Levitico 22:18 - Marahay na Bareta Biblia

¹⁸ “Sabihan mo si Aaron asin an saiyang mga aki patin an bilog na banwaan nin Israel na kun an sarong Israelita o an siisay man na dayuhan na nag-eerok sa Israel magdara nin sarong atang sa pag-otob nin sarong panuga o bilang sarong boluntad na dolot, kaipuhan mayo nin ano man na kaninan an hayop.

Levitico 22:18 ပူးပေါင်းရင်းမြစ်များ

2 Mga Cronica 31:14

Si Kore, na aking lalaki kan Levitang si Imna na bantay kan Trangkahan sa Sirangan, iyo an namahala kan pag-ako asin paghiras kan mga boluntad na dolot sa Dios.

Salmo 116:14

Ootobon ko an sakong mga panuga sa Kagurangnan, sa atubangan kan bilog niyang banwaan.

Salmo 116:18

Ootobon ko an sakong mga panuga sa Kagurangnan, sa atubangan kan bilog niyang banwaan,

Salmo 22:25

Sa dakulang katiriponan, oomawon taka huli kan saimong ginibo; ootobon ko an sakong mga panuga sa atubang kan mga natatakot saimo.

Salmo 56:12

O Dios, kaipuhan otobon ko an mga panuga ko saimo; atang nin pasasalamat idodolot ko.

Salmo 61:5

O Dios, an sakuyang mga panuga nadangog mo; itinao mo sako an pamana kan mga may pagkatakot saimo.

Salmo 61:8

Kaya danay akong mag-aawit sa saimong ngaran, mantang inootob ko aroaldaw an sakong panuga.

Salmo 65:1

O Dios, maninigong omawon mi ika sa Sion, asin otobon an samong mga panuga saimo,

Salmo 66:13

Sa saimong harong madara ako nin mga tinutong na atang; mga panuga ko saimo sakong ootobon.

Exodo 12:5

An pilion nindo pwedeng kordero o kanding alagad kaipuhan na sarong taon an edad kaiyan asin mayo nin kaninan.

Parahulit 5:4

Kaya kun minagibo ka nin panuga sa Dios, otobon mo iyan tolos; huli ta dai niya nawiwilihan an mga lolong. Otoba an ipinanuga mong gigibohon.

Levitico 1:10

Kun an idodolot kan lalaki saro kan saiyang mga karnero o kanding, kaipuhan na lalaki asin mayong kaninan.

Levitico 1:2

na kukuyogon kan mga Israelita kun nagdodolot sinda nin mga sakripisyo. Kun an siisay man saindo magdara nin dolot sa Kagurangnan, pwede niyang darahon an saro kan saiyang mga baka, karnero o kanding.

Levitico 17:10

Kun an sarong Israelita o dayuhan na nakikihimanwa sainda magkakan nin karne na igwa pa nin dugo, siya magigin kaiwal nin Kagurangnan asin dai na ibibilang na kaayon sa saiyang banwaan.

Levitico 17:13

Kun an sarong Israelita o sarong dayuhan na nakikihimanwa sainda mang-ayam nin hayop o gamgam na pwedeng kakanon, papabuloson niya an dugo kaiyan sa daga dangan tatahoban.

Levitico 22:17

Dangan tinaraman nin Kagurangnan si Moises,

Levitico 23:38

An mga pyestang ini laen pa kan mga aldaw na Sabbath nin Kagurangnan, asin an mga dolot na ini laen man kan saindong mga regalo, mga dolot sa pag-otob nin panuga, asin mga boluntad na dolot na itinatao nindo sa Kagurangnan.)

Levitico 7:16

Alagad kun an dolot para sa katoninongan idolot niya bilang pag-otob nin sarong panuga o bilang sarong boluntad na dolot, dai kaipuhan na uboson iyan sa laog kan aldaw na idinolot iyan; an matada pwedeng kakanon sa masunod na aldaw.

Amos 4:5

Lakaw kamo asin dolotan an saindong tinapay sa pagpasalamat sa Dios, dangan ipaghambog nindo an saindong mga boluntad na dolot! Iyo ini an gawe na boot nanggad nindong gibohon.

Jonas 1:16

Huli kaini nagkaigwa nin makuring takot sa Kagurangnan an mga tripulante, kaya nagdolot sinda nin sakripisyo asin nanuga na malingkod saiya.

Jonas 2:9

Alagad aawitan taka nin mga kaomawan; madolot ako nin sakripisyo asin ootobon ko an sakuyang panuga saimo. An kaligtasan naghahale sa Kagurangnan!”

Nahum 1:15

Hilinga! Igwang sarong sugo na nagdadangadang sa kabukidan dara an marahay na bareta! Nagdadangadang siya tanganing ipahayag an kapangganahan! Banwaan nin Juda, selebraron mo an saimong mga pyesta asin itao mo sa Dios an ipinanuga mo saiya. Dai na nanggad sasalakayon kan mga maraot an saimong daga; nagkagaradan na sinda gabos!

Malakias 1:14

Humugpa logod an maldisyon sa paradaya na nagsasakripisyo sa sako nin mayong halagang hayop, mantang igwa man sana siya nin mga marahay na hayop na saiyang itinugang itatao sako! Dakula akong hade, asin kinakatakotan ako kan mga tawo sa gabos na nasyon.”

Mga Bilang 15:3

Pwede sindang magdolot sa Kagurangnan nin sarong torong baka o sarong lalaking karnero o sarong kordero o sarong kanding bilang tinutong na atang, o dolot sa pag-otob nin sarong panuga, o boluntad na dolot, o dolot kun panahon nin pyesta; an parong kan mga dolot na pagkakan na ini nakakawili sa Kagurangnan.

Mga Gibo 18:18

Haloy pang nag-erok si Pablo sa Corinto; dangan nagpaaram siya sa mga tugang asin nagsakay pasiring sa Siria kaiba si Priscila saka si Aquila. Duman sa Cencrea, nagpaaris siya kan saiyang payo sa pag-otob nin sarong panuga na ginibo niya.

Deuteronomio 12:17

Dai nindo pagkakanon sa saindong mga pinag-eerokan an ano man na idinolot nindo sa Kagurangnan, siring man an mga himoloan kan saindong ani, kan saindong arak o kan saindong lana, an mga matua kan saindong mga baka saka mga karnero, an saindong mga panugang regalo sa Kagurangnan, an saindong mga boluntad na dolot sagkod an iba pa nindong mga sakripisyo.

Deuteronomio 12:6

Duman nindo idodolot an saindong mga tinutong na atang asin an iba pang mga sakripisyo, an saindong mga himoloan saka mga dolot, an saindong mga panugang regalo, an saindong mga boluntad na dolot sagkod an mga matua kan saindong mga baka asin mga karnero.

Deuteronomio 16:10

dangan selebraron nindo an Pyesta nin Pag-ani sa pag-omaw sa Kagurangnan na saindong Dios, sa pagdolot saiya nin sarong boluntad na atang sosog sa bendisyon na itinao niya saindo.