2 Mga Cronica 33:14 - Marahay na Bareta Biblia

¹⁴ Pakatapos kaini, nagtugdok si Manases nin sarong panluwas na kudal para sa Syudad ni David, sa parteng solnopan, poon sa kapantayan na harani sa Burabod nin Gihon sagkod sa Trangkahan nin Sira asin sa palibot kan syudad nin Ofel. Pinahalangkaw niya an panluwas na kudal na ini asin nagbugtak siya nin mga opisyal nin hukbo sa gabos na pinapusog na syudad nin Juda.

2 Mga Cronica 33:14 ပူးပေါင်းရင်းမြစ်များ

1 Mga Hade 1:33

nagsabi an hade, “Ipag-iba nindo an sakong mga opisyal; pasakayon nindo an aki kong si Solomon sa sadiri kong mula asin ibahan nindo siya pasiring sa burabod nin Gihon.

1 Mga Hade 1:45

dangan linahidan siya ni Zadok saka ni Natan duman sa burabod nin Gihon bilang hade. Inibahan ninda si Solomon pabalik sa syudad asin nagkukururahaw sa kaogmahan an mga tawo. Iyan an ribok na nadangog mo.

2 Mga Cronica 17:19

Naglingkod an mga ini sa hade sa Jerusalem, laen pa kan mga soldados na ibinugtak kan hade sa pinapusog na mga syudad sa bilog na Juda.

2 Mga Cronica 27:3

Ipinatugdok niya an Trangkahan sa Amihan kan Templo asin ipinatrabaho niya an sarong kabtang kan kudal kan syudad sa lugar na inaapod Ofel.

2 Mga Cronica 32:30

An Ezekias na ini iyo an nagsulat kan agihan nin tubig na hale sa Burabod nin Gihon dangan pinabulos niya an tubig pasiring sa solnopan na parte kan Syudad ni David. Nagin mauswag si Ezekias sa gabos niyang gibo.

2 Mga Cronica 32:5

Pinakosog kan hade an syudad sa paagi nin paghirahay kan kudal, pagtugdok nin mga tore sa ibabaw kan kudal, asin pagtugdok nin saro pang panluwas na kudal. Laen pa kaini, hinirahay man niya an mga depensa na itinugdok sa lugar na tambakan nin daga sa sirangan na parte kan lumang kabtang nin Jerusalem. Nagpagibo man siya nin dakul na armas saka mga kalasag.

Nehemias 12:39

Hale duman inagihan mi an Trangkahan ni Efraim, an Daan na Trangkahan, an Trangkahan nin Sira, an Tore ni Hananel, asin an Tore kan Sanggatos, dangan nagpasiring kami sa may Trangkahan kan Karnero. Nag-ontok kami sa may trangkahan pasiring sa Templo.

Nehemias 3:3

An kamaganakan ni Hassenaa iyo an naghirahay kan Trangkahan nin Sira. Ibinugtak ninda an mga kahalabaan asin an mga trangkahan sa tamang lugar dangan ibinugtak man ninda an mga barat saka mga bisagra kaini.

Isaias 32:14

Maski an palasyo babayaan kan mga nag-eerok diyan asin an pangenot na syudad babayaan kan mga namamanwaan. An mga bulod saka an mga bantayan magigin mga erokan nin mga lalaw na hayop, sarong kaogmahan para sa mga lalaw na asno asin sarong pasabsaban para sa mga hayop.

Sofonias 1:10

“Sa aldaw na idto,” an sabi nin Kagurangnan, “madadangog nindo an paghibi sa Trangkahan nin Sira sa Jerusalem. Madadangog nindo an inagrangay sa bagong kabtang kan syudad asin an dakulang ribok nin pagkarumpag sa kabubuldan.