Deuteronomio 8:18 - Marahay na Bareta Biblia

¹⁸ Giromdoma nindo na an Kagurangnan na saindong Dios iyo an nagtao saindo nin kakayahan tanganing magyaman kamo. Ginibo niya ini huli ta sagkod ngunyan maimbod siya sa tipan na sinumpaan niya sa saindong mga ginikanan.

Deuteronomio 8:18 ပူးပေါင်းရင်းမြစ်များ

1 Mga Cronica 29:12

Sa saimo gikan an gabos na kayamanan asin kaomawan; ika an hade kan gabos. Nasa saimo an kapangyarihan asin kosog; ika an nagtatao nin kadakulaan asin kosog sa gabos.

2 Mga Cronica 25:9

Hinapot ni Amazias an propeta, “Alagad ano an gigibohon nyamo sa mga plata na itinandan mi sa hukbo nin Israel? Nagsimbag an propeta, “Mas dakul pa kaiyan an itatao saimo nin Kagurangnan.”

Salmo 144:1

Pag-omawon an Kagurangnan, sakong gapo na sinasarigan, sa pakigera ako saiyang tinutukdoan, sa pakilaban ako saiyang inaandam.

Salmo 44:3

Bakong huli sa saindang espada napasainda an daga; bakong huli sa saindang kosog nakamtan an panggana; kundi huli sa too mong kamot asin takyag patin sa liwanag kan lalawogon mo; huli ta sinda nawilihan mo.

Mga Talinhaga 10:22

An bendisyon nin Kagurangnan nakakapayaman, asin dai niya iyan dinadagdagan nin kamondoan.

Parahulit 12:1

Kaya giromdoma nindo an saindong Kaglalang mantang hoben pa kamo, bago umabot an mga maraot na aldaw saka mga taon na masabi kamo, “Dai na ako naoogma sa buhay.”

Parahulit 9:11

Nahiling ko man na sa kinaban na ini, bakong an gabos na marikas iyo an nanggagana sa karera; an mga maiisog dai man danay na nanggagana sa gera; bakong an gabos na madonong iyo an nagkakaigwa nin ikabubuhay; bakong an gabos na may abilidad an nagkakaigwa nin kayamanan; bakong an gabos na eksperto an nagkakamit kan haralangkaw na katongdan. An kadimalasan nangyayari sa kiisay man.

Jeremias 23:27

Naghohona sinda na an sinasabi nindang mga pangatorogan magigin dahelan kan pagkalingaw sako kan banwaan ko, siring na nalingaw sako an saindang mga ama asin nagdolok ki Baal.

Oseas 2:8

Dai niya nanggad aakoon na ako an nagtao saiya nin trigo, arak, lana nin oliba, asin kan gabos na plata saka bulawan na ginamit niya sa pagsamba ki Baal.

Deuteronomio 26:10

Kaya ngunyan, dinadara ko sa Kagurangnan an mga enot na bunga kan mga tinanom sa daga na itinao niya sako.’ “Pakasabi kaiyan, ibugtak nindo an basket sa atubang kan altar, dangan magsamba kamo sa Kagurangnan.

Deuteronomio 6:11

nin mga harong na pano nin mga bagay na marahay na dai man nindo ilinaog, asin nin mga bubon na dai man nindo kinalot, nin mga ubas saka mga oliba na dai man nindo itinanom. Kun darahon na kamo nin Kagurangnan sa dagang iyan, asin kun igwa na kamo kan gabos na boot nindong kakanon,

Deuteronomio 7:12

“Kun dangogon nindo asin kuyogon an mga togon na ini, ootobon nin Kagurangnan na saindong Dios an saiyang tipan asin ipapahiling niya saindo an saiyang danay na pagkamoot na ipinanuga niya sa saindong mga ginikanan.

Deuteronomio 7:8

Alagad namotan kamo nin Kagurangnan asin boot niyang otobon an panuga niya sa saindong mga ginikanan. Ini an dahelan kun tano ta huli kan saiyang mapangyaring kamot, ilinigtas niya kamo asin binalukat sa kaoripnan sa kamot kan hade nin Egipto.

Deuteronomio 8:1

“Maimbod na kuyogon nindo an gabos na togon na itinao ko saindo ngunyan tanganing mabuhay asin magdakul kamo, patin masadirihan nindo an dagang ipinanuga nin Kagurangnan sa saindong mga ginikanan.

Hukom 3:7

Nalingawan nin Israel an Kagurangnan na saindang Dios; nagkasala sinda saiya asin nagsamba sa mga Baal sagkod sa mga Asera.

Hukom 7:2

Nagtaram an Kagurangnan ki Gideon, “Dakul nin marahay para sako an saimong mga tawohan tanganing tawan ko sinda nin kapangganahan laban sa mga Midianita. Tibaad isipon nindang nanggana sinda huli sa sainda man sana, asin bakong huli sa tabang ko.

1 Samuel 2:7

An iba saiyang pinapangagin dukha, an iba mayaman; an iba saiyang ibinababa, an iba ilinalangkaw.