Josue 4:19 - Marahay na Bareta Biblia

¹⁹ Nagbalyo sa Jordan an mga tawo kan ikasampolong aldaw kan enot na bulan, asin nagkampo sinda sa Gilgal, sa sirangan nin Jerico.

Josue 4:19 ပူးပေါင်းရင်းမြစ်များ

2 Mga Hade 2:1

Nag-abot an panahon tanganing kuahon nin Kagurangnan si Elias sa paagi nin aripuros. Naghale sa Gilgal si Elias saka si Eliseo,

Amos 4:4

An Kagurangnan Dios nagtataram, “Mga taga Israel, dumuman kamo sa banal na lugar sa Betel asin magkasala kamo! Dumuman kamo sa Gilgal asin orog pa kamong magkasala! Daraha nindo an mga hayop na isasakripisyo aga-aga, asin an saindong himoloan sa lambang ikatolong aldaw.

Amos 5:5

Dai kamo magduman sa Beer-sheba sa pagsamba. Dai nindo ako paghanapon sa Betel, huli ta an Betel mawawaraan nin halaga. Dai kamo magduman sa Gilgal huli ta itatapok an saiyang mga namamanwaan.”

Mikas 6:5

Banwaan ko, giromdoma an plano ni Hadeng Balak nin Moab sa saimo asin kun paano siya sinimbag ni Balaam na aking lalaki ni Beor. Giromdoma an mga pangyayari sa dalan magpoon sa kampo sa Sittim sagkod sa Gilgal. Giromdoma an mga bagay na ini asin maaaraman mo kun ano an ginibo ko tanganing iligtas ka.”

Deuteronomio 1:3

Sa enot na aldaw kan ikaonseng bulan kan ikakwarentang taon pakahale ninda sa Egipto, sinabihan ni Moises an mga Israelita kan gabos na ipinagboot saiya nin Kagurangnan na itaram sainda,

Deuteronomio 11:30

An duwang bukid na ini yaon sa solnopan kan Jordan, sa daga kan mga Cananeo na nag-eerok sa kapantayan kan Jordan. An mga bukid na ini nasa parteng solnopan, harani sa sagradong mga kahoy nin More, kataed kan Gilgal.)

Josue 10:43

Pakatapos kaini, nagbalik si Josue asin an saiyang hukbo sa kampo duman sa Gilgal.

Josue 10:6

An mga taga Gibeon nagpadara nin mensahe ki Josue duman sa kampo sa Gilgal: “Dai mo kami pagpabayaan! Magdigdi ka tolos asin tabangan mo kami! Iligtas mo kami huli ta nagkasararo an mga hadeng Amoreo na nag-eerok sa kabubuldan asin sinalakay kami!”

Josue 15:7

hale sa Kapantayan nin Acor minapasiring sa Debir, dangan minaliko paamihan pasiring sa Gilgal, na kahampang kan Dalan nin Adummim sa habagat na parte kan kapantayan. An pagdolonan minaabot sa mga burabod nin En-semes, asin minatapos sa En-rogel;

Josue 24:11

Nagbalyo kamo sa Jordan dangan nakaabot sa Jerico. Linabanan kamo kan mga taga Jerico, siring man kan mga Amoreo, Perezeo, Cananeo, Heteo, Gergeseo, Heveo, asin kan mga Jebuseo. Alagad pinapanggana ko kamo laban sa sainda gabos.

Josue 4:18

asin kan makaabot na sa pangpang kan salog an mga padi, nagbulos giraray an tubig asin binaha kaiyan an pangpang kan salog.

Josue 5:10

Mantang nasa Gilgal an mga Israelita duman sa kapatagan na harani sa Jerico, nagselebrar sinda kan Paskwa sa banggi kan ikakatorseng aldaw kan bulan.

Josue 5:9

Nagtaram an Kagurangnan ki Josue, “Ngunyan hinale ko na sa saindo an kasosopgan kan pagigin oripon sa Egipto.” Kaya an lugar nginaranan Gilgal, na iyo an ngaran kaini sagkod ngunyan.

Josue 9:6

Nagduman sinda ki Josue sa kampo sa Gilgal dangan nagsabi saiya asin sa mga kamagurangan kan Israel, “Hale kami sa harayong lugar. Hinahagad ming makipagtipan kamo sa samo.”

1 Samuel 10:8

Maeenot ka sako sa Gilgal, saen tatagboon taka tanganing magdolot nin mga tinutong na atang asin atang para sa katoninongan. Halaton mo ako duman sa laog nin pitong aldaw sagkod na mag-abot ako, dangan sasabihan taka kan gigibohon mo.”

1 Samuel 15:33

Nagsabi si Samuel, “Huli kan saimong espada, nawaraan nin aki an kadakul na ina; sa siring na paagi, mawawaraan man nin aki an saimong ina.” Dangan pineredaso ni Samuel si Agag sa atubangan nin Kagurangnan duman sa Gilgal.