Jeremias 32:44 - Marahay na Bareta Biblia

⁴⁴ Babakalon iyan kan mga tawo, asin sa atubangan nin mga saksi, pipirmahan saka seselyohan an kasuratan nin pagpabakal. Mangyayari ini sa teritoryo ni Benjamin, sa mga baryo sa palibot kan Jerusalem, sa mga banwa nin Juda, sa mga banwa sa mabulod na daga, sa pamitisan kan mga bulod, asin sa parteng habagat nin Juda. An mga tawo ibabalik ko sa saindang daga. Ako, an Kagurangnan, an nagtaram.”

Jeremias 32:44 ပူးပေါင်းရင်းမြစ်များ

Isaias 44:26

Alagad kun minahula an sakong sorogoon, kun minasubol ako nin sugo nganing ipahayag an sakong plano an mga plano saka mga hula na iyan ginigibo kong magkatotoo. Sinasabihan ko an Jerusalem na mag-eerok giraray duman an mga tawo, asin an mga syudad nin Juda, na hihirahayon sinda. An mga syudad na iyan hihirahayon giraray.

Jeremias 13:19

An mga banwa sa habagat na parte nin Juda napapalibotan na; mayo na nin makakalaog duman. Dinarang bihag an gabos na taga Juda tanganing itapok.”

Jeremias 17:26

Maabot an mga tawo hale sa mga banwa nin Juda asin sa mga baryo sa palibot nin Jerusalem; maabot man an mga tawo hale sa teritoryo nin Benjamin, hale sa mga poon kan bulod, hale sa mga bukid, asin hale sa habagat na parte kan Juda. Madara sinda sa sakong templo nin mga tinutong na atang asin mga sakripisyo, mga dolot na pagkakan saka insenso, patin mga dolot nin pasasalamat.

Jeremias 30:18

Nagtataram an Kagurangnan, “Ibabalik ko an sakong banwaan sa saindang daga saka maheherakan ko an lambang pamilya; papatindogon giraray an Jerusalem asin an palasyo ibabalik sa dating lugar.

Jeremias 30:3

huli ta nagdadangadang na an aldaw na ibabalik ko an banwaan ko, an Israel asin an Juda, saka an saindang kayamanan. Ibabalik ko sinda sa daga na itinao ko sa mga ginikanan ninda, asin masasadirihan ninda giraray iyan. Ako, an Kagurangnan, an nagtaram.”

Jeremias 31:23

An Kagurangnan nin mga hukbo, an Dios nin Israel, nagtataram, “Kun ibalik ko na an banwaan sa saindang daga, masabi giraray sinda sa daga nin Juda asin sa saiyang mga banwa, ‘Bendisyonan logod nin Kagurangnan an sagradong bulod nin Jerusalem, an banal na lugar na saiyang pinag-eerokan.’

Jeremias 32:10

Pinirmahan ko an kasuratan nin kabaklan saka sinelyohan; nagkua ako nin mga saksi asin an kwarta tinimbang ko.

Jeremias 32:37

Titiponon ko an mga tawo hale sa gabos na nasyon na pinagwarakan ko sainda kan ako maongis saka maanggot sainda. Ibabalik ko sinda sa lugar na ini asin matiwasay na pag-eerokan digdi.

Jeremias 33:11

an mga tingog nin kaogmahan asin kagayagayahan saka an maogmang tingog kan mga bagong kasal. Madadangog mo na nag-aawit an mga tawo mantang dinadara ninda an saindang mga dolot nin pasasalamat sa sakong Templo; masabi sinda, ‘Magpasalamat sa Kagurangnan nin mga hukbo, huli ta siya marahayon asin an saiyang pagkamoot mayo nin kataposan.’ Gigibohon kong magin mauswag giraray an dagang ini arog kan dati. Ako, an Kagurangnan, an nagtaram.”

Jeremias 33:13

Sa mga banwa kan mabulod na daga, sa pamitisan kan mga bulod, sa parteng habagat kan Juda, sa daga nin Benjamin, sa mga baryo sa palibot nin Jerusalem, asin sa mga banwa nin Juda, an mga pastor magbibilang giraray kan saindang mga karnero. Ako, an Kagurangnan, an nagtaram.”

Jeremias 33:26

Siring na ginibo ko nanggad ini, siring man papadanayon ko an sakong tipan sa mga kapagarakian ni Jacob asin ni David na sakong sorogoon. Pipilion ko an saro sa mga kapagarakian ni David tanganing paghadean an mga kapagarakian ni Abraham, Isaac, asin ni Jacob. Maheherakan ko an sakong banwaan saka papauswagon ko giraray sinda.”

Jeremias 33:7

Papauswagon ko an Juda saka an Israel, asin papatindogon ko giraray sinda arog kan dati.

Obadias 1:19

“Masasadirihan kan mga hale an habagat nin Juda an daga nin Edom; asin sasakopon kan mga hale sa pamitisan kan kabubuldan sa solnopan an Filistia. Sasadirihon kan mga Israelita an teritoryo nin Efraim saka Samaria; asin kukuahon kan mga taga Benjamin an Gilead.

Obadias 1:20

An hukbo nin mga itinapok hale sa amihan nin Israel mabalik asin sasakopon an Fenicia sagkod sa Sarefat sa amihan. An mga taga Jerusalem na itinapok sa Sardis iyo an masakop kan mga banwa sa habagat nin Juda.

Sofonias 2:7

An mga natatadang namamanwaan nin Juda iyo an mag-eerok sa saindong daga. Papasabsabon ninda duman an saindang mga karnero asin makatorog sinda sa mga harong sa Askelon. Iibahan sinda kan Kagurangnan na saindang Dios, asin papauswagon giraray niya sinda.

Zacarias 7:7

Iyo ini an itinaram nin Kagurangnan sa paagi kan mga naenot na mga propeta kan panahon na mauswag pa an Jerusalem asin pano ini nin mga tawo, dangan kan panahon na an mga banwa sa palibot kan syudad kadakul an nag-eerok siring man an rehiyon sa habagat saka an mga kababan sa solnopan.