Isaias 51:17 - Marahay na Bareta Biblia

¹⁷ Pagmata, O Jerusalem! Pagmata asin pagbangon! Ininom mo an kalis nin padusa na ipinainom saimo nin Kagurangnan sa saiyang kaanggotan; inubos mo iyan, dangan ika nagsasayasay.

Isaias 51:17 ပူးပေါင်းရင်းမြစ်များ

An Libro ni Job 21:20

Dapat pasanon kan mga nagkasala an saindang padusa; dapat na mamatean ninda an kaanggotan kan Makakamhan na Dios.

Salmo 11:6

Pinapauranan niya nin nagkakalayong mga baga saka asupre an mga maraot; pinapadusahan niya sinda nin nakakapasong doros.

Salmo 60:3

Pinasakitan mo nin makuri an saimong banwaan; pinainom mo kami nin arak kaya kami nagsasayasay.

Salmo 60:5

Huli kan saimong kosog, kami saimong ligtasan; simbaga an samong pamibi, tanganing makaligtas an banwaan na saimong namomotan.

Salmo 75:10

Roronoton niya an kapangyarihan kan mga maraot, alagad dudugangan niya an kapangyarihan kan mga matanos.

Salmo 75:8

Kapot nin Kagurangnan an sarong kalis, pano nin maisog na arak nin saiyang kaanggotan. Iuula niya iyan, asin iinomon kan gabos na tampalasan; iinomon sagkod na maubos.

Isaias 29:9

Magpadagos kamo sa pagigin lolong! Magpadagos kamo sa pagigin sarong buta! Magburat kamo maski mayo nin arak! Magsayasay kamo maski dai nakainom minsan sarong tagdo!

Isaias 40:2

Pakosoga nindo an boot kan mga tawo sa Jerusalem. Sabihi nindo sinda na natapos na an saindang pagtios asin pinatawad na an saindang mga kasalan. Pinadusahan ko na sinda nin doble para sa gabos nindang kasalan.”

Isaias 51:21

Kamo na nagtitios sa Jerusalem, kamo na nagsasayasay na garo kamo mga burat,

Isaias 51:22

sinusurog kamo nin Kagurangnan na saindong Dios asin nagsasabi, “Uya, hinahale ko na sa saindong kamot an kalis nin sakong kaanggotan. Dai na kamo kaipuhan na mag-inom kan arak na sa saindo nakakapasayasay.

Isaias 51:9

Pagmata, Kagurangnan, asin kami saimong tabangan! Gamita an saimong kapangyarihan asin kami ligtasan; gamita iyan siring kan ginibo mo kaidtong panahon. Ika an nagperedaso kan impakto sa dagat na si Rahab.

Isaias 52:1

Pagmata, O Jerusalem! Pagmakosog asin pagin dakula giraray! Banal na syudad nin Dios, sulotan an magagayon mong gubing! Dai na nanggad makakalaog sa saimong mga trangkahan an mga pagano.

Isaias 63:6

Sa labi-labi kong kaanggotan, tinimaktimakan ko an mga nasyon asin rinonot sinda. Inula ko an saindang dugo sa daga.”

Jeremias 13:13

Dangan sabihan mo sinda na ako, an Kagurangnan, an mapano sa gabos na nag-eerok sa dagang ini nin arak sagkod na maburat sinda; sa mga hade, na mga kapagarakian ni David, sa mga padi, sa mga propeta, saka sa gabos na taga Jerusalem.

Jeremias 25:18

Pinainom ko sa kalis an Jerusalem, an gabos na banwa nin Juda, asin an mga hade saka an mga lider ninda tanganing magin sinda sarong desyerto, sarong makangingirhat saka makatatakot na tanawon, dangan tanganing an ngaran ninda gamiton kan mga tawo bilang sarong maldisyon—arog kan ginigibo ninda sagkod ngunyan.

Jeremias 25:27

Dangan tinaraman ako nin Kagurangnan, “Sabihan mo an mga tawo na ako, an Kagurangnan nin mga hukbo, an Dios nin Israel, nagboboot na mag-inom sinda sagkod na maburat saka magsuka, sagkod na matumba saka dai na makatindog, huli kan gera na ipapadara ko sainda.

Jeremias 44:6

Kaya an sakong labi-labing kaanggotan inula ko sa mga banwa nin Juda asin sa mga tinampo nin Jerusalem, saka sinulo ko an mga ini. Naraot asin nagin sarong tanawon na nakakatakot ini sagkod ngunyan.

Zacarias 12:2

“An Jerusalem gigibohon kong arog sa sarong kalis nin arak; mainom an mga nasyon sa palibot niya asin magsasayasay sinda siring sa mga burat. Kun palibotan na ninda an Jerusalem, an mga syudad sa natatada pang kabtang nin Juda mapapalibotan man.

Mateo 20:22

Sinimbag sinda ni Jesus, “Dai nindo aram kun ano an hinahagad nindo. Maiinom daw nindo an kalis na sakong iinomon?” Nagsimbag sinda, “Opo.”

1 Corinto 15:34

Magtoltol kamo saka dai na magkasala. An iba saindo dai nakakamidbid sa Dios. Sinasabi ko ini nganing masopog kamo.

Efeso 5:14

huli ta an anoman na nahahayag, nagigin liwanag, kaya sinasabi, “Pagmata, ika na natotorog, magbangon ka hale sa mga gadan, asin liliwanagan ka ni Cristo.”

Deuteronomio 28:28

Hahampakon kamo nin Kagurangnan sa paagi nin pagkabua, pagkabuta asin pagkaribong.

Deuteronomio 28:34

Mabubua kamo huli kan saindong mga pagtios.

Kapahayagan 14:10

mainom kan arak nin kaanggotan nin Dios—na mayong salak na ibinubo sa kopa nin saiyang kaanggotan. Papasakitan siya sa kalayo saka sa asupre sa atubang kan banal na mga anghel asin kan Kordero.

Kapahayagan 16:19

An dakulang syudad nabanga sa tolong kabtang; narumpag an mga syudad sa gabos na nasyon. Nagiromdoman nin Dios an bantog na Babilonia; pinainom niya ini nin arak sa kopa niya—an arak kan saiyang makuring kaanggotan.

Kapahayagan 18:6

Gibohon nindo saiya an ginibo niya saindo; baloson nindo nin doble an saiyang ginibo. An saiyang kopa panoon nindo nin inomon na doble an isog ki kan inandam niyang inomon para saindo.

Hukom 5:12

Mangenot ka, O Debora, mangenot ka! Mangenot ka sa pagkanta! Mangenot ka, O Barak, aking lalaki ni Abinoam, daraha an saimong mga bihag!