Jeremias 32:15 - Marahay na Bareta Biblia

¹⁵ Nagtaram an Kagurangnan nin mga hukbo, an Dios nin Israel, na magkakaigwa giraray nin pagbabarakalan nin mga harong, oma, asin ubasan sa dagang ini.”

Jeremias 32:15 ပူးပေါင်းရင်းမြစ်များ

Isaias 44:26

Alagad kun minahula an sakong sorogoon, kun minasubol ako nin sugo nganing ipahayag an sakong plano an mga plano saka mga hula na iyan ginigibo kong magkatotoo. Sinasabihan ko an Jerusalem na mag-eerok giraray duman an mga tawo, asin an mga syudad nin Juda, na hihirahayon sinda. An mga syudad na iyan hihirahayon giraray.

Jeremias 30:18

Nagtataram an Kagurangnan, “Ibabalik ko an sakong banwaan sa saindang daga saka maheherakan ko an lambang pamilya; papatindogon giraray an Jerusalem asin an palasyo ibabalik sa dating lugar.

Jeremias 31:12

Maabot sinda dangan maawit nin makosog sa ibabaw kan Bukid nin Sion; mag-oogma sinda huli kan sakong mga regalo— mga regalong trigo, arak, saka lana nin oliba, mga regalong karnero saka baka. Makakaarog sinda sa tatamnan na may patubig; dai na nanggad sinda magtitios.

Jeremias 31:24

An mga tawo mag-eerok sa Juda asin sa gabos niyang banwa, siring man an mga paraoma asin an mga pastor kaiba an saindang mga karnero.

Jeremias 31:5

Matanom giraray kamo nin mga ubas sa kabubuldan nin Samaria, asin an mga nagtanom kaiyan makakan kan mga bunga kaiyan.

Jeremias 32:14

“Pinagbotan ka nin Kagurangnan nin mga hukbo, an Dios nin Israel, na kuahon an mga kasuratan na ini, an selyadong kasuratan nin kabaklan saka an bukas na kopya, asin ibugtak mo an mga iyan sa sarong tapayan, tanganing maingatan iyan sa halawig na panahon.

Jeremias 32:25

Alagad ika an nagsugo sako, o Kagurangnan Dios, na bakalon an oma sa atubangan kan mga saksi, maski an syudad na ini nakatalaan nang sakopon kan mga taga Babilonia.”

Jeremias 32:37

Titiponon ko an mga tawo hale sa gabos na nasyon na pinagwarakan ko sainda kan ako maongis saka maanggot sainda. Ibabalik ko sinda sa lugar na ini asin matiwasay na pag-eerokan digdi.

Ezekiel 28:26

Matiwasay sindang mag-eerok duman. Matugdok sinda nin mga harong saka matanom nin mga ubas. Papadusahan ko an mga kataed ninda na nagtuyatuya sainda. Dangan maaaraman ninda na ako an Kagurangnan na saindang Dios.”

Zacarias 3:10

Pag-abot kan aldaw na iyan, aalokon kan lambang saro saindo an saiyang kanatad na makisumaro saindo sa kaogmahan huli kan katoninongan asin katiwasayan, sa lindong kan saindong mga ubasan saka mga kahoy na higera.”