Levitico 19:14 - Marahay na Bareta Biblia

¹⁴ Dai nindo pagmaldisyonon an sarong bongog o pagbugtakan nin singkogan an sarong buta tanganing matumba siya; alagad magkaigwa kamo nin pagkatakot sako. Ako an Kagurangnan.

Levitico 19:14 ပူးပေါင်းရင်းမြစ်များ

Genesis 42:18

Sa ikatolong aldaw sinabihan niya sinda, “Ako sarong tawo na may pagkatakot sa Dios; giboha nindo ini asin mabubuhay kamo:

Nehemias 5:15

An mga gobernador na nagkaerenot sako nagbugtak nin magabat na pasanon sa mga tawo asin naghagad sinda nin kakanon saka arak, laen pa kan kwarentang kwartang plata sa sarong aldaw. Sagkod an saindang mga sorogoon nang-api man sa mga tawo. Alagad dai ko iyan ginibo, huli ta may pagkatakot ako sa Dios.

Salmo 111:10

An pagkatakot sa Kagurangnan iyo an kapinonan nin kadonongan; igwa nin marahay na pakasabot an mga naggigibo kaiyan. An saiyang kaomawan magdadanay sagkod pa man!

Levitico 19:15

“Dai kamo maghukom na bakong matanos; dai kamo magpahiling nin pagsurog sa mga dukha o pagkatakot sa mga mayaman, alagad sa katanosan, hukoman nindo an saindong kapwa.

Levitico 19:32

“Galangan nindo an mga gurang na asin omawon nindo sinda. Magkaigwa kamo nin pagkatakot sa sako. Ako an Kagurangnan.

Levitico 25:17

Dai nindo pagdayaon an kapwa nindo Israelita, kundi magkaigwa kamo nin takot sa Dios; huli ta ako an Kagurangnan na saindong Dios.

Roma 12:14

Bendisyonan nindo an mga nagpapasakit saindo, bakong maldisyonon.

Roma 14:13

Kaya dai na kita maghukom sa kapwa. Kundi maghingowa nanggad na dai magin dahelan nin pagkasingkog o pagkasala kan sarong tugang.

1 Corinto 10:32

Dai kamo magtao nin dahelan na magkasala an mga Judio, o an mga pagano, o an simbahan nin Dios.

Deuteronomio 27:18

“‘Maldisyonon an siisay man na magkabit sa sarong buta pasiring sa salang dalan.’ “Dangan an bilog na banwaan masimbag, ‘Amen!’

1 Pedro 1:17

Kun inaapod nindong Ama an Dios na masuripot na hinuhukoman an lambang saro sosog sa saiyang mga gibo, dapat man kamong maggalang saiya mantang nabubuhay pa kamo sa kinaban na ini.

1 Pedro 2:17

Galangan nindo an gabos na tawo; kamotan nindo an mga kapwa paratubod ki Cristo. Matakot kamo sa Dios, saka galangan nindo si Cesar.

Kapahayagan 2:14

Alagad igwa ako nin nagkapirang bagay na masasabi tumang saimo: may iba diyan saindo na nagsusunod sa katukdoan ni Balaam, na nagtukdo ki Balac na magbuktak nin singkogan para sa mga Israelita kan dagkahon sindang magkakan kan inatang sa mga dios-dios saka maggibo nin karigsokan.