Jeremias 4:8 - Marahay na Bareta Biblia

⁸ Kaya magsulot kamo nin sako, magtangis kamo saka maghaya huli ta an mabangis na kaanggotan nin Kagurangnan sa Juda dai nahahale.

Jeremias 4:8 ပူးပေါင်းရင်းမြစ်များ

Salmo 78:49

Binutasan niya sainda an saiyang dakulang kaanggotan, kabaldian asin kakurihan, na naghugpa bilang mga anghel nin kagadanan.

Isaias 10:4

Magagadan kamo sa gera o guguyodon pasiring sa harayong lugar bilang mga bilanggo. Alagad dai pa matatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

Isaias 13:6

Pagkurahaw sa kulog, huli ta harani na an aldaw nin Kagurangnan, an aldaw na raraoton nin Kagurangnan an Babilon!

Isaias 22:12

Inapod kamo kaidto kan Kagurangnan Dios nin mga hukbo tanganing maghibi saka magmondo, mag-aris kan saindong payo saka magsulot nin sako.

Isaias 32:11

Namuhay kamo nin matiwasay asin mayo nin mga kahaditan; alagad pagtakig kamo sa takot! Hubaa nindo an saindong mga gubing, asin pagsulot kamo nin sako.

Isaias 5:25

Anggot an Kagurangnan sa saiyang banwaan, asin inunat niya an saiyang kamot sa pagpadusa sainda. Matatanyog an kabukidan asin an mga bangkay kan nagkagaradan magkakawaralat sa mga tinampo siring sa ati. Alagad dai man giraray maoontok an kaanggotan nin Kagurangnan, kundi padagos na magigin unat an saiyang kamot sa pagpadusa.

Isaias 9:12

An Siria sa sirangan asin an Filistia sa solnopan nagbuka kan saindang mga ngoso tanganing halonon an Israel. Alagad dai pa natatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

Isaias 9:17

Kaya dai matugot an Kagurangnan na makadulag an mga hoben na lalaki, asin dai siya maheherak sa mga balong babae saka sa mga ilo, huli ta bakong diosnon an mga tawo; mga maraot sinda asin gabos karatan an saindang sinasabi. Alagad dai pa matatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

Isaias 9:21

Sinasalakay kan mga taga Manases an mga taga Efraim; siring man an ginigibo kan mga taga Efraim, dangan sinasalakay nindang duwa an Juda. Alagad dai pa natatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

Jeremias 25:34

Maghaya kamo mga lider asin magtangis kamo nin makosog, kamong mga pastor kan sakong banwaan! Magmondo kamo saka magligid sa abo. Nag-abot na an aldaw nin paggadan saka pagwarak, asin bubunoon kamo arog sa mga lalaking karnero.

Jeremias 48:20

‘Buminagsak na an Moab,’ an isisimbag ninda, ‘Tangisan nindo siya; saro ining kasosopgan. Ipahayag nindo sa may Salog nin Arnon na rinumpag na an Moab!’

Jeremias 6:26

Tinataraman nin Kagurangnan an saiyang banwaan, “Magsulot kamo nin sako saka magligid kamo sa abo. Magtangis kamo na pano nin kapaitan, arog kan pagtangis para sa bugtong na aking lalaki, huli ta madali nang mag-abot saindo an paragadan.

Mga Panambitan 1:12

“Kamo na mga nag-aagi, mayo daw nin halaga ini saindo? Hilinga kun igwa nin kamondoan arog kan sakuyang kamondoan, na dinadara sako nin Kagurangnan kan aldaw nin labi-labi niyang kaanggotan.

Ezekiel 21:12

Aki nin tawo, maghibi ka asin maghaya; huli ta an espadang iyan para sa sakong banwaan, asin para sa gabos na prinsipe nin Israel. Gagadanon sinda sa espada kaiba an sakong banwaan. Tumboka an saimong daghan sa kawaraan nin paglaom!

Ezekiel 30:2

“Aki nin tawo, magpropesiya ka asin ipahayag mo na ini an itinataram ko, an Kagurangnan Dios: Sarong aldaw na makatakot an nagdadangadang!

Joel 1:13

Pagsulot nin sako asin pagtangis, kamong mga padi na naglilingkod duman sa altar! Paglaog kamo sa Templo asin pagmondo sa bilog na banggi! Mayo nang trigo o arak na ikakadolot sa saindong Dios.

Amos 8:10

An saindong mga pyesta magigin mga aldaw nin kamondoan, asin an saindong magayagayang mga awit magigin mga panambitan. Gigibohon kong mapiritan kamong mag-aris kan saindong payo saka maggubing nin sako. Magigin arog kamo sa mga magurang na nagmomondo huli sa pagkagadan kan solo nindang aking lalaki. Magigin mapait sagkod sa kataposan an aldaw na iyan.

Mikas 1:16

Mga taga Juda, putola an saindong mga buhok sa pagmondo para sa namomotan nindong kaakian. Aroga nindo an pagkaangas kan bwitre, huli ta itatapok an saindong kaakian.

Mga Bilang 25:4

Nagtaram siya ki Moises, “Tiponon mo an gabos na lider nin Israel dangan bilang pagkuyog sako, bitayon mo sinda sa atubang kan mga tawo, asin dai na ako maaanggot sa mga tawo.”