Habakkuk 2:18 - Marahay na Bareta Biblia

¹⁸ Anong karahayan an makukua sa sarong ladawan? Sarong bagay man sana iyan na ginibo nin tawo, asin mayo iyan nin sinasabi kundi kaputikan. Anong karahayan an makukua diyan kan naggibo kaiyan kun pagsarigan niya iyan—sarong dios-dios na dai ngani nakakataram!

Habakkuk 2:18 ပူးပေါင်းရင်းမြစ်များ

Salmo 97:7

Sinosopog an gabos na nagsasamba sa mga ladawan, na naghahambog kan saindang mga dios na mayo nin halaga; gabos na dios minaduko sa atubang niya.

Isaias 1:31

Siring na an dagami nasusulo kan manok-manok nin kalayo, mapapahamak man an mga mapangyaring mga tawo huli kan saindang maraot na gibo asin mayo nin makakaontok kan saindong pagkaraot.

Isaias 37:38

Sarong aldaw, kan nagsasamba siya sa templo kan saiyang dios na si Nisrok, ginadan siya kan duwa niyang aking lalaki na si Adrammelek asin Sarezer, dangan nagdulag an mga ini sa daga nin Ararat. Si Esarhadon na saro pa niyang aking lalaki an nagsalihid saiya bilang emperador.

Isaias 40:19

Bako siya arog sa dios-dios na ginigibo nin mga tawo, na pinapatos nin bulawan kan mga panday asin ibinababaw sa patungtongan na plata.

Isaias 41:26

Siisay saindo an nagsabi na mangyayari ini, tanganing masabi mi na tama siya? Mayo ni saro saindo na nagtaram dapit kaini; mayo man lamang nin nakadangog na kamo nagtaram!

Isaias 42:17

Masosopgan an gabos na nananarig sa mga dios-dios, asin an mga nag-aapod sa mga ladawan bilang saindang mga dios.”

Isaias 44:12

An panday sa metal minakua nin sarong pedasong metal dangan binabaga iyan sa kalayo. Dangan pinupulpog niya iyan nin martilyo asin nagkakaigwa iyan nin porma huli kan makokosog niyang braso. Mantang nagtatrabaho, nagugutom siya, napapaha asin napapagal.

Isaias 45:16

An mga naggigibo nin mga ladawan mapapasopog asin mawawaraan nin onra.

Isaias 45:20

Nagsasabi an Kagurangnan, “Magtiripon kamo asin madya, mga namamanwaan kan mga nasyon, kamo gabos na nagkatarada kan marumpag an imperyo; dumolok kamo sa hukoman! An mga tawong nagpaparada kaiba an saindang mga ladawan na kahoy asin namimibi sa mga dios-dios na dai makakaligtas sainda— an mga tawong iyan mayong naaaraman!

Jeremias 10:8

Gabos sinda mangmang saka lolong. Ano an naaadalan ninda sa kahoy na mga dios?

Jeremias 16:19

Kagurangnan, ika an nag-iingat sako asin nagtataong kosog; tinatabangan mo ako sa panahon nin kasakitan. Hale sa mga poro kan kinaban madolok saimo an mga nasyon saka masabi, “An mga dios kan samong mga ginikanan gabos mayong halaga.

Jeremias 2:8

An mga padi dai naghapot, ‘Haen an Kagurangnan?’ Dai ako midbid kan sadiri kong mga padi. Nagrebelde sako an mga pamayo; an mga propeta nagpropesiya sa ngaran ni Baal, saka nagsamba sa mga ladawan na mayo nin halaga.

Jeremias 50:2

“Ipahayag mo an bareta sa mga nasyon! Ipaisi mo! Pumatindog ka nin bandera asin ibalangibog mo an bareta! Dai mo iyan pagtagoon! Nagbagsak na an Babilon! Ronot na an saiyang dios-dios na si Marduk! Pinasopog an mga dios-dios nin Babilon; nagkaparasa an makauuyam niyang mga ladawan!

Jeremias 51:17

Sa atubang kaini, mamamatean nin tawo na siya sarong mangmang saka mayo nin pakaaram; mapapasopog an lambang panday na naggigibo nin mga ladawan, huli ta an mga dios-dios niyang ini bakong totoo saka mayo nin buhay.

Daniel 5:23

kundi ilinangkaw mo an saimong sadiri tumang sa Kagurangnan nin langit. Ipinakua mo an mga bulawan na kagamitan na sinamsam sa Templo tanganing pag-inoman mo, kan mga iginagalang na lalaki sa palasyo, kan saimong mga agom asin kan saimong mga kasaroan patin inomaw mo an mga dios na gibo sa bulawan, plata, bronse, lansang, kahoy, saka gapo—mga dios na dai nakakahiling o nakakadangog asin dai nakakaaram nin anoman. Dai mo ginalangan an Dios na nagkakapot kan saimong buhay asin nakakaaram kan gabos mong ginigibo.

Amos 2:4

Nagtataram an Kagurangnan, “Paulit-ulit na nagkasala an mga taga Juda, asin huli kaiyan, papadusahan ko sinda. Tinalikodan ninda an sakong mga katukdoan asin dai inotob an sakong mga pagboot. Linagalag sinda kan parehong mga dios-dios na pinaglingkodan kan saindang mga ginikanan.

Jonas 2:8

An mga nagsasamba sa mayong halagang mga ladawan dai nagin tunay na maimbod saimo.

Zacarias 10:2

Nakikihumapot an mga tawo sa mga dios-dios saka sa mga parahula, alagad kaputikan asin mayong halagang mga simbag an saindang nakukua. An iba nagpapahayag nin mga pangatorogan, alagad linalagalag sana ninda kamo; mayo nin halaga an itinatao nindang karangahan. Kaya nagkakaralagalag an mga tawo arog sa nawawarang mga karnero. Nagtitios sinda huli ta mayo sinda nin pamayo.

Roma 6:21

Alagad anong karahayan an nakua nindo sa paggibo kan mga bagay na idto na ngunyan ikinakasopog nindo? An bunga kan mga bagay na idto, kagadanan!

1 Corinto 12:2

Aram nindo na kan kamo bako pang mga paratubod, nadara kamo sa manlaen-laen na paagi nin pagsamba sa mga dios-dios na mayong buhay.

Kapahayagan 19:20

Nabihag an hayop, kaiba an bakong tunay na propeta na nagpahiling nin mga milagro sa atubangan kan hayop. (Huli kan mga milagrong idto nadaya niya idtong mga may marka kan hayop saka an mga nagsamba sa ladawan kan hayop.) An hayop dangan an bakong tunay na propeta parehong itinapok na buhay duman sa danaw nin naglalaad na asupre.

Hukom 17:4

Kan ibalik ni Micas an kwarta sa saiyang ina, nagkua ini nin duwang gatos na pedasong plata asin itinao sa sarong platero na guminibo nin dios-dios na inukit hale sa kahoy asin pinatos nin plata. An dios-dios ibinugtak sa harong ni Micas.

1 Samuel 12:21

Dai kamo magsamba sa mga dios-dios na dai makakatabang o makakaligtas saindo, huli ta bako sinda an totoong Dios.