Juan 20:17 - Marahay na Bareta Biblia

¹⁷ Sinabihan siya ni Jesus, “Dai mo ako pagkapotan ta dai pa ako nakakasakat duman sa sakong Ama. Alagad dumuman ka sa mga tugang ko saka sabihan mo sinda na masakat na ako duman sa sakong Ama asin saindong Ama, sa sakong Dios asin saindong Dios.”

Juan 20:17 ပူးပေါင်းရင်းမြစ်များ

2 Mga Hade 4:29

Sinabihan ni Eliseo si Gehazi, “Paghidali! Daraha an sugkod ko asin lakaw. Kun may masabat ka, dai ka mag-ontok tanganing komustahon siya; kun may magkomusta saimo, dai mo siya pagsimbagon. Ibugtak mo an sakong sugkod sa lalawogon kan aki.”

2 Mga Hade 7:9

Alagad nagsinarabihan sinda, “Bakong tama an ginigibo ta. Igwa kita nin marahay na bareta asin dai ta dapat pagtagoon. Kun halaton ta pang mag-aga bago ibareta ini, mapapadusahan kita. Kaya magduman na kita asin iosip ta ini sa mga opisyal kan hade!”

Salmo 22:22

An ngaran mo ipagbabantog ko sa sakong banwaan; oomawon taka sa tahaw nin katiriponan:

Salmo 43:4

Dangan madolok ako sa altar nin Dios, sa Dios na sakuyang kaogmahan. Oomawon taka sa pagtugtog kan lira, O Dios, sakuyang Dios.

Salmo 48:14

“An Dios na ini iyo an satuyang Dios sagkod pa man; mangengenot siya sato sa gabos na panahon.”

Salmo 68:18

Tinutukad niya an halangkaw na bukid, dara an dakul na bihag; minaako siya nin mga regalo maski an mga gikan sa masombikal na tawo. Duman maerok an Kagurangnan Dios.

Salmo 89:26

Masabi siya sako, ‘Ika an sakuyang Ama, sakuyang Dios, asin an Gapo nin sakuyang kaligtasan!’

Isaias 41:10

Dai ka matakot—kaiba mo ako! Ako an saimong Dios—dai ka dapat matakot sa anoman! Papakosogon taka asin tatabangan; iingatan taka asin ililigtas.

Jeremias 31:33

Siring kaini an gigibohon kong tipan sa mga taga Israel: Ibubugtak ko an sakong togon sa saindang isip saka isusurat ko iyan sa saindang puso. Ako an magigin Dios ninda, asin sinda an magigin banwaan ko.

Jeremias 32:38

Dangan sinda an magigin banwaan ko, asin ako an magigin Dios ninda.

Ezekiel 36:28

Dangan mag-eerok kamo sa daga na itinao ko sa saindong mga ginikanan. Kamo an magigin banwaan ko asin ako an saindong magigin Dios.

Ezekiel 37:27

Mag-eerok ako sa kaibahan ninda; ako an magigin Dios ninda asin sinda an magigin banwaan ko.

Mateo 12:50

Huli ta an siisay man na nag-ootob kan kabotan kan sakong Ama sa langit, iyo an sakong mga tugang asin an sakong ina.”

Mateo 25:40

Masimbag an Hade, ‘Sa katotoohan sinasabihan ko kamo, an anoman na ginibo nindo sa saro kan pinakasadit kong mga tugang, ginibo nindo iyan sako!’

Mateo 28:7

Dangan paduman tolos kamo asin sabihan nindo an saiyang mga disipulo na, ‘Nabuhay siya liwat sa mga gadan; maeenot siya saindong magduman sa Galilea. Duman nindo siya mahihiling!’ Tandaan nindo an sinabi ko saindo.”

Markos 12:26

Dapit naman sa pagkabuhay-liwat, dai pa nindo nabasa sa libro ni Moises an manongod sa kahoy na naglalaad? Nasusurat sa librong idto an sinabi nin Dios ki Moises: ‘Ako an Dios ni Abraham, ni Isaac asin ni Jacob.’

Markos 16:19

Pakatapos na kaolayon kan Kagurangnan na Jesus an mga disipulo, isinakat siya sa langit asin nagtukaw sa too nin Dios.

Lukas 10:4

Dai kamo magdara nin pitaka, bag o sandalyas; dai kamo magtaong galang sa kiisay man sa dalan.

