Jeremias 29:23 - Marahay na Bareta Biblia

²³ Iyan an saindang aabotan huli ta naggibo sinda nin magabat na kasalan—nagdorog sinda sa bako nindang agom saka nagtaram nin mga kaputikan sa ngaran nin Kagurangnan. Tumang ini sa kabotan nin Kagurangnan; siya an saksi laban sainda. An Kagurangnan an nagtaram.”

Jeremias 29:23 ပူးပေါင်းရင်းမြစ်များ

Genesis 31:50

Nagsabi pa si Laban, “Kun maglaen an saimong pagtratar sa mga aki kong babae, o kun mag-agom ka nin ibang mga babae, minsan dai ko maisihan, giromdoma na nagbabantay sato an Dios.

Genesis 34:7

Nag-abot an mga aking lalaki ni Jacob asin kan maaraman ninda an nangyari, nabigla sinda asin naanggot nin marahay huli ta sarong insulto sa mga Israelita an ginibong panlupig ni Shekem sa aki ni Jacob.

2 Samuel 13:12

Nagsimbag si Tamar, “Dai mo ako pagpiriton, tugang ko huli ta an bagay na ini dai ginigibo sa Israel; dai ka maggibo nin siring na karatan.

Mga Talinhaga 5:21

Nahihiling nin Dios an gabos mong gibo. Saen ka man magduman namamasdan ka niya.

Jeremias 13:27

Nahiling niya na ginigibo mo an mga bagay na kinakaongisan niya. Nahiling niya na nagduduman ka sa kabubuldan asin sa kaomahan sa pagsunod sa mga paganong dios-dios, arog sa sarong lalaki na nagmamawot sa agom kan saiyang kapwa, patin arog sa sarong lalaking kabayo na naghihirihiri kun nahihiling an babaeng kabayo. Herak man saimo, Jerusalem! Nuarin ka magigin malinig nanggad?

Jeremias 16:17

Nahihiling ko an gabos nindang ginigibo. Mayo nin natatago sako; an mga kasalan ninda dai makakalampas sa sakong panhiling.

Jeremias 23:14

Alagad orog pa an karatan na ginigibo kan mga propeta sa Jerusalem: nakikidorog sinda sa bako nindang agom saka nagtataram nin mga kaputikan; tinatabangan ninda an mga tawo sa paggibo nin maraot, kaya mayo nin minaontok sa paggibo nin karatan. Para sako, gabos sinda maraot arog kan mga taga Sodoma saka mga taga Gomorra.

Jeremias 23:16

Nagtaram an Kagurangnan nin mga hukbo sa mga taga Jerusalem, “Dai nindo pagdangogon an mga sinasabi saindo kan mga propeta; nagtutukdo sinda saindo kan mga paglaom na mayo nin halaga. Nagtataram sinda nin mga bisyon na hale sa sadiri nindang kaisipan asin bakong hale sako.

Jeremias 23:21

Nagtaram an Kagurangnan, “Dai ko sinugo an mga propetang ini, alagad nagralakaw sinda. Dai ko sinda tinawan nin mensahe, alagad nagtaram sinda sa sakong ngaran.

Jeremias 23:32

Hinanyoga nindo an sinasabi ko! Laban ako sa mga propeta na nagtataram kan saindang mga pangatorogan na pano nin mga kaputikan. Ipinapangosip ninda an mga pangatorogan na ini saka linalagalag ninda an sakong banwaan huli kan saindang mga kaputikan asin kahambogan. Dai ko sinda sinugo ni pinagbotan na maglakaw. Mayo lamang sinda nin ikakatabang sa banwaan. Ako, an Kagurangnan, an nagtaram.”

Jeremias 29:21

“An Kagurangnan nin mga hukbo, an Dios nin Israel, nagtaram manongod ki Ahab na aking lalaki ni Kolaias saka manongod ki Zedekias na aking lalaki ni Maaseias, na nagpopropesiya nin mga kaputikan sa ngaran nin Kagurangnan. Nagtaram siya na itatao niya sinda sa kamot ni Nebukadnezzar na hade nin Babilonia. Gagadanon sinda kan hade sa atubangan nindo.

Jeremias 29:31

padarahan an gabos na bilanggo sa Babilon kan mensaheng ini manongod ki Semaias: “Ako, an Kagurangnan, an mapadusa ki Semaias asin sa gabos niyang kapagarakian. Dai ko siya sinugo, alagad nagtaram siya saindo na garo baga siya sarong propeta saka pinatubod niya kamo sa kaputikan. Dai siya magkakaigwa nin mga kapagarakian sa kaibahan nindo. Dai siya mabubuhay tanganing mahiling an mararahay na bagay na gigibohon ko para sa sakong banwaan, huli ta tinaraman niya sinda na magrebelde tumang sako. Ako, an Kagurangnan, an nagtaram.”

Jeremias 5:8

Garo sinda mga barasog saka makokosog na kabayo, na lambang saro nagmamawot kan agom kan saiyang kataed.

Jeremias 7:11

Naghohona daw kamo na an sakong Templo tagoan nin mga mahabon? Nahihiling ko an saindong ginigibo.

Ezekiel 35:13

Nadangog ko an dakul na kahambogan na sinabi mo tumang sako.”

Sofonias 3:4

Dai malalaoman asin parapasaluib an saiyang mga propeta; an mga banal na bagay dinidigtaan kan mga padi asin an togon nin Dios saindang binibiko para sa sadiri nindang karahayan.

Malakias 2:14

Minahapot kamo kun tano ta habo na niyang akoon an mga iyan. Huli ta aram niya na linapas nindo an saindong panuga sa babaeng inagom nindo kan mga hoben pa kamo. Siya an saindong kaiba, asin linapas nindo an saindong panuga saiya maski nanuga kamo sa atubangan nin Dios na magigin maimbod saiya.

Malakias 3:5

Nagsasabi an Kagurangnan nin mga hukbo, “Madatong ako sa tahaw nindo sa paghukom, asin ako an masaksi laban sa mga parakulam, sa parasambay, sa mga nagsasaksi nin putik, sa mga nagdadaya kan bayad kan mga parapatandan, asin sa mga nang-aapi sa mga babaeng balo, mga ilo, asin mga dayuhan—sa gabos na dai minagalang sako.

Hebreyo 4:13

Mayong matatago sa Dios. An gabos na bagay hayag na nahihiling niya. Saiya kita gabos matao nin kwenta kan satong mga gibo.

Kapahayagan 1:5

asin hale ki Jesu-Cristo, an maimbod na saksi, na iyo an enot na binuhay liwat, saka iyo man an kagsakop kan mga hade sa kinaban. Namomotan kita ni Cristo. Sa paagi kan saiyang dugo, kinalda niya kita sa satong mga kasalan.

Kapahayagan 3:14

“Suratan mo an anghel kan simbahan sa Laodicea: “Iyo ini an mensahe kan Amen, an maimbod saka totoong saksi, an ginikanan kan gabos na linalang nin Dios.

Hukom 11:10

Nagsimbag sinda, “Oyon kami. An Kagurangnan an satong saksi.”