Jeremias 7:30 - Marahay na Bareta Biblia

³⁰ “Guminibo nin karatan an mga taga Juda. An mga ladawan na kinakaongisan ko ibinugtak ninda sa sakong Templo asin dinigtaan ninda ini.

Jeremias 7:30 ပူးပေါင်းရင်းမြစ်များ

2 Mga Hade 21:3

Ipinatugdok niya giraray an paganong mga lugar na pagsasambahan na ginaba kan saiyang ama na si Ezekias. Nagtugdok siya nin mga altar para ki Baal asin naggibo nin mga imahen kan diosang si Asera, arog kan ginibo ni Ahab na hade nin Israel. Nagsamba saka naglingkod siya sa mga bitoon.

2 Mga Hade 21:4

Naggibo siya nin paganong mga altar sa laog kan Templo, an lugar na sinabi nin Kagurangnan na dapat pagsambahan saiya.

2 Mga Hade 21:7

An imahen kan diosang si Asera na saiyang ginibo, ibinugtak niya sa laog kan Templo, sa lugar na iyo an sinabi nin Kagurangnan kan siya magtaram ki David asin ki Solomon na aki kaini: “Digdi sa Templong ini, asin sa Jerusalem, na pinili ko hale sa gabos na tribu nin Israel, ibubugtak ko an sakong ngaran sagkod pa man.

2 Mga Hade 23:12

Ipinagaba niya an mga altar na ginibo kan mga hade nin Juda sa atop kan erokan ni Ahaz, sagkod an mga altar na ibinugtak ni Hadeng Manases sa duwang patyo kan Templo; ipinaronot niya an mga altar dangan ipinatapok sa Kapantayan nin Kidron.

2 Mga Cronica 33:15

Hinale niya sa Templo an dayuhan na mga dios-dios asin an ladawan na ibinugtak niya duman. Hinale man niya an mga altar na ginibo niya sa bukid na namumugtakan kan Templo asin sa iba pang mga lugar sa Jerusalem. Dinara niya idto gabos sa luwas kan syudad dangan itinapok.

2 Mga Cronica 33:3

Ipinatugdok niya giraray an paganong mga lugar na pagsasambahan na ginaba kan saiyang ama na si Ezekias. Nagtugdok siya nin mga altar para ki Baal asin naggibo nin mga ladawan kan diosang si Asera; nagsamba saka naglingkod siya sa mga bitoon.

2 Mga Cronica 33:7

An imahen kan dios-dios na saiyang ginibo, ibinugtak ninda sa laog kan Templo, sa lugar na iyo an sinabi nin Dios kan siya magtaram ki David asin ki Solomon na aki kaini: “Digdi sa Templong ini, asin sa Jerusalem na pinili ko hale sa gabos na tribu nin Israel, ibubugtak ko an sakong ngaran sagkod pa man.

Isaias 66:4

Kaya papadarahan ko sinda nin kapahamakan—an mga bagay mismo na saindang kinakatakotan—huli ta mayo nin nagsimbag kan ako mag-apod, o naghinanyog kan ako magtaram. Pinili ninda an pagsombikal sako asin an paggibo nin maraot.”

Jeremias 16:18

Magbabayad sinda nin doble para sa saindang mga kasalan asin katampalasanan, huli ta dinigtaan ninda an sakong daga kan saindang mga dios-dios na arog sa mga bangkay na mayo nin buhay; pinano ninda an daga kan saindang mga bakong totoong dios.”

Jeremias 23:11

Nagsasabi an Kagurangnan, “Bakong diosnon an mga propeta asin an mga padi; maski sa sakong Templo nahiling ko an saindang katampalasanan.

Jeremias 32:34

Ibinugtak pa ninda an saindang makauuyam na mga dios-dios sa Templo na itinugdok para sa pagsamba sako, asin dinigtaan ninda iyan.

Jeremias 32:35

Naggibo sinda nin mga altar ki Baal sa Kapantayan nin Hinnom, tanganing idolot sa dios-dios na si Molec an saindang mga aking lalaki saka babae. Dai ako nagboot ni nag-isip na ipagibo sainda an siring na bagay asin papagkasalaon an mga taga Juda.”

Ezekiel 7:20

Kaidto ipinag-orgulyo ninda an saindang magagayon na mga alahas, alagad an mga iyan ginamit ninda sa paggibo nin makauuyam na mga ladawan. Kaya an mga bagay na iyan ginibo nin Kagurangnan na magin maati para sainda.

Ezekiel 8:3

Inunat niya an garo sarong kamot dangan pinugol ako sa buhok. Dangan sa bisyon na ini, initaas ako kan espiritu nin Dios asin dinara sa Jerusalem. Dinara niya ako sa palaog kan trangkahan sa amihan kan Templo, saen namumugtak an sarong ladawan na sarong insulto sa Dios.

Daniel 11:31

An nagkapira kan saiyang soldados madigta kan Templo; oontokon ninda an aroaldaw na pagsakripisyo asin papatindogon an Makangirhat na Katakotan.

Daniel 9:27

An pamayong iyan magibo nin sarong pusog na tipan sa dakul na banwaan sa laog nin pitong taon, asin kun makalihis na an kabanga kan panahon na iyan, ipapaontok niya an mga pag-atang saka pagdolot. Dangan ibubugtak sa pinakahalangkaw na lugar kan Templo an Makangirhat na Katakotan asin magdadanay iyan duman sagkod na magadan an nagbugtak kaiyan—sarong kagadanan na inandam nin Dios para saiya.”