Juan 13:1

Bisperas na kan Pyesta nin Paskwa. Aram ni Jesus na nag-abot na an oras na mahale siya digdi sa kinaban tanganing magbalik sa Ama. Namomotan niyang danay an saiyang mga pinili na uya sa kinaban; namotan niya sinda sagkod sa kataposan.

Juan 13:3

Aram ni Jesus na itinao saiya kan Ama an gabos na bagay; aram man niya na gikan siya sa Dios asin mabalik siya sa Dios.

Juan 14:2

Sa harong kan sakong Ama dakul an kwarto; maduman ako sa pag-andam nin lugar para saindo. Dai ko ini sasabihon saindo, kun bako ining totoo.

Juan 14:28

Nadangog nindo akong nagsabi saindo na mahale ako alagad mabalik ako saindo. Kun namotan nindo ako, maoogma kamo huli ta maduman ako sa Ama; huli ta an Ama mas dakula sako.

Juan 14:6

Sinimbag siya ni Jesus, “Ako an dalan, an katotoohan asin an buhay; dai nin makakaduman sa Ama, kun bakong huli sako.

Juan 16:28

Gikan mananggad ako sa Ama saka nagdigdi ako sa kinaban; ngunyan mahale na ako sa kinaban tanganing magbalik sa Ama.”

Juan 17:11

Ngunyan madiyan na ako saimo; mayo na ako sa kinaban, alagad mawawalat sinda sa kinaban. O Banal na Ama, huli kan kapangyarihan kan saimong ngaran, pangatamana an mga itinao mo sako, tanganing magkasararo sinda siring na kita saro.

Juan 17:25

O Amang matanos, dai ka midbid kan kinaban, alagad midbid taka; aram kan mga ini na sinugo mo ako.

Juan 17:5

Kaya, Ama, tawan sako ngunyan an kamurawayan na yaon sako kan kaiba mo ako bago lalangon an kinaban.

Juan 20:27

Dangan sinabihan niya si Tomas, “Hilinga an sakong mga kamot asin bugtakan digdi an saimong muro; dangan laogan an kamot mo sa sakong hirog. Dai ka magduwa-duwa kundi magtubod!”

Juan 7:33

Nagsabi si Jesus, “Dikit pang panahon akong makakaiba nindo, dangan mabalik na ako sa nagsugo sako.

Roma 8:29

An mga pinili na nin Dios, linaen man niya tanganing magin arog sinda sa saiyang Aki, tanganing an Aki iyo an magin panganay sa dakul na magturugang.

2 Corinto 6:18

Ako an magigin ama nindo, kamo an magigin mga aki ko, olay kan Makakamhan na Kagurangnan.”

Galacia 3:26

Huli kan saindong pagtubod ki Cristo Jesus, kamo gabos nagin mga aki nin Dios.

Hebreyo 11:16

Alagad mawot ninda an sarong mas marahay na lugar, an lugar na langitnon. Kaya an Dios dai nasosopog na apodon siyang Dios ninda, huli ta nag-andam siya nin syudad para sainda.

Hebreyo 8:10

Ngunyan, ini an gigibohon kong tipan sa banwaan nin Israel, pakalihis kan mga aldaw na idto, an sabi nin Kagurangnan: Ibubugtak ko an sakong mga katogonan sa saindang mga isip, isusurat ko an mga iyan sa saindang mga puso. Ako magigin Dios ninda; sinda an magigin banwaan ko.

1 Pedro 1:3

Pag-omawon an Dios, Ama ni Jesu-Cristong Kagurangnan ta! Huli kan saiyang dakulang pagkaherak, tinawan niya kita nin bagong buhay huli kan pagkabuhay liwat ni Jesu-Cristo sa mga gadan. Ini an nagtatao sato nin buhay na paglaom,

1 Juan 3:2

Namomotan kong mga tugang, ngunyan mga aki na kita nin Dios, alagad bako pang malinaw kun magigin ano kita. Alagad aram ta na kun dumatong na si Cristo, magigin kitang arog saiya, huli ta mahihiling ta siya kun siisay talaga siya.

Kapahayagan 21:3

Nadangog ko an sarong makosog na tingog hale sa trono na nagsabi, “Ngunyan an erokan nin Dios nasa mga tawo na! An Dios mismo mag-eerok kaiba ninda asin sinda magigin banwaan niya. An mismong Dios an magigin kaiba ninda asin siya an magigin Dios ninda.

Kapahayagan 21:7

An siisay man na manggagana, maako sako kan pamanang ini: ako magigin Dios niya asin siya magigin aki ko.