Isaias 35:2 - Marahay na Bareta Biblia

² Maawit saka makurahaw sa kaogmahan an desyerto; magigin magayon iyan siring sa mga Bukid nin Lebanon asin magigin matubang siring sa kaomahan nin Carmelo saka Sharon. Mahihiling kan gabos an kamurawayan nin Kagurangnan, mahihiling ninda an saiyang kadakulaan asin kapangyarihan.

Isaias 35:2 ပူးပေါင်းရင်းမြစ်များ

1 Mga Cronica 16:33

Dangan an mga kahoy sa kadlagan mag-aawit sa kaogmahan sa atubang nin Kagurangnan, huli ta siya minaabot tanganing hukoman an daga.

1 Mga Cronica 5:16

Nag-erok sinda sa teritoryo nin Basan asin Gilead, sa mga banwa duman patin sa mga dagang pasabsaban nin Sharon. (

Salmo 50:2

An Dios nagliliwanag hale sa Sion, an syudad na tunay na ladawan nin kagayonan.

Salmo 72:16

An daga magkaigwa logod nin dakul na kakanon; an kabubuldan matahoban logod nin mga tinanom, magin mabunga siring kan sa Lebanon. An mga syudad mapano logod nin tawo, siring sa kaomahan na pano nin doot.

Salmo 72:19

Omawon sagkod lamang an saiyang mamurawayon na ngaran! An bilog na daga mapano logod kan saiyang kamurawayan. Amen! Amen!

Salmo 89:12

An amihan asin an habagat saimong linalang; an Tabor asin an Hermon maogmang minaomaw kan saimong ngaran.

Salmo 97:6

An kalangitan nagbabareta kan saiyang katanosan, asin an gabos na nasyon nakakahiling kan saiyang kamurawayan.

Exodo 16:7

Sa aga mahihiling nindo an kamurawayan nin Kagurangnan bilang kasimbagan niya sa saindong mga reklamo saiya; huli ta siisay man baya kami na pagreklamohan nindo?”

Awit nin mga Awit 2:1

Saro sana akong burak nin Sharon, sarong lirio kan mga kapantayan.

Awit nin mga Awit 7:5

An saimong payo nakakabaing sa Bukid nin Carmelo. An sinalapid mong buhok nagkikintab arog sa pinong seda; an gayon kaiyan nakakabihag nin hade.

Isaias 25:9

Kun mangyari na ini, masabi an gabos, “Siya an samong Dios! Ibinugtak mi sa saiya an samong pagsarig, asin ilinigtas niya kami. Siya an Kagurangnan! Ibinugtak mi sa saiya an samong pagsarig, asin maogma kami saka magayagaya huli ta ilinigtas niya kami.”

Isaias 27:6

Sa mga maabot na aldaw, an banwaan nin Israel, an mga kapagarakian ni Jacob, magkakaigwa nin gamot arog sa sarong kahoy, asin magsusupang dangan mamumurak sinda. Mapapano kan saindang bunga an bilog na kinaban.

Isaias 32:15

Alagad ipapadara giraray nin Dios sato an saiyang espiritu. An kalangtadan magigin sarong matubang na daga, asin an kaomahan mamumunga nin dakul na ani.

Isaias 33:9

Mayo na nin tinanom an daga asin mayo na nin nag-eerok diyan. Naalang na an kadlagan nin Lebanon, asin nagin siring sa sarong desyerto an matubang na Kapantayan nin Sharon; nagtatakig an mga dahon kan mga kahoy sa Basan asin sa Bukid nin Carmelo.

Isaias 35:10

Magayagaya sindang makakaabot sa Jerusalem, na nag-aawit asin nagkukurahaw sa kaogmahan. Sagkod pa man magigin maogma sinda, sagkod pa man magigin talingkas sinda sa kamondoan asin sa kasakitan.

Isaias 40:5

Dangan mahahayag an kamurawayan nin Kagurangnan, asin mahihiling iyan kan gabos na katawohan. An Kagurangnan mismo an nagtaram kaini.

Isaias 40:9

Jerusalem, sumakat ka sa sarong halangkaw na bukid asin ipahayag mo an marahay na bareta! Magkurahaw ka sa makosog na tingog, Sion; ibalangibog mo an marahay na bareta! Magtaram ka asin dai ka matakot. Sabihi an mga banwa nin Juda, “Uya na an saindong Dios!”

Isaias 41:19

Papataluboon ko sa desyerto an mga sedro, an mga akasya, an mga mirto asin an mga oliba. An kalangtadan gigibohon kong mga kadlagan, kadlagan nin mga aguho, hunipero asin cipres.

Isaias 49:13

Pag-awit, kalangitan! Pagkurahaw sa kaogmahan, kinaban! Mag-arawit logod an kabukidan! Huli ta rarangahon nin Kagurangnan an saiyang banwaan; maheherakan niya an nagtitios niyang banwaan.

