2 Mga Cronica 34:5 - Marahay na Bareta Biblia

⁵ An mga tolang kan paganong mga padi tinutong niya sa ibabaw kan mga altar na pinagsambahan ninda. Huli sa paggibo kan gabos na ini, nalinigan niya an Juda saka an Jerusalem.

2 Mga Cronica 34:5 ပူးပေါင်းရင်းမြစ်များ

1 Mga Hade 13:2

Dangan sa pagkuyog kan kabotan nin Kagurangnan, nagkurahaw an propeta laban sa altar: “O altar, iyo ini an itinataram nin Kagurangnan: ‘Sarong aking lalaki, na Josias an magigin ngaran, an mamumundag sa pamilya ni David. Isasakripisyo niya sa ibabaw mo an mga padi na naglilingkod sa paganong mga altar na nagdodolot nin mga sakripisyo sa ibabaw mo; tututongon niya sa ibabaw mo an mga tolang nin tawo.’”

2 Mga Hade 23:16

Dangan nangalag-kalag si Josias asin nahiling niya an nagkapirang lulubngan sa bulod; ipinakalot niya an mga tolang asin ipinatutong sa altar. Sa paaging ini binasang-basang niya an altar, sosog sa itinaram nin Kagurangnan sa paagi kan saiyang propeta. Nakahiling pa si Josias nin sarong lulubngan,

2 Mga Hade 23:20

Ipinagadan niya an paganong mga padi sa ibabaw kan mga altar na pinaglingkodan ninda. Dangan nagtutong siya nin mga tolang nin tawo sa lambang altar. Pakatapos, nagbalik siya sa Jerusalem.

2 Mga Cronica 34:33

Sa gabos na lugar na sadiri kan banwaan nin Israel, rinaot ni Josias an makauuyam na mga ladawan kan mga dios-dios, dangan sa gabos na aldaw nin saiyang pagkabuhay, pinagbotan niya an mga tawo na maglingkod sa Kagurangnan, an Dios nin saindang mga ginikanan.

2 Mga Cronica 34:7

Ginaba niya an mga altar asin an mga tanda kan diosang si Asera, rinonot siring sa alpog an ladawan kan mga dios-dios saka rinaot an gabos na altar nin insenso sa bilog na daga nin Israel. Pakatapos, nagbalik siya sa Jerusalem.

Jeremias 3:10

Pagkatapos kan gabos na ini, an Juda, an bakong maimbod na tugang nin Israel, nagsagin-sagin na nagbalik sako alagad bakong tudok sa puso an saiyang pagbalik. Ako, an Kagurangnan, an nagtaram.”

Jeremias 4:14

Jerusalem, hugasa an karatan sa saimong puso, tanganing makaligtas ka. Sagkod nuarin ka mag-iisip nin maraot?

Ezekiel 22:24

“Aki nin tawo, taraman mo an mga Israelita na bako nang banal an saindang daga, kaya papadusahan ko iyan sa sakuyang kaanggotan.

Mga Bilang 35:33

Kun gibohon nindo iyan, didigtaan nindo an dagang pinag-eerokan nindo; huli ta an paggadan nakakadigta sa daga. Kaya pwera kan paggadan sa kriminal mayo na nin ibang paagi tanganing matubos an daga na nabulosan nin dugo kan biktima.