Isaias 30:17 - Marahay na Bareta Biblia

¹⁷ Madurulag an sangribo saindo pakahiling sa sarong kaiwal, asin lima sanang soldados an kaipuhan tanganing magdurulag kamo gabos. Mayo nin matatada sa saindong hukbo pwera kan solo-solong kahoy na nakakabitan kan bandera sa ibabaw kan bulod.

Isaias 30:17 ပူးပေါင်းရင်းမြစ်များ

Mga Talinhaga 28:1

Nagdudulag an tampalasan maski mayong naglalamag, alagad an matanos maisog arog sa leon.

Isaias 27:11

Aralang asin barari na an mga sanga kan mga kahoy; pinoporot sinda kan mga babae tanganing igatong. Huli ta mayo nin pakasabot an mga tawong ini, dai sinda maheherakan kan Dios na naglalang sainda; dai sinda pahihilingan nin pagkaherak.

Isaias 6:13

Maski mawalat an saro sa sampolo katawo, magagadan man siya; makakaarog siya sa pungo kan pinulak na hamurawon.” (An pungo iyo an tanda kan bagong kapinonan para sa banwaan nin Dios.)

Jeremias 37:10

Maski pa madaog mo an bilog na hukbo nin Babilonia, kun kaya mayo nin matada sainda kundi an mga nalugadan na nasa saindang mga tolda, mabangon an mga lalaking ini saka susuloon ninda an syudad.”

Mga Panambitan 4:19

An mga naglamag samo mas marikas pa ki sa mga agila sa kaitaasan; linamag ninda kami sa kabubuldan, hinipaan ninda kami sa kalangtadan.

Levitico 26:17

Lalabanan ko kamo, kaya madadaog kamo, asin an mga anggot saindo iyo an mahade saindo; madulag kamo maski mayo nin naglalamag saindo.

Levitico 26:36

“Gigibohon kong magkaigwa nin dakulang takot an mga nagkabirihag saindo kaya maski an hinghing kan sarong dahon na hinahayop nin doros makakapadulag na saindo. Madulag kamo na garo linalamag sa gera, asin matutumba kamo maski mayo man nin kaiwal sa harani nindo.

Levitico 26:8

an lima sa saindo makakadaog nin sanggatos asin an sanggatos saindo makakadaog nin sampolong ribo.

Amos 2:14

Dai makakaligtas maski an pinakamarikas na paradalagan; mawawaraan nin kosog an makokosog na mga lalaki, asin dai ikakaligtas kan mga soldados maski an saindang buhay.

Sofonias 3:12

Iwawalat ko sa tahaw nindo an sarong mapakumbabang banwaan na madolok sako sa paghagad nin tabang.

Roma 11:17

Pinurutol an ibang sanga kan tunay na oliba, dangan an sarong sanga kan olibang layas isinugpon sa hawak kan tunay na oliba. Ngunyan an sangang isinugpon nabubuhay sa tagok na hale sa mga gamot kan tunay na oliba. Kamong mga pagano arog kan olibang layas; ngunyan kahiras kamo sa tagok kan mga Judio.

Deuteronomio 28:25

“Ipapadaog kamo nin Kagurangnan sa saindong mga kaiwal. Masalakay kamo sainda hale sa sarong direksyon, alagad madulag kamo pasiring sa gabos na direksyon; mangalas an gabos na tawo sa daga kun mahiling ninda an nangyari saindo.

Deuteronomio 32:30

Kun tano ta an sangribo nadaog nin saro; an sampolong ribo, nadaog nin duwa. Pinabayaan sinda nin Kagurangnan na saindang Dios; isinikwal kan saindang mapangyaring Dios.

Josue 23:10

Maski siisay saindo pwedeng makapadulag nin sangribong tawo, huli ta an Kagurangnan iyo an nakikilaban para saindo, siring sa saiyang panuga.