Jeremias 15:3 - Marahay na Bareta Biblia

³ Ako, an Kagurangnan, an mapadara sainda nin apat na makangingirhat na bagay: magagadan sinda sa gera; guguyodon kan mga ayam an saindang mga bangkay; kakakanon sinda kan mga gamgam; asin sisimoton kan mga lalaw na hayop an matatada sa saindang mga bangkay.

Jeremias 15:3 ပူးပေါင်းရင်းမြစ်များ

Salmo 68:23

tanganing mahanawan nindo an saindong mga bitis sa dugo, asin an mga dila nin saindong mga ayam makanamit kan saindang kahirasan sa kaiwal.”

Isaias 18:6

An bangkay kan saindang mga soldados magkakawaralat sa mga gamgam saka sa mga lalaw na hayop. Sa tig-init, kakakanon kan mga gamgam an saindang mga bangkay, asin sa tig-lipot, an mga lalaw na hayop an magibo kaiyan.”

Jeremias 12:9

An sakong piniling banwaan garo sarong gamgam na pinalibotan kan nagsasalakay na mga agila. Padigdiha an mga lalaw na hayop; tanganing magsabay sa pagkakan kan bangkay niya!

Jeremias 14:12

Maski sinda mag-ayuno, dai ko hihinanyogon an saindang pag-agrangay; asin maski pa magdolot sinda sako nin mga tinutong na atang saka mga pagkakan, dai ako mawiwili sainda. Embes kaiyan, gagadanon ko sinda sa gera asin sa gutom saka sa helang.”

Jeremias 14:16

An mga tawong pinagsabihan ninda kan mga bagay na ini magagadan man sa gera saka sa gutom. Itatapok sa mga tinampo nin Jerusalem an saindang mga bangkay asin mayo nin malubong sa sainda. Ini an mangyayari sainda gabos—pati sa saindang mga agom, saka mga aking lalaki asin babae. Papabayadon ko sinda kan saindang mga karatan.”

Jeremias 16:4

Magagadan sinda huli sa makangingirhat na mga helang, saka mayo nin matangis ni malubong sainda. An saindang mga bangkay garo odo na matatambak sa daga. Magagadan sinda sa gera saka sa gutom, dangan an saindang mga bangkay magigin kakanon kan mga gamgam asin kan mga lalaw na hayop.

Jeremias 7:33

An mga bangkay magigin pagkakan kan mga gamgam saka mga lalaw na hayop; mayo nin mabugaw sainda.

Mga Panambitan 3:11

Isinuhay niya ako sa sakong dalan, rinonot dangan binayaan;

Ezekiel 14:21

Ini an tataramon nin Kagurangnan Dios: “Mapadara ako nin apat na mangirhat na padusa sa Jerusalem—gera, makuring gutom, lalaw na mga hayop, asin peste—tanganing gadanon an mga tawo saka mga hayop.

Ezekiel 33:27

“Sabihan mo sinda na ini an tataramon ko, an Kagurangnan Dios: Mantang ako an Dios na buhay, magagadan sa espada an mga nag-eerok sa rumpag na mga syudad. An mga nag-eerok sa kaomahan kakakanon kan mga lalaw na hayop. An mga nagtatago sa mga kabukidan saka mga lungib magagadan sa peste.

Levitico 26:16

papadusahan ko kamo. Papadarahan ko kamo nin kasakitan—mga helang na dai nararahay asin kalentura na mabuta saindo saka magpapahalipot kan saindong buhay. Magtatanom kamo, alagad dai iyan makakatabang saindo huli ta an saindong mga kaiwal iyo an makakan kan bunga kaiyan.

Levitico 26:22

Papadarahan ko kamo nin mga maringis na hayop na magadan kan saindong kaakian, asin makakan kan saindong mga ataman na hayop tanganing kadikit na sana an matada saindo kaya mayo na nin maglalakaw sa saindong mga dalan.

Levitico 26:25

Dadarahan ko kamo nin gera huli sa pagtalikod nindo sa satong tipan, asin kun magdurulag kamo pasiring sa saindong mga syudad, papadarahan ko kamo nin mga helang na mayong karahayan, dangan mapipiritan kamong magsuko sa saindong mga kaiwal.

Amos 5:19

An aldaw na iyan makakaarog sa tawong duminulag sa leon alagad an nasabatan sarong oso; o arog sa tawong nagpuli sa harong dangan kan magkapot siya sa lanob, kinagat siya nin halas!

Deuteronomio 28:26

Kun garadan na kamo, an saindong mga bangkay kakakanon kan mga gamgam asin mga lalaw na hayop, asin mayong maalaw sainda.

Deuteronomio 32:24

Magagadan sinda sa gutom saka kalentura, asin sa makatakot na mga helang. Isusubol ko sa pagsalakay sainda an mga maringis na hayop, asin an mga makamandag na halas na makagat sainda.

Kapahayagan 6:8

Nahiling ko an sarong kabayong malongsi. An ngaran kan nangangabayo, Kagadanan, asin nagsusunod saiya an Hades. Itinao sainda an kapangyarihan sa ikaapat na kabtang kan kinaban tanganing manggadan sa paagi nin gera, gutom, helang saka sa paagi nin lalaw na mga hayop.