2 Mga Cronica 29:27 - Marahay na Bareta Biblia

²⁷ Dangan nagboot si Hadeng Ezekias na idolot sa altar an mga tinutong na atang. Pagpoon kan pagdolot, nag-awit nin pag-omaw sa Kagurangnan an mga tawo, kasabay an tanog kan mga trompeta asin kan ibang mga instrumento nin musika.

2 Mga Cronica 29:27 ပူးပေါင်းရင်းမြစ်များ

1 Mga Cronica 16:42

Si Heman saka si Jedutun iyo an mamahala kan mga trompeta, mga gimbal asin iba pang mga instrumento na gagamiton para sa mga banal na awit. An mga aking lalaki ni Jedutun iyo an mamamahala kan mga trangkahan.

2 Mga Cronica 20:21

Pakatapos niyang makihumapot sa mga tawo, pinagbotan niya an mga maawit nin pag-omaw sa Kagurangnan na magsulot kan gubing na pangpyesta, dangan pangenotan an hukbo mantang nag-aawit nin siring: “Omawon an Kagurangnan, huli ta an saiyang pagkamoot nagdadanay sagkod pa man.”

2 Mga Cronica 23:18

An mga padi asin an mga Levita iyo an ginibo ni Jehoiada na parapamahala kan trabaho sa Templo. Katongdan ninda na kuyogon an pagboot ni Hadeng David asin magdolot nin mga tinutong na atang sa Kagurangnan, sosog sa nasusurat sa Katogonan ni Moises. Sinda man an parapamahala kan musika asin kan mga selebrasyon.

2 Mga Cronica 29:28

Nagsamba an bilog na katiriponan, mantang padagos an pag-awit saka an pagtugtog sagkod na matutong an gabos na sakripisyo.

2 Mga Cronica 30:21

Pitong aldaw na maogmang pinagselebrar kan mga tawo na nagtiripon sa Jerusalem an Pyesta kan Tinapay na mayo nin Lebadura. Sa bilog na kosog, aroaldaw na nag-omaw sa Kagurangnan an mga Levita saka mga padi.

2 Mga Cronica 7:3

Kan mahiling kan bilog na Israel an kalayo na naghilig hale sa langit asin an kamurawayan nin Kagurangnan na nakapano sa Templo, nagdapa sinda, nagsamba saka nagpasalamat sa Kagurangnan, huli kan saiyang pagkamarahayon asin pagkamoot na daing kataposan.

2 Mga Cronica 7:6

Nagtirindog an mga padi sa lugar na ipinanongod sainda, asin nakatindog na atubang sainda an mga Levita, na nag-omaw sa Kagurangnan sa paagi kan saindang mga instrumento dangan inawit ninda an imnong, “An Saiyang Pagkamoot Mayo Nin Kataposan,” sosog sa ipinagibo sainda ni David. Pinatanog kan mga padi an mga trompeta mantang nakatindog an gabos na tawo.

Salmo 136:1

Magpasalamat kamo sa Kagurangnan, huli ta siya marahayon; an saiyang pagkamoot mayo nin kataposan.