Mga Bilang 33:55 - Marahay na Bareta Biblia

⁵⁵ Alagad kun dai nindo pahaleon an gabos na nag-eerok sa daga, an matatada magigin garo mga puling sa saindong mga mata asin mga tonok sa saindong mga hirog. Lalabanan ninda kamo sa dagang eerokan nindo.

Mga Bilang 33:55 ပူးပေါင်းရင်းမြစ်များ

Exodo 23:33

Dai nindo sinda pagtugotan na mag-erok sa saindong daga huli ta kun magtugot kamo, papagkasalaon ninda kamo sa sakuya; iyan an magigin siod sa saindo kun sambahon nindo an saindang mga dios-dios.”

Ezekiel 28:24

Nagtaram an Kagurangnan, “Maski saro kan mga nasyon na nakapalibot sa Israel na nagtuyatuya saiya kaidto dai na nanggad magigin arog sa mga tonok asin mga binit na malugad sa Israel. Dangan maaaraman ninda na ako an Kagurangnan Dios.”

Mga Bilang 33:56

Kun dai nindo sinda pahaleon sa daga, kamo an tutunawon ko siring kan inisip kong gibohon sainda.”

2 Corinto 12:7

Alagad tanganing dai magdakula an sakong payo huli sa mga nahiling kong mga makangangalas na bagay, tinawan ako nin tiunay sa hawak bilang sugo ni Satanas, tanganing patioson ako asin dai ako magin mapaabaw-abaw.

Deuteronomio 7:16

Gadanon nindo an gabos na banwaan na itatao sa saindong kamot kan Kagurangnan na saindong Dios. Dai kamo maherak sainda asin dai kamo magsamba sa saindang mga dios-dios. Iyan an magigin siod para saindo.

Deuteronomio 7:4

huli ta dadagkahon ninda an saindong mga aki na talikodan an Kagurangnan tanganing magsamba sa saindang mga dios-dios. Kun mangyari iyan, maaanggot saindo an Kagurangnan asin gagadanon niya kamo tolos.

Josue 23:7

asin dai nanggad kamo makiiba sa mga tawong ini na natatada pa diyan sa kaibahan nindo o kaya magsambit kan ngaran kan saindang mga dios-dios o magsumpa sa ngaran kan mga iyan o magsamba asin magluhod sa mga iyan.

Hukom 2:3

Kaya sinasabihan ko kamo ngunyan na dai ko papahaleon an mga tawong ini sa pagdangadang nindo. Magigin mga kaiwal nindo sinda asin an pagsamba sa saindang mga dios-dios iyo an magigin siod nindo.”