Levitico 18:24 - Marahay na Bareta Biblia

²⁴ Dai kamo maggibo kan arin man sa mga karigsokan na ini na makakapaati saindo, huli ta an paggibo nin siring iyo an nakapaati sa mga nasyon na hahaleon ko sa atubang nindo.

Levitico 18:24 ပူးပေါင်းရင်းမြစ်များ

Genesis 15:16

Apat na henerasyon pa an maagi bago makabalik digdi an saimong kapagarakian huli ta dai ko papahaleon an mga Amoreo sagkod na dai pa nagsobra an saindang karatan kaya kaipuhan nang padusahan sinda.”

1 Mga Hade 9:7

hahaleon ko an banwaan nin Israel sa dagang itinao ko sainda. Pababayaan ko man an Templong ini na kinonsagra ko para sa sakong ngaran. An Israel magigin ngingisihan asin pagtutuyatuyaon kan gabos na banwaan.

2 Mga Cronica 33:2

Nagkasala siya sa Kagurangnan huli ta nagsunod siya kan makauuyam na mga gawe kan mga nasyon na pinahale nin Kagurangnan mantang nagdadangadang an banwaan nin Israel.

Esdras 9:1

Pakatapos na magibo an gabos na ini, dinolok ako kan nagkapirang lider kan banwaan nin Israel dangan sinabihan, “An mga tawo, an mga padi, asin an mga Levita dai nagsuhay sa mga tawo na nag-eerok sa kataraed na mga nasyon nin Ammon, Moab, saka Egipto, o sa mga Cananeo, Heteo, Perezeo, Jebuseo saka Amoreo. Inaarog pa ninda an makauuyam na mga gawe kan mga ini.

Salmo 106:39

Nagin maati sinda huli kan saindang mga gibo, asin nagtalikod sinda sa Dios.

Jeremias 44:4

Padagos kong sinugo saindo an mga propeta na sakong mga sorogoon. Sinabihan ninda kamo na dai nindo paggibohon an makauuyam na bagay na ini na ikinakaongis ko.

Ezekiel 36:17

“Aki nin tawo, kan an mga Israelita mag-erok sa sadiri nindang daga, dinigtaan ninda ini sa paagi kan saindang pamumuhay saka mga gibo. An saindang gawe ibinilang kong arog sa pagkani-maati nin sarong babae na nasa panahon nin pagregla.

Levitico 18:3

Dai nindo pag-arogon an mga ginigibo kan mga tawo sa daga nin Egipto, na nagin erokan nindo o an mga ginigibo kan mga nag-eerok sa Canaan, na pagdadarahan ko saindo.

Levitico 18:30

Kaya nagtaram an Kagurangnan, “Kuyogon nindo an mga ipinagboot ko saindo asin dai kamo mag-arog sa mga tawong naenot sa saindo na nag-erok sa daga. Dai kamo magpaati huli sa paggibo kan mga bagay na iyan. Ako an Kagurangnan na saindong Dios.”

Mga Bilang 35:34

Dai nindo pagdigtaan an dagang pinag-eerokan nindo, huli ta ako an Kagurangnan asin nag-eerok ako sa kaibahan kan banwaan nin Israel.”

1 Corinto 3:17

An siisay man na maglaglag kan templo nin Dios, lalaglagon man nin Dios; huli ta an templo nin Dios banal, asin an templong iyan kamo mismo.

Deuteronomio 12:31

Dai nindo pagsambahon an Kagurangnan na saindong Dios siring kan pagsamba ninda sa saindang mga dios-dios, huli ta sa saindang pagsamba, minagibo sinda nin mangirhat na mga bagay na ikinakaongis nin Kagurangnan. Maski an saindang mga aki tinututong ninda sa saindang mga altar.

Deuteronomio 18:12

Ikinakaongis nin Kagurangnan an mga tawong naggigibo kaiyan, kaya ngani papahaleon niya an mga nasyon na idto sa pagdangadang nindo.

Deuteronomio 9:4

“Pakapahalea sainda nin Kagurangnan na saindong Dios para saindo, dai kamo magsabi na itinao niya saindo an dagang iyan huli ta maninigo kamong mag-ako kaiyan. An totoo, papahaleon nin Kagurangnan an mga nasyon na iyan sa pagdangadang nindo huli ta mga maraot sinda.

Deuteronomio 9:5

Itatao niya saindo an daga ninda bakong huli ta mga marahay kamo asin tama an ginigibo nindo. Papahaleon sinda nin Kagurangnan huli ta mga maraot sinda asin huli ta boot niyang otobon an saiyang panuga sa saindong mga ginikanan, ki Abraham, ki Isaac saka ki Jacob.

Hukom 20:10

An ikasampolong parte kan Israel iyo an mamamahala kan pagpakakan kan hukbo, asin an iba iyo an maduman sa Gibea tanganing padusahan sa ginibong karigsokan sa Israel.”

Hukom 20:5

Kan bangging idto boot akong salakayon kan kalalakihan sa Gibea kaya pinalibotan ninda an harong. Boot ninda akong gadanon; alagad embes na ako, an sakong kasaroan an saindang inabuso na ikinagadan niya.

Hukom 20:6

Ipinuli ko an saiyang bangkay asin sakong pinedaso dangan ipinadara sa doseng tribu nin Israel. Nakagibo nin dakulang karigsokan sa bilog na Israel an mga Benjaminita.