Deuteronomio 9:1 - Marahay na Bareta Biblia

¹ “Paghinanyog kamo, banwaan nin Israel! Ngunyan na aldaw babalyohon nindo an Salog nin Jordan asin sasakopon an daga na pagsadiri kan mga nasyon na mas dakula asin mapangyari ki sa saindo. Darakula an saindang mga syudad na napapalibotan nin mga kudal na nakakaabot na sa langit.

Deuteronomio 9:1 ပူးပေါင်းရင်းမြစ်များ

Genesis 11:4

Dangan nagsabi sinda, “Gumibo kita nin sarong syudad, na igwa nin tore na abot sa langit, tanganing mabantog kita asin dai magkasiriblag sa bilog na kinaban.”

Exodo 32:1

Kan mareparo kan mga Israelita na haloy nang dai naghihilig sa bukid si Moises nagdolok sinda ki Aaron dangan nagsabi, “Dai mi aram kun ano na an nangyari sa Moises na iyan na nangenot samo pagluwas sa Egipto; kaya igibo mo kami nin sarong dios na mangengenot samo.”

Daniel 4:11

Nagtalubo an kahoy asin nagin pusog, sagkod na nakaabot iyan sa langit asin pwedeng mahiling kan gabos sa bilog na kinaban.

Amos 2:9

“Alagad, banwaan ko, huli saindo kun kaya pinuho ko an mga Amoreo, an mga lalaking arog kahalangkaw sa mga sedro asin arog kakosog sa mga hamurawon.

Mga Bilang 13:22

Nagduman ngona sinda sa habagat na parte kan daga nin Canaan dangan sa Hebron, saen nag-eerok an mga kamaganakan ni Ahiman, ni Sesai asin ni Talmai, an kapagarakian kan sarong rasa nin mga higante na inaapod Anakim. (Pinatindog an Hebron mga pitong taon bago mapatindog an Zoan sa Egipto.)

Mga Bilang 33:51

an minasunod na mga katukdoan para sa mga Israelita: “Kun magbalyo na kamo sa Jordan pasiring sa daga nin Canaan,

Deuteronomio 1:28

Tano na magduman kita? Tinakot kita kan satuyang mga sinugo na nagsasabing darakula saka haralangkaw ki sa sato an mga tawo duman, asin nag-eerok sinda sa mga syudad na an kudal abot sa langit. Nakahiling sinda nin mga higante duman!’

Deuteronomio 11:23

Dangan sa pagdangadang nindo, papahaleon niya an gabos na nasyon, tanganing masakop nindo an daga na sadiri kan mga nasyon na mas darakula asin mas mapangyari ki sa saindo.

Deuteronomio 11:31

Madali na nindong balyohon an Salog nin Jordan asin sakopon an dagang itinatao saindo nin Kagurangnan na saindong Dios. Kun masadirihan na nindo an daga asin mag-erok na kamo duman,

Deuteronomio 27:2

Sa aldaw na makabalyo kamo sa Salog nin Jordan asin makalaog sa daga na itinatao saindo nin Kagurangnan na saindong Dios, magtambak kamo nin mga darakulang gapo, na saindong sesementohon sa palibot,

Deuteronomio 3:18

“Sinabihan ko sinda kaidto, ‘Itinao saindo nin Kagurangnan na satong Dios ining daga tanganing saindong sakopon. Ngunyan tawan nindo nin armas an saindong mga parapakilaban asin ipadara nindo sa ibong kan Jordan, tanganing mangenot sa ibang mga tribu nin Israel asin tabangan sinda sa pagsakop kan saindang daga.

Deuteronomio 4:1

Dangan sinabihan ni Moises an mga tawo, “Kuyogon nindo an gabos na togon asin pagboot na itinutukdo ko, tanganing mabuhay kamo asin masadirihan nindo an daga na itinatao saindo nin Kagurangnan, an Dios kan saindong mga ginikanan.

Deuteronomio 4:38

Sa pagdangadang nindo, pinahale niya an mga nasyon na mas makosog asin mapangyari ki sa saindo, tanganing palaogon niya kamo dangan paerokon sa saindang daga, na nasasadirihan nindo ngunyan.

Deuteronomio 6:10

“Siring sa ipinanuga nin Kagurangnan na saindong Dios sa saindong mga ginikanan, ki Abraham, ki Isaac sagkod ki Jacob, tatawan niya kamo nin daga na igwa nin mga darakula asin magagayon na mga syudad na bakong kamo an nagtugdok,

Deuteronomio 7:1

“Dadarahon kamo nin Kagurangnan na saindong Dios duman sa dagang sasakopon nindo, asin papahaleon niya duman an dakul na banwaan. Sa pagdangadang nindo, aalawon niya an pitong nasyon na orog na dakula asin mapangyari ki sa saindo: an mga Heteo, Gergeseo, Amoreo, Cananeo, Perezeo, Heveo, asin Jebuseo.

Josue 1:11

liboton an bilog na kampo asin sabihan an mga tawo, “Mag-andam kamo nin mga pagkakan, huli ta sa laog nin tolong aldaw mabalyo kamo sa Salog nin Jordan tanganing sakopon an dagang itinatao saindo nin Kagurangnan na saindong Dios.”

Josue 1:15

sagkod na masakop ninda an dagang nasa solnopan kan Jordan, daga na itinatao sainda nin Kagurangnan na saindang Dios. Kun an gabos na tribu nin Israel tawan na kan Kagurangnan nin kapahingaloan, pwede na kamong magbalik digdi asin mag-erok sa daga na nasa sirangan kan Jordan, daga na itinao saindo ni Moises na sorogoon nin Kagurangnan.”

Josue 14:12

Kaya itao mo sako ngunyan an mabulod na daga na ipinanuga sako nin Kagurangnan kan aldaw na ako asin an mga kairiba ko nagpahayag manongod sa ginibo ming pagsiyasat. Sinabihan mi kamo kaidto na an rasa kan mga higanteng Anakim yaon duman sa mga syudad na napapalibotan nin kudal. Tibaad ibahan ako nin Kagurangnan, asin mapahale ko sinda siring sa itinaram nin Kagurangnan.”

Josue 3:14

Tig-anihan kaidto, asin baha an salog. Kan maghale sa kampo an mga Israelita tanganing magbalyo sa Jordan, nagpaenotan sainda an mga padi na dara an Kaban nin Tipan. Pagtungtong kan mga padi sa salog,

Josue 3:16

nag-ontok sa pagbulos an tubig asin nagtambak sa harayong lugar, duman sa Adam, an syudad na kataed kan Zaretan. Nag-ontok sa pagbulos paibaba an tubig na pasiring sa Gadan na Dagat, asin nakabalyo harani sa Jerico an mga tawo.

Josue 3:6

Dangan sinabihan niya an mga padi na pasanon an Kaban nin Tipan asin mag-enot sa mga tawo. Sinunod siya ninda.

Josue 4:19

Nagbalyo sa Jordan an mga tawo kan ikasampolong aldaw kan enot na bulan, asin nagkampo sinda sa Gilgal, sa sirangan nin Jerico.

Josue 4:5

asin sinabihan, “Magduman kamo sa Jordan, sa enotan kan Kaban nin Tipan nin Kagurangnan na saindong Dios. An lambang saro saindo magpasan nin gapo na kukuahon nindo duman, saro para sa lambang tribu kan Israel.