Jeremias 23:8 - Marahay na Bareta Biblia

⁸ Embes kaiyan, manunumpa sinda huli sako bilang an Dios na buhay na nagluwas kan banwaan nin Israel hale sa daga sa amihan asin hale sa gabos na nasyon na winarakan ko sainda. Dangan mag-eerok sinda sa sadiri nindang daga.”

Jeremias 23:8 ပူးပေါင်းရင်းမြစ်များ

Isaias 11:11

Sa aldaw na iyan, gagamiton giraray nin Kagurangnan an saiyang kapangyarihan asin ipupuli an mga natada kan saiyang banwaan hale sa Asiria, Egipto, Patros, Etiopia, Elam, Babilonia, Hamath, asin sa mga baybayon kan dagat.

Isaias 14:1

Maheherakan giraray nin Kagurangnan an saiyang banwaan nin Israel asin pipilion niya sinda bilang saiyang sadiri. Tutugotan niya sindang mag-erok giraray sa saindang daga, asin maabot an mga dayuhan dangan maerok sa kaibahan ninda.

Jeremias 16:14

Nagtataram an Kagurangnan, “Maabot an panahon na an mga tawo dai na manunumpa huli sako bilang buhay na Dios na nagluwas sa banwaan nin Israel hale sa Egipto.

Jeremias 16:15

Embes kaiyan, manunumpa sinda huli sako bilang buhay na Dios na nagluwas sa banwaan nin Israel hale sa sarong daga sa amihan, asin hale sa gabos na nasyon na winarakan ko sainda. Ibabalik ko sinda giraray sa sadiri nindang daga, na itinao ko sa saindang mga ginikanan. Ako, an Kagurangnan, an nagtaram.”

Jeremias 23:3

Titiponon ko an natada sa sakong banwaan hale sa mga nasyon na tinapokan ko sainda. Ibabalik ko sinda sa dagang namundagan ninda dangan mag-aaki giraray sinda saka madakul.

Jeremias 29:14

Makukua nanggad nindo ako, asin ibabalik ko saindo an saindong mga kayamanan. Titiponon ko kamo hale sa gabos na nasyon saka mga lugar na inalawan ko saindo, dangan ibabalik sa lugar na pinaghalean nindo bago kamo itinapok. Ako, an Kagurangnan, an nagtaram.’

Jeremias 30:10

“Banwaan ko, dai kamo matakot; mga taga Israel, dai kamo makubhanan. Ililigtas ko kamo hale sa harayong daga na iyan, hale sa daga na pinagbilanggoan saindo. Mapuli kamo saka mamumuhay sa katoninongan; magigin matiwasay kamo, asin mayong mapatakot saindo.

Jeremias 30:3

huli ta nagdadangadang na an aldaw na ibabalik ko an banwaan ko, an Israel asin an Juda, saka an saindang kayamanan. Ibabalik ko sinda sa daga na itinao ko sa mga ginikanan ninda, asin masasadirihan ninda giraray iyan. Ako, an Kagurangnan, an nagtaram.”

Jeremias 31:8

Dadarahon ko sinda hale sa amihan saka titiponon hale sa mga poro kan kinaban. Magigin kaiba ninda an mga buta saka mga pilay, an mga bados asin an mangangaki na. Mabalik sinda na sarong dakulang nasyon.

Jeremias 32:37

Titiponon ko an mga tawo hale sa gabos na nasyon na pinagwarakan ko sainda kan ako maongis saka maanggot sainda. Ibabalik ko sinda sa lugar na ini asin matiwasay na pag-eerokan digdi.

Jeremias 8:3

Para sa matatada sa makasalan na nasyon na ini na nag-eerok sa mga lugar na winarakan sa sainda, mas marahay pa an magadan ki sa padagos na mabuhay. Ako, an Kagurangnan nin mga hukbo, an nagtaram.”

Ezekiel 28:25

Nagtaram an Kagurangnan Dios, “Titiponon ko giraray an banwaan nin Israel hale sa mga nasyon na pinagwarakan ko sa sainda, asin maaaraman kan gabos na nasyon na ako banal. An banwaan nin Israel mag-eerok sa sadiri nindang daga, sa daga na itinao ko ki Jacob na sakuyang sorogoon.

Ezekiel 34:13

Hahaleon ko sinda sa dayuhan na mga nasyon dangan ibabalik ko sa sadiri nindang daga. Pasasabsabon ko sinda sa kabukidan nin Israel asin dadarahon ko sa mga burabod nin tubig; papakakanon ko sinda sa mga berdeng pasabsaban kan daga.

Ezekiel 36:24

Hahaleon ko kamo sa lambang nasyon asin daga dangan ibabalik ko kamo sa sadiri nindong daga.

Ezekiel 36:35

Dangan mataram sinda, ‘An dagang ini na alang kaidto arog na ngunyan sa tatamnan nin Eden; an mga syudad na ginaraba, sinamsaman, mamondo, pinag-eerokan na ngunyan asin pinapapusog.’

Ezekiel 37:25

Mag-eerok sinda sa daga na itinao ko sa sakong sorogoon na si Jacob, an daga na pinag-erokan kan saindang mga ginikanan. Duman na sinda mag-eerok sagkod pa man, siring man an saindang mga aki asin an gabos nindang kapagarakian. Sarong hade na arog kan sorogoon kong si David an maghahade sa sainda sagkod lamang.

Ezekiel 39:28

Dangan maaaraman kan sakuyang banwaan na ako an Kagurangnan na saindang Dios, huli ta ako an nagpatapok sainda sa mga dayuhan na nasyon, asin ako an nagtipon saka nagpabalik sainda gabos sa sadiri nindang daga; mayo akong iwawalat maski saro sainda.

Joel 3:7

Ngunyan papaluwason ko sinda sa mga lugar na pinagpabakalan nindo sainda asin gigibohon ko man saindo an ginibo nindo sainda.

Mikas 7:15

Maggibo ka nin mga milagro para sa samo, “Kagurangnan, Kagurangnan siring kan ginibo mo kaidto kan iluwas mo kami sa Egipto.

Sofonias 3:20

Maabot an panahon na ibabalik ko sa saindang mga harong an nagkawararak mong mga namamanwaan; gigibohon takang bantog sa bilog na kinaban asin papauswagon taka giraray.” An Kagurangnan an nagtaram.