Mga Bilang 29:39 - Marahay na Bareta Biblia

³⁹ Iyo ini an mga pagsusundon manongod sa mga tinutong na atang, mga dolot na pagkakan, mga dolot na arak, saka mga dolot para sa katoninongan na idodolot nindo sa Kagurangnan sa saindong itinalaan na mga pyesta. Laen pa iyan kan mga dolot na itatao nindo sa pag-otob nin sarong panuga o bilang mga boluntad na dolot.

Mga Bilang 29:39 ပူးပေါင်းရင်းမြစ်များ

1 Mga Cronica 23:31

siring man kun igwang mga dolot na tinutong na atang sa Kagurangnan kun mga Sabbath, mga Bagong Bulan saka mga aldaw nin pyesta, sosog sa talaan na bilang kan mga Levita na hinahagad kan lambang gawe nin pagsamba sa Kagurangnan sa gabos na panahon.

2 Mga Cronica 31:14

Si Kore, na aking lalaki kan Levitang si Imna na bantay kan Trangkahan sa Sirangan, iyo an namahala kan pag-ako asin paghiras kan mga boluntad na dolot sa Dios.

2 Mga Cronica 31:3

Hale sa mga hayop na pagsadiri kan hade, nagtao siya nin mga hayop na tututongon sa aldaw saka sa banggi, sa aldaw nin Sabbath, sa Pyesta nin Bagong Bulan, asin sa iba pang pyesta na hinahagad kan Katogonan nin Kagurangnan.

Esdras 3:4

Inotob ninda an Pyesta nin mga Harong-harong sosog sa pagsusundon, asin aroaldaw nagdolot sinda kan sakripisyo na kaipuhan idolot sa aroaldaw;

Esdras 3:5

siring man an mga tinutong na atang, an mga dolot sa Pyesta nin Bagong Bulan asin sa iba pang itinalaan na pyesta nin Kagurangnan, dangan an boluntad na mga dolot sa Kagurangnan.

Nehemias 10:33

Para sa pagsamba sa Templo, matao kami kan mga minasunod: kan sagradong tinapay, kan dolot na pagkakan sa aroaldaw, kan mga hayop na tututongon sa aroaldaw, kan mga banal na dolot para sa aldaw na Sabbath, Pyesta kan Bagong Bulan, asin iba pang mga pyesta, kan iba pang banal na mga atang, kan mga dolot para sa kapatawadan kan mga kasalan nin Israel, asin iba pang mga kaipuhan sa Templo.

Isaias 1:14

Ikinakaongis ko an saimong mga pyesta kan Bagong Bulan saka itinalaan na mga pyesta; iyan sarong pagabat para sako; napapagal na ako sa pagpasan kaiyan.

Levitico 23:2

“Sabihan mo an banwaan nin Israel na iyo ini an mga itinalaan na pyesta nin Kagurangnan, na ipapahayag ninda bilang mga banal na pagtiripon.

Levitico 23:28

Dai kamo magtrabaho sa aldaw na iyan huli ta sa panahon na iyan gigibohon an seremonya kan paghale kan kasalan.

Levitico 23:38

An mga pyestang ini laen pa kan mga aldaw na Sabbath nin Kagurangnan, asin an mga dolot na ini laen man kan saindong mga regalo, mga dolot sa pag-otob nin panuga, asin mga boluntad na dolot na itinatao nindo sa Kagurangnan.)

Levitico 7:11

Iyo ini an mga pagsusundon manongod sa dolot para sa katoninongan na pwedeng idolot sa Kagurangnan nin siisay man.

Amos 5:22

Maski pa dolotan nindo ako nin mga tinutong na atang saka dolot na pagkakan, dai ko iyan aakoon; dai ko man aakoon an mga pinatabang hayop na dinadara nindo sako bilang mga dolot para sa katoninongan.

Mga Bilang 28:2

na tukdoan an mga Israelita na magdolot sa Dios sa talaan na panahon kan mga dolot na pagkakan na nakakawili sa saiya.

Mga Bilang 29:40

Kaya isinabi ni Moises sa mga Israelita an gabos na ipinagboot saiya nin Kagurangnan.

Mga Bilang 6:21

Iyo ini an pagsusundon manongod sa mga Nazireo; alagad kun an sarong Nazireo nanunuga nin sobra sa hinahagad kan saiyang panuga, kaipuhan gibohon niya iyan.

1 Corinto 10:31

Kaya, anoman an gibohon nindo, magkakan man o mag-inom kamo, giboha nindo iyan gabos sa pag-omaw sa Dios.

Deuteronomio 12:6

Duman nindo idodolot an saindong mga tinutong na atang asin an iba pang mga sakripisyo, an saindong mga himoloan saka mga dolot, an saindong mga panugang regalo, an saindong mga boluntad na dolot sagkod an mga matua kan saindong mga baka asin mga karnero.