Jeremias 11:13 - Marahay na Bareta Biblia

¹³ An mga dios-dios kan mga taga Juda arog kadakul kan saindang mga syudad asin an mga altar na itinugdok kan mga nag-eerok sa Jerusalem para sa makauuyam na dios-dios na si Baal arog kadakul kan mga tinampo nin Jerusalem.

Jeremias 11:13 ပူးပေါင်းရင်းမြစ်များ

2 Mga Hade 23:13

Binasang-basang niya an mga altar na nasa sirangan nin Jerusalem, sa parteng habagat kan Bukid nin mga Oliba. An mga altar na ini ginibo ni Hadeng Solomon para ki Astarte, an makauuyam na diosa nin Sidon, para ki Kemos, an dios nin Moab, asin para ki Molek, an dios nin Ammon.

2 Mga Cronica 28:25

Sa lambang syudad saka banwa nin Juda, nagtugdok siya nin paganong mga lugar na pagsasambahan, saen tututongon an mga insenso para sa mga dios-dios. Huli kaini, naanggot saiya an Kagurangnan, an Dios kan saiyang mga ginikanan.

Isaias 2:8

An saindang daga pano na nin mga ladawan; asin sinasamba ninda an mga bagay na gibo kan saindang kamot.

Jeremias 11:17

“Ako, an Kagurangnan nin mga hukbo, iyo an nagtanom kan Israel asin kan Juda; alagad ngunyan hinohomaan ko sinda nin kasakitan. Sinda an nagdara kaini sa saindang sadiri huli ta naggibo sinda nin maraot; pinaanggot ninda ako huli sa pagdolot nin mga sakripisyo ki Baal.”

Jeremias 17:1

Nagsasabi an Kagurangnan, “Mga taga Juda, an saindong mga kasalan isinurat sa paagi kan lansang na pluma; inukit iyan nin sarong pang-ukit na dyamante sa saindong mga puso saka sa mga sungay kan saindong mga altar.

Jeremias 18:15

Alagad liningawan ako kan sakong banwaan; nagtututong sinda nin insenso sa mga dios-dios. Nagkadarapa sinda sa dalan na dapat nindang lakawan; dai na ninda sinusunod an dating mga agihan; naglalakaw sinda sa mga dalan na dai pa pinag-aagihan.

Jeremias 19:4

Gigibohon ko ini huli ta binayaan ako kan banwaan asin dinigtaan ninda an lugar na ini sa pagdolot ninda digdi nin mga sakripisyo sa ibang mga dios, na dai man ninda midbid, ni kan saindang mga ginikanan asin kan mga hade nin Juda. Pinano ninda an lugar na ini nin dugo kan mga tawong mayo nin sala.

Jeremias 19:5

Nagtugdok sinda nin mga altar para ki Baal tanganing tutongon an saindang mga aki bilang sakripisyo. Dai ko ipinagboot na gibohon ninda ini; dai lamang iyan naglaog sa sakong isip.

Jeremias 2:28

“Haen an saindong mga dios-dios na ginibo nindo? Sa saindong kasakitan magpatabang kamo sainda—kun kaya ninda! Juda, an saimong mga dios-dios arog kadakul kan saimong mga syudad.

Jeremias 3:24

Alagad an pagsamba nyamo ki Baal, an dios nin kasosopgan, iyo an nagin dahelan kan pagkaubos kan samong mga hayop, mga aking lalaki saka babae, patin kan gabos na pinagalan kan samong mga ginikanan.

Jeremias 3:25

Dapat kaming pahigdaon sa kasosopgan, asin tahoban nin disonra. Kami asin an samong mga ginikanan danay na nagkasala sa Kagurangnan na samuyang Dios; dai mi nanggad kinuyog an saiyang mga pagboot.”

Jeremias 32:35

Naggibo sinda nin mga altar ki Baal sa Kapantayan nin Hinnom, tanganing idolot sa dios-dios na si Molec an saindang mga aking lalaki saka babae. Dai ako nagboot ni nag-isip na ipagibo sainda an siring na bagay asin papagkasalaon an mga taga Juda.”

Jeremias 44:21

“Manongod sa insenso na tinutong nindo asin kan saindong mga ginikanan, kan saindong mga hade saka mga lider, asin kan mga tawo na nag-eerok sa daga, sa mga banwa nin Juda saka sa mga tinampo nin Jerusalem—naghohona daw kamo na dai iyan aram nin Kagurangnan o nalingawan na niya iyan?

Jeremias 44:5

Alagad dai kamo naghinanyog ni nagkuyog. Dai nindo tinalikodan an saindong maraot na gawe nin pagdolot sa mga dios-dios.

Jeremias 48:35

Papaonton ko an mga tawo sa Moab sa pagdolot nin mga sakripisyo sa paganong mga lugar na pagsasambahan asin an pagtutong nin insenso para sa saindang mga dios-dios. Ako, an Kagurangnan, an nagtaram.

Jeremias 7:9

Naghahabon kamo, nanggagadan, nagdodorog sa bakong agom, nanunumpa sa bakong katotoohan, nagdodolot nin mga sakripisyo ki Baal, asin nagsasamba sa mga dios-dios na dai man nindo midbid.

Ezekiel 16:24

sa gilid kan lambang dalan nagtugdok ka nin mga lugar na pagsasambahan sa mga dios-dios asin mga lugar nin pagdodorogan.

Oseas 10:1

An Israel nakaagid sa balagon nin ubas na pano nin bunga. Kan magdakul an saiyang bunga, nagdakul man an pinatindog niyang mga altar. Kan mag-orog an bunga kan saiyang daga, orog man na naggayon an ginibo niyang sagradong mga hariging gapo na saiyang sinasamba.

Oseas 12:11

Alagad an pagsamba sa mga dios-dios ginigibo sa Gilead, asin magagadan an mga nagsasamba sainda. Nagsasakripisyo sinda nin mga torong baka sa Gilgal, asin magigin mga tambak nin gapo sa kaawagan an mga altar duman.”

Oseas 9:10

Nagsasabi an Kagurangnan, “Kan manumpongan ko an Israel, nakakaagid iyan sa pakanumpong nin ubas sa desyerto. Kan mahiling ko an saindong mga ginikanan, nakakaagid iyan sa pakahiling kan enot na hinog na bunga nin higera. Alagad kan makaabot sinda sa Bukid nin Peor, nagpoon sinda sa pagsamba ki Baal asin dai nahaloy, nakaarog sinda sa mga makauuyam na mga dios-dios na saindang namotan.