Isaias 26:8 - Marahay na Bareta Biblia

⁸ Sinusunod mi an saimong kabotan asin naglalaom kami saimo; ika an bilog ming kamawotan.

Isaias 26:8 ပူးပေါင်းရင်းမြစ်များ

2 Samuel 23:5

Siring an gigibohon na pagbendisyon nin Dios sa sakong kapagarakian, huli ta guminibo siya sako nin mayong kataposan asin dai mapapatod na tipan, sarong panuga na dai nanggad maliliwat. Huli ta dai daw ako tatabangan nin Dios, asin papangyarihon an gabos kong kamawotan?

Salmo 106:3

Paladan an mga nag-ootob kan saiyang kabotan, an danay na naggigibo nin katanosan.

Salmo 130:5

An kalag ko naghahalat kan tabang nin Kagurangnan; an saiyang tataramon iyo an sakong linalaoman.

Salmo 18:23

Ako nagin matanos sa saiyang atubang, asin linikayan ko an gabos na kasalan.

Salmo 42:2

Napapaha an kalag ko sa buhay na Dios. Nuarin ako makakarani asin makakahiling kan lalawogon nin Dios?

Salmo 65:6

Huli kan saimong kosog, pinapasarig mo an kabukidan; ipinapahiling mo an saimong kapangyarihan.

Salmo 73:25

Ano pa an yaon sako sa kalangitan kundi ika? Mayo akong minamawot sa daga kundi ika.

Salmo 84:2

An sakong kalag napupungaw asin naghihidaw sa mga patyo nin Kagurangnan. An sakong puso asin hawak nag-aawit sa kaogmahan sa Dios na buhay.

Exodo 3:15

Sabihan mo man an mga Israelita na an Kagurangnan, an Dios kan saindang mga ginikanan, ni Abraham, ni Isaac, asin ni Jacob, iyo an nagsugo saimo sa sainda. Iyo ini an sakong ngaran sagkod pa man. Gigiromdomon ako sa ngaran na ini sa gabos na henerasyon.

Awit nin mga Awit 5:8

Magsumpa kamo, mga babae nin Jerusalem, na kun manumpongan nindo an sakong namomotan, sasabihan nindo siyang nanluluya ako sa pagkamoot.

Isaias 12:4

Dangan maawit sinda sa aldaw na iyan: “Magpasalamat kamo sa Kagurangnan! Mag-apod kamo sa saiyang ngaran; ibalangibog nindo sa mga nasyon an saiyang mga gibo, ipahayag nindo an saiyang kadakulaan!

Isaias 24:15

mantang an mga nasa sirangan mag-oomaw saiya. Mag-oomaw sa Kagurangnan, an Dios nin Israel, an mga nag-eerok sa baybayon.

Isaias 25:1

Kagurangnan, ika an sakuyang Dios; gagalangan taka asin oomawon ko an saimong ngaran. Huli ta naggibo ka nin makangangalas na mga bagay; maimbod mong pinapangyari an mga plano na minukna mo kaidto pang panahon.

Isaias 25:9

Kun mangyari na ini, masabi an gabos, “Siya an samong Dios! Ibinugtak mi sa saiya an samong pagsarig, asin ilinigtas niya kami. Siya an Kagurangnan! Ibinugtak mi sa saiya an samong pagsarig, asin maogma kami saka magayagaya huli ta ilinigtas niya kami.”

Isaias 26:13

O Kagurangnan na samong Dios, pinaghadean kami nin iba pwera saimo, alagad ika sana an samong Kagurangnan.

Isaias 30:18

Alagad naghahalat an Kagurangnan tanganing maherakan kamo. Paladan an mga nagsasarig sa Kagurangnan.

Isaias 33:2

Kagurangnan, kaheraki kami. Sa saimo mi ibinugtak an samong paglaom.

Isaias 49:23

An mga hade magigin garo mga ama nindo; an mga reyna garo mga ina nindo. Maduruko sinda sa atubang nindo asin oomawon ninda kamo; mapakumbaba na ipapahiling ninda an paggalang saindo. Dangan maaaraman nindo na ako an Kagurangnan; dai mapapasopog an siisay man na naghahalat kan sakuyang tabang.”

Isaias 51:4

“Pagdangog kamo, sakong banwaan, dangoga nindo an sakong sasabihon: itinatao ko an sakong katukdoan sa mga nasyon; maliliwanagan sinda huli kan sakong mga togon.

Isaias 56:1

Nagsasabi an Kagurangnan sa saiyang banwaan, “Giboha nindo an matanos asin tama, huli ta maabot asin mahahayag na an gigibohon kong pagligtas.

Mikas 4:5

An lambang nasyon nagsasamba saka nagkukuyog kan sadiri nindang dios, alagad sasambahon asin kukuyogon mi an Kagurangnan na samong Dios sagkod lamang.

Mikas 7:7

Alagad maghahalat ako sa Kagurangnan; padagos akong maglalaom sa Dios na maligtas sako. Dadangogon ako kan sakong Dios.

Malakias 4:4

“Giromdoma nindo an katukdoan kan sakong sorogoon na si Moises, an mga togon saka mga pagboot na itinao ko saiya sa Bukid nin Sinai na dapat kuyogon kan gabos na tawo sa Israel.

Mga Bilang 36:13

Iyo ini an mga togon asin pagsusundon na itinao nin Kagurangnan sa mga Israelita sa paagi ni Moises, sa kapatagan nin Moab sa ibong kan Salog nin Jordan hale sa Jerico.

Lukas 1:6

An mag-agom na ini parehong banal; nagkukuyog sinda kan gabos na katogonan asin pagboot nin Kagurangnan.

Mga Gibo 1:4

Kan kaiba pa siya ninda, tinugon niya sinda, “Dai kamo maghale sa Jerusalem. Halaton nindo an ipinanuga kan sakong Ama na sinabi ko saindo.

Roma 8:25

Alagad kun an satong pinaglalaom sarong bagay na dai nahihiling, matinios na hinahalat ta nanggad iyan.

2 Tesalonica 3:5

Antabayan logod kamo nin Kagurangnan pasiring sa pagkamoot nin Dios asin sa pakatagal ni Cristo.