Mga Talinhaga 17:3 - Marahay na Bareta Biblia

³ Binabalo sa kalayo an bulawan saka an plata, alagad an minabalo kan puso nin tawo iyo an Kagurangnan.

Mga Talinhaga 17:3 ပူးပေါင်းရင်းမြစ်များ

1 Mga Cronica 29:17

O Dios ko, aram kong binabalo mo an puso asin nawiwilihan mo an matanos. Sa malinig na puso, boluntad na idinodolot ko ini gabos, asin nahiling ko an saimong banwaan na maogma saka bulahos na nagdodolot saimo.

An Libro ni Job 23:10

Alagad aram niya an dalan na sakong linalakawan; kun baloon niya ako, makukua niya akong dalisay.

An Libro ni Job 28:1

“Sa katunayan igwa nin mina nin plata, asin nin lugar saen linilinigan an bulawan.

Salmo 139:23

Siyasata ako, O Dios, asin midbida an sakong puso; baloa ako asin midbida an mga kaisipan ko.

Salmo 26:2

Siyasaton mo ako, Kagurangnan, asin baloa; an sakuyang puso saka isip hilinga.

Salmo 66:10

Kami saimong binabalo, O Dios; siring na sa kalayo an plata binabalo, siring man an ginigibo mo samo.

Mga Talinhaga 15:11

An kinaban kan mga gadan bukas sa atubang nin Kagurangnan; gurano pa daw an puso kan mga tawo?

Mga Talinhaga 16:2

Naghohona an tawo na tama an gabos niyang ginigibo, alagad tinitimbang nin Kagurangnan an tunay niyang katuyohan.

Mga Talinhaga 17:2

An tusong sorogoon pwedeng masakop an mayong pakinabang na aki kan saiyang amo asin mahirasan kan pamana bilang saro sa magturugang.

Mga Talinhaga 21:2

An paghona kan tawo tama an gabos niyang gibo, alagad an Kagurangnan an naghuhukom kan nasa saiyang puso.

Mga Talinhaga 27:21

An bulawan saka an plata binabalo sa kalayo; an tawo hinuhukoman huli kan saiyang dangog.

Isaias 48:10

Binalo ko kamo sa kalayo nin pagtios, siring na an plata linilinig sa horno. Alagad nakua ko kamong mayo nin halaga.

Jeremias 17:10

Ako, an Kagurangnan, an nagsisiyasat sa isip saka nagbabalo kan puso nin tawo. Tinatratar ko an lambang saro sosog sa saiyang pamumuhay, asin mga ginigibo.”

Ezekiel 22:18

“Aki nin tawo, an mga Israelita mayo na nin halaga para sako. Arog sinda sa ati nin metal—bronse, lata, lansang, asin timga—an ati na natatada pakatapos na linigan an plata sa horno.

Daniel 11:35

Gagadanon an nagkapira sa mga madonong na lider, alagad an magigin bunga kaiyan iyo an paglinig kan banwaan. Padagos na mangyayari ini sagkod na mag-abot an kataposan, an panahon na itinalaan nin Dios.

Zacarias 13:9

Babaloon ko an ikatolong kabtang na matatada dangan lilinigan ko sinda arog kan paglinig kan plata sa paagi nin kalayo. Babaloon ko sinda siring sa pagbalo sa bulawan. Mamimibi sinda sa sako, asin sisimbagon ko sinda. Sasabihan ko sinda na sinda an sakong banwaan, asin ipapahayag ninda na ako an saindang Dios.”

Deuteronomio 8:16

Sa kalangtadan, pinakakan niya kamo nin manna, pagkakan na dai pa nanamitan kan saindong mga ginikanan. Pinasakitan niya kamo sa pagbalo saindo, tanganing sa kataposan, tawan niya kamo nin mga marahay na bagay.

Deuteronomio 8:2

Giromdoma nindo kun paano kamo pinangenotan nin Kagurangnan, na saindong Dios, sa pagbaklay nindo sa desyerto sa laog nin kwarentang taon. Pinasakitan niya kamo sa pagbalo saindo, tanganing aramon an nasa puso nindo, kun makuyog kamo kan saiyang mga togon o dai.

1 Pedro 1:7

tanganing baloon kun tunay an saindong pagtubod. Maski an bulawan na pwedeng mawara, binabalo sa kalayo; siring man, an saindong pagtubod na mas mahalaga ki sa bulawan dapat baloon, tanganing mahiling na an saindong pagtubod tunay, asin magkamit kamo nin kaomawan, kamurawayan saka paggalang sa Aldaw na ihayag si Jesu-Cristo.

Kapahayagan 2:23

Gagadanon ko man an saiyang mga aki tanganing maaraman kan gabos na simbahan na ako iyo an nagsisiyasat sa isip saka puso nin tawo, dangan itatao ko sa lambang saro an maninigo sa saiyang mga gibo.