Jeremias 22:10 - Marahay na Bareta Biblia

¹⁰ Banwaan nin Juda, dai nindo pagtangisan si Hadeng Josias; dai nindo ipagmondo an saiyang pagkagadan. Alagad pagtangisan nindo nin mapait si Joahaz, na saiyang aking lalaki; dinara ninda siya sa harayo, dai na nanggad siya makakabalik, asin dai na nanggad niya mahihiling an daga na saiyang namundagan.

Jeremias 22:10 ပူးပေါင်းရင်းမြစ်များ

2 Mga Hade 22:20

kaya an padusa na ipapadara ko sa Jerusalem dai mangyayari mantang buhay ka pa. Tutugotan takang magadan sa katoninongan.” Dangan nagbalik an mga sugo ki Hadeng Josias dara an mensaheng ini.

2 Mga Hade 23:29

Kan panahon niya, pinangenotan ni Neco, na hade nin Egipto, an sarong hukbo pasiring sa Salog nin Eufrates tanganing tabangan an emperador nin Asiria. Hiningowa ni Hadeng Josias na paontokon an hukbo nin Egipto duman sa Megido, alagad nagadan siya sa gera.

2 Mga Cronica 36:4

Si Eliakim, na tugang na lalaki ni Joahaz, iyo an ibinugtak ni Neco bilang hade nin Juda saka nin Jerusalem asin an ngaran kaining Eliakim rinibayan niya nin Jehoiakim. Si Joahaz dinara ni Neco sa Egipto.

Parahulit 4:2

Naghona ako na orog na paladan an mga gadan na ki sa mga buhay pa;

Isaias 57:1

Nagagadan an mga matanos na tawo, asin mayong nakakasabot o nagmamakulog. Alagad pagkagadan ninda mayo na nin kasakitan na makakadotdot sainda.

Jeremias 16:7

Mayo na nin makakan o mainom na kahampang kan tawong nawaraan nin sarong namomotan sa buhay. Mayo na nin makikidamay maski sa sarong nagadanan nin ama o ina.

Jeremias 22:11

An Kagurangnan nagsasabi manongod ki Joahaz na aking lalaki ni Josias, na nagsalihid sa saiyang ama bilang hade nin Juda, “Naghale siya sa lugar na ini asin dai na siya mabalik.

Jeremias 22:18

Kaya nagsasabi an Kagurangnan manongod ki Jehoiakim na aking lalaki ni Josias, na hade nin Juda: “Mayo nin magmomondo sa saiyang pagkagadan ni masabi, ‘O sakong tugang. O sakong tugang! Mayo nin magtatangis para saiya ni makurahaw, ‘Sakong kagurangnan! Sakong hade!’

Jeremias 22:27

Magmamawot ka na mahiling giraray an banwaan na ini, alagad dai ka na makakabalik.”

Jeremias 25:27

Dangan tinaraman ako nin Kagurangnan, “Sabihan mo an mga tawo na ako, an Kagurangnan nin mga hukbo, an Dios nin Israel, nagboboot na mag-inom sinda sagkod na maburat saka magsuka, sagkod na matumba saka dai na makatindog, huli kan gera na ipapadara ko sainda.

Jeremias 28:4

Ibabalik ko man digdi si Jehoiakin na aking lalaki ni Jehoiakim, na hade nin Juda, asin an gabos na taga Juda na ipinatapok sa Babilonia. Hahaleon ko na an kapangyarihan kan hade nin Babilonia. Ako, an Kagurangnan, an nagtaram.”

Jeremias 42:18

“Nagtataram an Kagurangnan, an Dios nin Israel, ‘Kun paano ko inula an sakong labi-labing kaanggotan sa mga taga Jerusalem, siring man iuula ko an sakong kaanggotan sa saindo kun magduman kamo sa Egipto. Kamo magigin sarong nakakatakot na tanawon; susubahan kamo kan mga tawo asin gagamiton ninda an saindong ngaran bilang sarong maldisyon. Dai na nanggad nindo mahihiling an lugar na ini.’”

Jeremias 44:14

Mayo kan mga natada sa Juda na nag-eerok na sa Egipto an makakadulag o mabubuhay. Ni saro sa sainda dai makakabalik sa Juda, na boot nindang pag-erokan giraray. Mayo nin makakabalik pwera kan kadikit na makakadulag.”

Mga Panambitan 4:9

Mas marahay pa an mga nagadan sa gera ki sa nagadan sa gutom, na luway-luway na nagagadan huli ta mayo sinda nin makakakan.

Ezekiel 24:16

“Aki nin tawo, sa sarong hiro kan kamot, kukuahon ko an tawong namomotan mo nin marahay. Dai ka dapat magmondo o magtangis o maghibi.

Lukas 23:28

Nag-atubang sainda si Jesus asin nagsabi, “Mga babaeng taga Jerusalem, dai nindo ako pagtangisan kundi pagtangisan nindo an sadiri nindo saka an saindong mga aki.