Hukom 14:4 - Marahay na Bareta Biblia

⁴ Dai naisihan kan mga magurang ni Samson na pasabong idto nin Kagurangnan, huli ta naghahanap sana an Kagurangnan nin dahelan tanganing labanan an mga Filisteo. Kan panahon na idto, an mga Filisteo iyo an nakakasakop sa Israel.

Hukom 14:4 ပူးပေါင်းရင်းမြစ်များ

1 Mga Hade 12:15

Kaya dai naghinanyog sa banwaan an hade, huli ta iyo ini an kabotan kan Kagurangnan tanganing maotob an itinaram niya ki Jeroboam na aking lalaki ni Nebat huli ki Propeta Ahias na taga Shilo.

1 Mga Hade 12:24

“Dai nindo pagsalakayon an sadiri nindong kadugo, an banwaan nin Israel. Magbaralik kamo sa saindong harong huli ta kabotan ko an nangyayari.” Nagkuyog sinda gabos sa pagboot nin Kagurangnan; nagpuli sinda sa saindang mga erokan.

2 Mga Hade 6:33

Dai pa haros natatapos an sinasabi ni Eliseo, nag-abot na an sugo saka nagsabi, “An kasakitan na ini dinara samo nin Kagurangnan! Tano ta mahalat pa ako sa Kagurangnan?”

2 Mga Cronica 10:15

Dai dinangog kan hade an mga tawo huli ta kabotan nin Kagurangnan Dios na mangyari ini tanganing maotob an itinaram niya ki Jeroboam na aking lalaki ni Nebat sa paagi kan propetang si Ahias na taga Shilo.

2 Mga Cronica 22:7

An pagdalaw na ini ni Ahazias ki Joram iyo an ginamit nin Dios na paagi tanganing mangyari an pagbagsak ni Ahazias. Huli ta kan yaon duman ki Joram si Ahazias, sinabat sinda kan aking lalaki ni Nimsi, na an ngaran Jehu, an lalaki na pinili nin Kagurangnan na magtunaw kan pamilya ni Ahab.

2 Mga Cronica 25:20

Alagad habong magdangog si Amazias. Kabotan nin Dios na madaog si Amazias huli ta nagsamba ini sa mga dios-dios nin Edom.

Salmo 115:3

An samong Dios yaon sa kalangitan, ginigibo niya an anoman na saiyang magustohan.

Daniel 6:4

Huli kaini pinagparahingowa kan ibang mga parapamahala saka kan mga gobernador na makakua nin ikakasumbong laban ki Daniel dapit sa saiyang pagpalakaw kan imperyo, alagad mayo sindang nakukua, huli ta maimbod si Daniel asin dai naggigibo nin sala o nandadaya.

Deuteronomio 28:48

Huli kaiyan, paglilingkodan nindo an mga kaiwal na ipapadara saindo nin Kagurangnan. Magugutom kamo, mapapaha, magigin huba, asin magkukulang sa gabos na bagay; aapihon kamo nin makuri kan Kagurangnan sagkod na kamo magadan.

Josue 11:20

Ginibo nin Kagurangnan na maigot sindang makipaglaban sa mga Israelita tanganing ronoton sinda asin gadanon na mayo nin pagkaherak. Iyo ini an ipinagboot nin Kagurangnan ki Moises.

Hukom 13:1

Nagkasala na naman sa Kagurangnan an mga Israelita kaya tinugotan nin Kagurangnan na sakopon sinda kan mga Filisteo sa laog nin kwarentang taon.

Hukom 14:5

Kaya nagpasiring sa Timna si Samson kaiba an saiyang ama asin ina. Kan mag-agi sinda sa ubasan duman, nadangog ni Samson an ungal nin sarong ogbon pang leon.

Hukom 15:11

Kaya nagduman sa lungib sa ampas nin Etam an tolong ribong kalalakihan sa Juda dangan sinabihan si Samson, “Dai mo naaaraman na an mga Filisteo iyo an kagsakop sato? Ano ining ginibo mo samo?” Nagsimbag si Samson, “Ginibo ko sana sainda an ginibo ninda sako.”

Hukom 15:3

Nagsabi si Samson, “Sa ginibo nindong iyan, dai ako nindo mababasol kun ano an gibohon ko sa mga Filisteo.”