Isaias 3:3 - Marahay na Bareta Biblia

³ an mga opisyal nin hukbo saka an mga lalaking ginagalangan, an mga parahatol saka an mga salamangkero asin an mga paralumay.

Isaias 3:3 ပူးပေါင်းရင်းမြစ်များ

An Libro ni Job 22:8

Ginamit mo an saimong kapangyarihan asin katongdan tanganing masakop an bilog na daga.

Exodo 18:21

Laen pa kaiyan, magpili ka nin mga tawong maninigo, may pagkatakot sa Dios, mapapaniwalaan asin dai masusuholan. Gibohon mo sindang pamayo nin mga rinibong tawo, ginatos, maningkwenta, asin manampolo.

Exodo 4:10

Alagad nagsabi si Moises, “Hare ako pagsugoa, Kagurangnan. Maluya asin kamol akong magtaram. Dati akong maluyang magtaram poon kaidto sagkod ngunyan na makipag-olay ka sako.”

Isaias 3:2

Hahaleon man niya an mga makosog na tawo saka an mga soldados, an mga hukom saka an mga propeta, an mga parahula saka an mga kamagurangan,

Isaias 3:4

Gigibohon nin Kagurangnan na paghadean sinda nin mga aking lalaki, asin mga omboy an mamamahala sainda.

Isaias 5:13

Kaya dadarahon kamo sa harayo bilang mga bilanggo. Magagadan an saindong mga lider huli sa gutom, asin an ordinaryong mga tawo sa paha.

Isaias 9:15

An mga gurang asin mga ginagalangan na lalaki iyo an payo—asin an mga propeta na nagtutukdo nin kaputikan iyo an ikog!

Deuteronomio 1:15

Kaya linaen ko an pinili nindong mga madonong asin may kakayahan na mga lalaki sa saindong tribu, dangan ibinugtak ko sindang pamayo nindo. An iba namayo sa sangribong tawo, an iba sa sanggatos, an iba sa singkwenta asin an iba sa sampolo. Nagbugtak man ako nin ibang mga opisyal sa mga tribu.

Hukom 8:18

Dangan hinapot ni Gideon si Zeba asin si Zalmunna, “Ano an masasabi nindo sa mga lalaking ginadan nindo sa Tabor?” Nagsimbag sinda, “Kalalawogon mo sinda—an lambang saro garong aki nin sarong hade.”

1 Samuel 8:12

An iba sainda gigibohon niyang mga opisyal nin sangribo katawo, saka an iba mga opisyal nin singkwenta katawo. An iba gigibohon niyang mga paraarado saka paraani; an iba magigin paragibo nin mga armas sa gera, asin mga kagamitan para sa saiyang mga karwahe.