”

Isaias 46:6

Binubukasan kan mga tawo an saindang mga supot dangan inuula an bulawan; minatimbang sinda nin plata sa mga timbangan. Minatandan sinda nin alahero tanganing maggibo nin sarong dios; dangan minaluhod sinda asin sinasamba iyan.

Jeremias 7:18

Nagkukua nin igatong an mga aki, nagmamakot nin kalayo an mga kalalakihan asin nagmamasa nin arina an kababaehan tanganing magluto nin mga tinapay para sa diosang inaapod nindang Reyna nin Langit. Inuula man ninda an mga dolot na inomon para sa ibang dios, tanganing kulogan an boot ko.

Ezekiel 23:41

Nagtukaw sinda sa magayon na mga sopa, dangan sa atubangan ninda, nagbugtak sinda nin lamesa na binugtakan nin insenso saka lana nin oliba na hale sako.

Daniel 3:1

Nagpagibo si Hadeng Nebukadnezzar nin sarong estatwang bulawan, na beynte y syete metros an langkaw asin maabot sa tolong metros an lakbang. Ipinabugtak niya ini sa kapatagan nin Dura sa probinsya nin Babilon.

Daniel 5:23

kundi ilinangkaw mo an saimong sadiri tumang sa Kagurangnan nin langit. Ipinakua mo an mga bulawan na kagamitan na sinamsam sa Templo tanganing pag-inoman mo, kan mga iginagalang na lalaki sa palasyo, kan saimong mga agom asin kan saimong mga kasaroan patin inomaw mo an mga dios na gibo sa bulawan, plata, bronse, lansang, kahoy, saka gapo—mga dios na dai nakakahiling o nakakadangog asin dai nakakaaram nin anoman. Dai mo ginalangan an Dios na nagkakapot kan saimong buhay asin nakakaaram kan gabos mong ginigibo.

Oseas 10:1

An Israel nakaagid sa balagon nin ubas na pano nin bunga. Kan magdakul an saiyang bunga, nagdakul man an pinatindog niyang mga altar. Kan mag-orog an bunga kan saiyang daga, orog man na naggayon an ginibo niyang sagradong mga hariging gapo na saiyang sinasamba.

Oseas 13:1

Kaidto, kun minataram an tribu ni Efraim, nagkakatarakot an ibang tribu nin Israel, huli ta an tribung ini ginagalangan sa Israel. Alagad nagkasala an mga tawo huli sa pagsamba ki Baal, asin huli kaini, magagadan sinda.

Oseas 13:2

Padagos sinda sa pagkasala huli sa paggibo nin mga metal na ladawan na pagsasambahon—mga dios-dios na plata, na minukna kan isip nin tawo, na ginibo kan mga kamot nin tawo. Dangan minasabi sinda, “Pagdolot kamo nin mga sakripisyo sa sainda!” Paanong nakakahadok an tawo sa mga dios-dios—mga dios-dios na pormang torong baka!

Oseas 4:11

Nagsasabi an Kagurangnan, “An arak, daan man o bago, iyo an naghahale kan pakasabot kan sakong banwaan!

Oseas 8:4

“Nagpili sinda nin mga hade, sa saindang sadiring kabotan. Nagbugtak sinda nin mga lider, alagad dai ko iyan aram. Sa paagi kan saindang plata saka bulawan, naggibo sinda nin mga dios-dios—para sa saindang kapahamakan.

Habakkuk 1:16

Kaya sinasamba ninda an saindang mga hikot saka dinodolotan nin mga sakripisyo, huli ta nagtatao iyan sa sainda kan pinakamarahay sa gabos na bagay.

Lukas 15:13

Pakalihis nin nagkapirang aldaw, ipinabakal kan ngohod an kahirasan niya dangan nagduman sa harayong lugar. Duman niya ginasto an kwarta sa maraot na pamumuhay.

Roma 1:28

Huli ta habo sindang magmidbid sa Dios, pinabayaan na niya sinda sa mga maaati nindang kaisipan, saka sa mga sala nindang gibo.

Deuteronomio 8:18

Giromdoma nindo na an Kagurangnan na saindong Dios iyo an nagtao saindo nin kakayahan tanganing magyaman kamo. Ginibo niya ini huli ta sagkod ngunyan maimbod siya sa tipan na sinumpaan niya sa saindong mga ginikanan.

Hukom 9:27

Nagduman sinda gabos sa saindang mga ubasan, nagguno nin ubas asin ginibo nindang arak dangan nagpyesta sinda. Nagduman sinda sa templo kan saindang dios-dios saen nagkarakan sinda asin nag-irinom, patin linibak ninda si Abimelec.