Exodo 29:3 - Marahay na Bareta Biblia

³ Ibugtak mo iyan gabos sa sarong basket dangan idolot mo sako kaiba an torilyong baka saka an duwang lalaking karnero.

Exodo 29:3 ပူးပေါင်းရင်းမြစ်များ

Exodo 29:2

Gamiton mo an pinakamarahay na arinang trigo, alagad mayo nin lebadura, asin gumibo ka nin mga tinapay na igwang lana, nin mga tinapay na mayong lana, asin nin maninipis na biskwit na linahidan nin lana.

Exodo 29:4

“Ipag-iba mo si Aaron saka an saiyang mga aking lalaki sa may pintoan kan Tabernakulo dangan karigoson mo sinda duman.

Levitico 8:2

“Ipag-iba mo si Aaron saka an saiyang mga aking lalaki duman sa may pintoan kan Tabernakulo, asin darahon mo man an mga gubing na sa padi, an panlahid na lana, an torilyong baka para sa dolot sa kasalan, an duwang lalaking karnero, sagkod an basket nin tinapay na mayo nin lebadura.

Levitico 8:26

Dangan hale sa basket nin tinapay na mayo nin lebadura na idinolot sa Kagurangnan kuminua siya nin sarong tinapay, saka sarong tinapay na igwang lana, asin sarong biskwit. Dangan ibinugtak niya an mga iyan sa ibabaw kan taba asin kan toong hurihan na bitis kan hayop.

Levitico 8:31

Sinabihan ni Moises si Aaron saka an mga aki kaini, “Daraha nindo an karne duman sa may pintoan kan Tabernakulo, labonan nindo asin kakanon kaiba kan tinapay na nasa basket na dolot para sa ordenasyon sosog sa ipinagboot nin Kagurangnan.

Mga Bilang 6:17

Idodolot niya sa Kagurangnan an lalaking karnero bilang dolot para sa katoninongan, kaiba an basket nin tinapay na mayo nin lebadura, an dolot na pagkakan asin an dolot na inomon.