Josue 13:14 - Marahay na Bareta Biblia

¹⁴ Dai tinawan ni Moises nin daga an tribu ni Levi. Bilang saindang pamana, maako sinda nin kahirasan sa mga dolot na tinututong sa altar para sa Kagurangnan, an Dios nin Israel, siring sa itinaram nin Kagurangnan ki Moises.

Josue 13:14 ပူးပေါင်းရင်းမြစ်များ

Ezekiel 44:28

“An mga padi dai magkakaigwa nin kahirasan sa daga na itinao ko sa Israel. Ako an saindang kahirasan. Dai sinda tatawan nin anoman na pagsadiri sa Israel. Ako an saindang pagsadiri.

Ezekiel 44:29

An dolot na pagkakan, an dolot para sa kasalan, asin an dolot para sa kabayadan nin kasalan iyo an magigin kakanon kan mga padi, asin mapapasainda an gabos na idinolot sako nin Israel.

Deuteronomio 10:9

Kaya dai nag-ako nin kahirasan na daga an tribu ni Levi, bakong arog kan ibang tribu; an Kagurangnan iyo an saindang kahirasan, sosog sa ipinanuga sainda nin Kagurangnan na saindong Dios.)

Deuteronomio 12:12

Mag-ogma kamo sa atubang niya, kaiba an saindong mga aki, mga oripon sagkod an mga Levita na nag-eerok sa saindong mga banwaan; giromdomon nindo na an mga Levita mayo nin sadiring daga.

Deuteronomio 12:19

Dai nanggad nindo pagpabayaan an mga Levita mantang nag-eerok kamo sa saindong daga.

Josue 13:13

Alagad dai pinahale kan mga Israelita an mga taga Gesur saka Maaca; sagkod ngunyan nag-eerok sinda sa Israel.

Josue 13:15

Hinirasan ni Moises kan daga an mga pamilya kan tribu ni Ruben bilang saindang pagsadiri.

Josue 13:33

Alagad an tribu ni Levi dai tinawan ni Moises nin daga. Sinabihan niya sinda na an saindang pamana iyo an Kagurangnan, an Dios nin Israel.

Josue 18:7

Alagad an mga Levita dai mag-aako kan daga huli ta an kahirasan ninda iyo an maglingkod bilang mga padi nin Kagurangnan; dai na man hihirasan an mga tribu ni Gad, ni Ruben asin ni Manases sa sirangan huli ta nag-ako na sinda kan saindang daga sa sirangan kan Jordan na itinao sainda ni Moises, an sorogoon nin Kagurangnan.”