Isaias 6:3

Nag-iinapodan sinda nin makusog: “Banal, banal, banal an Kagurangnan nin mga hukbo; an bilog na daga pano kan saiyang kamurawayan.”

Isaias 60:13

“An pinakamarahay na kahoy hale sa kadlagan nin Lebanon, an aguho, an hunipero, asin an sipres dadarahon saimo tanganing pagayonon an sakong Templo, saka an syudad ko.

Isaias 60:19

“An aldaw bako na an magigin ilaw mo sa maghapon o an bulan an magliliwanag saimo sa bilog na banggi. Ako, an Kagurangnan, an saimong magigin liwanag sagkod lamang; an liwanag nin sakong kamurawayan iyo an magigin ilaw mo.

Isaias 60:21

Magigin matanos an saimong namamanwaan, asin sasadirihon ninda an daga sagkod lamang. Ako an nagtanom sainda, an naggibo sainda, tanganing ipahayag ninda an sakong kamurawayan.

Isaias 61:3

tanganing tawan an mga nagmomondo sa Sion nin kaogmahan saka kagayagayahan embes na kamondoan, nin sarong awit nin pag-omaw embes na sarong panambitan. Makakaagid sinda sa mga kahoy na itinanom mismo nin Kagurangnan. Gigibohon ninda an tama, asin oomawon an Dios huli kan saiyang ginibohan.

Isaias 66:10

Mag-ogma kamo kaiba kan Jerusalem; mag-ogma kamo para saiya, kamo gabos na namomoot sa syudad na ini! Mag-ogma kamo ngunyan kaiba niya, kamo gabos na nagmondo para saiya!

Isaias 66:14

Kun mahiling na nindo na nangyayari ini, maoogma kamo; ini an magpapakosog asin magpapataba saindo. Dangan maaaraman nindo na ako, an Kagurangnan, an nagtatabang sa mga nagkukuyog sako, asin ipinapahiling ko an sakong kaanggotan tumang sa sakong mga kaiwal.”

Oseas 14:5

Ako magigin arog sa uran sa sarong mamarang daga para sa banwaan nin Israel. Mamumurak sinda siring sa lirio; magigin pusog an saindang pagkagamot arog sa mga kahoy nin Lebanon.

Habakkuk 2:14

Alagad mapapano an daga kan pakaaram kan kamurawayan nin Kagurangnan siring na pano nin tubig an mga dagat.

Zacarias 10:7

Magigin makosog arog sa mga soldados an banwaan nin Israel, maogma, siring sa mga lalaking nakainom pa sana nin arak. An kapangganahan na ini magigiromdoman kan saindang mga kapagarakian asin maoogma sinda huli kan ginibo nin Kagurangnan.

Juan 12:41

Sinabi ini ni Isaias huli ta nahiling niya an kamurawayan ni Jesus, kaya nagtaram siya dapit saiya.

Juan 17:24

“Ama, mawot ko na sinda man na itinao mo sako makaiba ko kun saen ako, nganing mahiling ninda an kamurawayan na itinao mo sako; huli ta namotan mo ako bago lalangon an kinaban.

Mga Gibo 9:35

Nahiling siya kan gabos na taga Lida saka mga taga Sharon; asin nagtubod man sinda sa Kagurangnan.

Roma 10:15

Paanong ipaghulit nin mga tawo an mensahe nin Dios kun dai man sinda sinugo? Siring sa nasusurat, “Magayon an mga bitis kan nagdadara kan Marahay na Bareta!”

Roma 15:10

Nasasabi pa sa kasuratan, “Mag-ogma kamo, mga pagano, kaiba kan banwaan nin Dios!”

2 Corinto 3:18

Kaya sa sato gabos na mayong tahob an lalawogon masasalming an kamurawayan nin Kagurangnan; an mismong kamurawayan na iyan na gikan sa Kagurangnan na iyo an Espiritu Santo, iyo an minaliwat sato na magin kabaing niya sa orog kadakula pang kamurawayan.

2 Corinto 4:6

An Dios na nagsabi, “An ilaw maliwanag hale sa kadikloman!” Iyo man an Dios na nagtao nin liwanag sa puso ta, tanganing mamidbidan an orog pang kamurawayan na nasa lalawogon ni Cristo.

Josue 19:26

Allam-melec, Amad, saka an Misal. Sa solnopan, an pagdolonan kan daga minaduta sa Carmelo asin sa Sihor-libnat.

Kapahayagan 21:23

Dai na kaipuhan kan syudad an liwanag kan aldaw o kan bulan, huli ta an kamurawayan nin Dios iyo an liwanag kaiyan dangan an Kordero iyo an ilaw.