Mga Talinhaga 18:16 - Marahay na Bareta Biblia

¹⁶ Boot mong magdolok sa sarong halangkaw na tawo? Magdara ka nin regalo asin magigin pasil an pagdolok saiya.

Mga Talinhaga 18:16 ပူးပေါင်းရင်းမြစ်များ

Genesis 32:20

Sabihon nindong, ‘Kasunod mi na si Jacob na saimong oripon.’” Nagsaboot si Jacob, “Sa kadaklan kan regalo ko, mawawara na an saiyang kaanggotan sako. Kaya sa oras na masabat ko siya, papatawadon na niya ako.”

Genesis 33:10

Nagsimbag si Jacob, “Bakong siring kaiyan; kun talagang marahay na an boot mo sako, akoon mo an sakong regalo. Huli ta, kan mahiling ko an lalawogon mo, garo man sanang nahiling ko an lalawogon nin Dios, orog na ngunyan na inako mo ako sa marahay na boot.

Genesis 43:11

Nagsabi si Jacob sainda, “Kun siring an dapat na mangyari, giboha nindo ini: magdara kamo kan pinakamarahay na mga bunga kan daga bilang regalo sa gobernador: dikit na balsamo, dikit na dugos, mga pahamot asin mira, rekado saka almendras.

2 Mga Hade 5:5

Nagsabi an hade, “Magduman ka sa hade nin Israel asin darahon mo saiya an surat na ini.” Kaya nagduman si Naaman; igwa siya nin darang treynta mil na pedaso nin plata, seis mil na pedaso nin bulawan, asin sampolong magayon na gubing.

Mga Talinhaga 17:8

May mga tawo na naghohona na an pagsuhol garo pagsalamangka; nagtutubod sinda na magigibo kaini an gabos na bagay.

Mga Talinhaga 18:17

An enot na magtaram sa atubang kan korte hinohona na tama sagkod na dai pa siya hinahapot kan saiyang kalaban.

Mga Talinhaga 19:6

Kadakul an naghihingowa na makadolok sa haralangkaw na tawo; an lambang saro nagsasabing katood sinda kan mga tawong nagtatao nin karahayan.

Mga Talinhaga 21:14

Hilom na regalohan mo an anggot saimo asin mahahale an saiyang kaanggotan.

1 Samuel 16:20

Pinaduman ni Jesse ki Saul si David; pinapagdara niya ini nin sarong asno na may kargang tinapay, sarong laogan na anit na pano nin arak asin sarong ogbon na kanding.

1 Samuel 25:27

Ngunyan, akoa ining regalo na dinara ko saimo; tawan ini sa saimong mga tawohan.