Mga Bilang 18:12 - Marahay na Bareta Biblia

¹² “Itinatao ko saimo an pinakamarahay kan enot na bunga na itinatao sako taon-taon kan mga Israelita: lana nin oliba, arak, asin trigo.

Mga Bilang 18:12 ပူးပေါင်းရင်းမြစ်များ

Genesis 27:28

Itao logod saimo nin Dios an ambon hale sa langit, magin matubang logod an saimong daga, dangan magdakul logod an saimong ani asin arak.

2 Mga Hade 4:42

Sarong panahon, may nag-abot na lalaki hale sa Baal-salisa. Igwa siya nin dara ki Eliseo na beynteng tinapay na gibo sa enot na ani nin sebada, asin bagong guno na mga mais. Dangan nagsabi si Eliseo, “Tawe an mga lalaki tanganing magkakan sinda.”

2 Mga Cronica 31:5

Kan makalakop an pagboot, an banwaan nin Israel nagdara nin mga dolot hale sa pinakamarahay na trigo, arak, lana nin oliba, dugos saka iba pang bunga kan kaomahan. Nagtao man sinda nin himoloan kan gabos na pagsadiri ninda.

Salmo 147:14

Pinapatoninong niya an mga pagdolonan mo; marahay na trigo an ipinapakakan niya saimo.

Salmo 81:16

Alagad ipapakakan ko saindo an pinakamarahay na trigo asin babasogon ko kamo sa dugos na hale sa gapo.”

Exodo 22:29

“Dai nindo pag-abalahon an pagdolot nin mga tinagba kan saindong inani, kan saindong arak asin kan lana na hale sa mga oliba. “Itao nindo sakuya an saindong matuang aking lalaki.

Exodo 23:19

“Taon-taon dadarahon nindo sa harong nin Kagurangnan na saindong Dios an pinakamarahay sa mga enot na bunga kan saindong daga. “An ogbon na karnero o kanding dai nindo paglutoon sa gatas nin saiyang ina.

Exodo 34:26

“Taon-taon dadarahon nindo sa harong nin Kagurangnan na saindong Dios an pinakamarahay sa mga enot na bunga kan saindong daga. “An ogbon na karnero o kanding, dai nindo paglutoon sa gatas nin saiyang ina.”

Ezekiel 44:30

Mapapasainda an pinakamarahay kan gabos na enot na ani, asin kan gabos na idinolot sako. Sa lambang paggibo nin tinapay kan mga tawo, itatao ninda sa mga padi an enot na naluto bilang atang, tanganing mag-abot sa saindang mga harong an sakuyang bendisyon.

Levitico 2:12

An enot na inani nindo taon-taon dadarahon nindo sa Kagurangnan bilang dolot, alagad dai iyan susuloon duman sa altar.

Levitico 2:14

Kun kamo madara sa Kagurangnan nin dolot na hale sa saindong mga enot na ani kan trigo, an idolot nindo iyo an dinarang o giniling.

Levitico 23:17

An lambang pamilya madara nin duwang tinapay na idodolot sa Kagurangnan bilang sarong espesyal na dolot. An lambang tinapay kaipuhan linuto hale sa duwang kilong arina na may lebadura. Idodolot iyan sa Kagurangnan bilang enot na bunga kan inani.

Levitico 23:20

Dadarahon kan padi an tinapay kaiba an duwang lalaking karnero asin iiitaas iyan gabos bilang sarong espesyal na regalo sa Kagurangnan para sa mga padi. An mga dolot na iyan banal.

Deuteronomio 18:3

“Sa lambang baka o karnero na iaatang, itatao sa kapadian an abaga, an panga asin an tulak.

Deuteronomio 18:4

Mapapasainda an mga enot na kahirasan kan ani, arak, saka lana nin oliba; mapapasainda man an enot na ginunting na barahibo nin karnero.

Deuteronomio 26:2

an lambang saro saindo magkua kan enot na mga bunga kan saindong mga tinanom, ilaog nindo sa sarong basket, dangan darahon sa lugar na pagsasambahan sa Kagurangnan.

Deuteronomio 32:14

Dakul na gatas itinao kan saindang mga baka asin kanding; napasainda an mga pinakamatabang karnero, baka saka kanding, an pinakamarahay na trigo, sagkod an pinakapiling arak.