Mga Talinhaga 14:29 - Marahay na Bareta Biblia

²⁹ An tawong dai tolos naaanggot igwa nin dakulang pakasabot, alagad an madaling maanggot nagpapahiling kan saiyang kalolongan.

Mga Talinhaga 14:29 ပူးပေါင်းရင်းမြစ်များ

Mga Talinhaga 14:17

An tawong mainit an payo nakakaginibo nin kalolongan; an tawong madonong nagdadanay na toninong.

Mga Talinhaga 14:28

An kabantogan kan sarong hade nasa kadakulan kan saiyang nasasakopan; mayo nin halaga an sarong hade kun mayo siyang tawohan.

Mga Talinhaga 15:18

An mainit na payo minapoon nin diskutiran, alagad an pagpugol sa sadiri minadara nin katoninongan.

Mga Talinhaga 16:32

Mas marahay an magin pasensyoso ki sa magin mapangyari. Mas marahay an pagpugol kan sadiri ki sa pagdaog kan bilog na syudad.

Mga Talinhaga 17:27

Bakong matinaram an tawong may pakaaram. An tawong haloy maanggot igwa nin pakasabot.

Mga Talinhaga 19:11

An marahay na pag-isip nin tawo iyo an minapugol kan saiyang kaanggotan; kamurawayan niya an magpasensya sa mga karatan na ginibo saiya.

Mga Talinhaga 25:28

An tawo na dai tataong magpugol sa sadiri garo syudad na sinalakay nin kaiwal saka binayaan na mayo nin kudal.

Mga Talinhaga 25:8

Dai ka magmadali sa pagdara sa hukoman kan ano man na nahiling mo. Huli ta kun may magpatotoo na nasasala ka, ano an saimong gigibohon?

Mga Talinhaga 4:8

Pahalagahan mo an kadonongan asin ilalangkaw ka niya; tatawan ka niya nin kaomawan kun kugoson mo siya.

Parahulit 10:6

Mga lolong na tawo an tinatawan nin halangkaw na katongdan, mantang an mga mayayaman tinatawan nin harababang katongdan.

Parahulit 7:8

An kataposan kan sarong bagay orog na marahay ki sa kapinonan kaiyan. An pagkamatinios mas marahay ki sa kapaabaw-abawan.

Parahulit 7:9

Hare pag-anggot tolos-tolos, huli ta sa lolong an pagrimpos nin maraot na boot.

Mga Bilang 12:3

Si Moises sarong tawong orog na mapakumbaba ki sa kiisay man na nabubuhay sa kinaban.)

Mateo 11:29

Salongan nindo an sakong sakal asin mag-adal kamo sako, huli ta ako maboot asin mahuyo; asin makakakua kamo nin kapahingaloan.

Mateo 2:16

Naanggot na gayo si Herodes kan maaraman niya na nadaya siya kan mga mago na taga sirangan. Kaya ipinagadan niya an gabos na lalaki sa Betlehem sagkod sa mga kataed na lugar, mga lalaki na an edad duwang taon paibaba, sosog sa naaraman niya sa mga mago manongod kan oras nin pagtunga kan bitoon.

Santiago 1:19

Namomotan kong mga tugang, giromdoma nindo ini: an lambang saro saindo kaipuhan maliksing maghinanyog, alagad maingat sa pagtaram saka maluya sa pag-anggot.