Jeremias 2:25 - Marahay na Bareta Biblia

²⁵ Israel, dai mo pagpagalon an saimong mga bitis, ni pagpamarahon an saimong halonan sa pagparalamag kan ibang dios. Alagad nagsasabi ka, ‘Dai ako pwedeng tumalikod. Namotan ko na an mga dayuhan na dios-dios asin susunodon ko sinda.’”

Jeremias 2:25 ပူးပေါင်းရင်းမြစ်များ

2 Mga Cronica 28:22

Kan nagin grabe an kasakitan ni Hadeng Ahaz, orog man logod siyang nagkasala sa Kagurangnan.

2 Mga Cronica 28:23

Nagdolot siya nin sakripisyo sa mga dios kan mga Siro, na nakadaog saiya, asin nagsabi, “Tinabangan kan mga dios-dios nin Siria an mga hade nin Siria, kaya kun magdolot man ako sainda nin sakripisyo, pwedeng tabangan man ninda ako.” Ini an nagdara nin karatan sa saiya asin sa bilog na Israel.

Isaias 2:6

O Dios, pinabayaan mo an saimong banwaan, an mga kapagarakian ni Jacob! Lakop na an daga kan mga salamangkero hale sa sirangan asin hale sa daga nin Filistia. Sinusunod kan mga tawo an dayuhan na mga gawe.

Isaias 57:10

Pinapagal nindo an saindong mga hawak sa paghanap nin ibang mga dios, alagad dai kamo nag-oontok. Naghohona kamong an makauuyam nindong mga dios-dios an nagtatao saindo nin kosog, kaya dai kamo pinanluluya.

Jeremias 13:21

Ano an sasabihon mo kun sakopon ka saka pinaghadean kan mga tawong pinaghohona mong mga katood? Makukulogan ka arog sa sarong babaeng nangangaki.

Jeremias 13:22

Kun maghapot ka kun tadaw ta nangyari ini saimo—kun tadaw ta ginirisi an saimong gubing asin linupigan ka—ini huli kan magabat mong kasalan.

Jeremias 14:10

Nagsasabi an Kagurangnan manongod sa mga tawong ini, “Mas boot nindang magharayo sako, asin dai ninda pinugol an saindang sadiri. Kaya dai ko sinda nawiwilihan. Gigiromdomon ko an mga maraot nindang gibo asin papadusahan ko sinda huli kan mga kasalan ninda.”

Jeremias 18:12

Masimbag sinda, ‘Dai, tadaw ta magbabago kami? Susundon mi an sadiri nyamong plano asin gabos kami magibo sosog sa katagasan kan maraot nyamong mga puso!’”

Jeremias 2:31

Banwaan nin Israel, hinanyoga an sakong tataramon. Nagin daw ako siring sa sarong desyerto sa saindo, siring sa dagang madiklom saka pano nin pag-alaman? Tadaw ta nagsasabi kamo na gigibohon nindo an saindong mawilihan, na dai na kamo mabalik sako?

Jeremias 22:20

Mga taga Jerusalem, dumuman kamo sa Lebanon saka magkurahaw, dumuman kamo sa daga nin Basan saka magtangis; mag-apod kamo hale sa kabukidan nin Moab, huli ta nadaog na an gabos nindong kaalyansa.

Jeremias 22:21

Nagtaram saindo an Kagurangnan kan mauswag pa an saindong pamumuhay, alagad habo kamong maghinanyog. Iyo na iyan an gibo nindo poon kan kamo aki pa; dai nanggad kamo nagkuyog sa Kagurangnan.

Jeremias 3:13

Akoon mo sana na nagkasala ka asin nagrebelde tumang sa Kagurangnan, na saimong Dios. Ikumpisal mo na sa lindong nin lambang berdeng kahoy, itinao mo an saimong pagkamoot sa dayuhan na mga dios-dios asin dai ka nagkuyog kan sakong mga pagboot. Ako, an Kagurangnan, an nagtaram.

Jeremias 44:17

Gigibohon mi an samong mga ipinanuga. Magtututong kami nin insenso sa reyna nin langit, saka mag-uula kami nin mga dolot na arak para saiya, arog kan dati nyamong ginigibo asin kan samong mga ginikanan, kan samong hade saka mga lider, sa mga banwa sa Juda asin sa mga tinampo nin Jerusalem. Kadakul kaidto kan samong pagkakan, mauswag kami asin mayo nin nag-abot samong kasakitan.

Mga Panambitan 1:2

Naghihibi siya bilog na banggi, mga luha nagbubulos sa saiyang pisngi. Sa kadakul na namomoot saiya, mayo na ni sarong minaranga; mga katood niya nagpasaluib saiya asin gabos nagin kaiwal niya.

Mga Panambitan 4:4

Pinababayaan ninda an saindang mga omboy na magadan sa paha saka sa gutom; an mga aki nakikilimos nin kakanon, alagad mayo nin nagtatao sa sainda.

Ezekiel 20:32

Dai nanggad mangyayari an nasa isip nindo—na kamo makaarog sa ibang mga nasyon, sa mga tawong nag-eerok sa ibang lugar asin nagsasamba sa mga kahoy saka sa mga gapo.

Oseas 2:3

Kun dai siya mag-ontok, huhubaan ko siya arog kan aldaw na siya namundag. Iaarog ko siya sa sarong alang saka mayong tanom na daga, dangan magagadan siya sa paha.

Malakias 3:14

Nagsabi kamong, ‘Mayong pakinabang an paglingkod sa Dios. Ano an halaga kan pagsunod sa sinasabi niya o an pagpahiling sa Kagurangnan nin mga hukbo na kita nagmomondo huli kan ginibo ta?

Lukas 15:22

Alagad inapod kan ama an saiyang mga sorogoon, ‘Dali kamo; daraha nindo digdi an pinakamarahay na gubing asin sulotan nindo saiya; singsingan nindo siya saka sapatosan.

Lukas 16:24

Kaya nagkurahaw siya, ‘Amang Abraham! Kaheraki man ako! Sugoa man si Lazaro na idotdot an muro niya sa tubig tanganing palipotan an dila ko, huli ta nasasakitan ako nin makuri sa kalayong ini!’

Roma 8:24

Sa paglaom na iyan kita nakaligtas, alagad kun nahihiling na nyato an satong pinaglalaom, iyan bako talagang paglaom, huli ta an sarong bagay na nahihiling, dai na pinaglalaom.

Deuteronomio 28:48

Huli kaiyan, paglilingkodan nindo an mga kaiwal na ipapadara saindo nin Kagurangnan. Magugutom kamo, mapapaha, magigin huba, asin magkukulang sa gabos na bagay; aapihon kamo nin makuri kan Kagurangnan sagkod na kamo magadan.

Deuteronomio 32:16

Pinapag-imon ninda an Kagurangnan kan saindang pagsamba sa mga dios-dios; pinaanggot siya ninda kan saindang marigsok na mga gibo.