1 Samuel 26:21 - Marahay na Bareta Biblia

²¹ Nagsimbag si Saul, “Nagkasala ako. Magbalik ka David, aki ko! Dai na ako mag-iisip na gadanon ka, huli ta dai mo ako ginadan ngunyan na banggi. Nagin lolong ako, asin dakula an ginibo kong karatan!”

1 Samuel 26:21 ပူးပေါင်းရင်းမြစ်များ

2 Mga Hade 1:13

Nagsugo giraray an hade nin sarong opisyal na may kaibahan na singkwentang soldados. Nagtukad sa bulod an opisyal, nagluhod sa atubang ni Elias, dangan nakimaherak, “Sorogoon nin Dios, nakikimaherak ako saimo, pahalagahan mo logod an sakong buhay asin an buhay kan sakong mga soldados.

2 Mga Hade 1:14

An duwang opisyal na naenot sako asin an saindang mga soldados ginadan kan kalayong hale sa langit; alagad kaherakan mo ako!”

Salmo 116:15

Makulog para sa Kagurangnan kun nagagadan an saro kan saiyang mga banal!

Salmo 49:8

huli ta an kabayadan kan buhay nin tawo dakulang gayo, asin an ibabayad niya dai nanggad magkakanigo,

Salmo 72:14

An saindang buhay tinutubos niya sa kaapihan asin sa kadahasan; an saindang dugo mahalaga para saiya.

Exodo 9:27

Ipinaapod kan hade si Moises saka si Aaron asin sinabihan, “Ngunyan nagkasala ako, an Kagurangnan iyo an tama. Ako asin an sakong banwaan an sala.

Mga Bilang 22:34

Nagsimbag si Balaam, “Nagkasala ako. Dai ko aram na nakatindog ka sa dalan tanganing olangon ako; alagad kun sa paghona mo maraot para sako an magpadagos, mapuli na ako.”

Mateo 27:4

Nagsabi siya, “Nagkasala ako! Pinasaluiban ko an sarong tawong mayong sala!” Alagad nagsimbag sinda, “Ano an labot mi kaiyan? Problema mo na iyan!”

1 Samuel 13:13

Sinimbag ni Samuel si Saul, “Sala an ginibo mo; dai mo kinuyog an togon na itinao saimo nin Kagurangnan na saimong Dios. Kun nagkuyog ka, kutana tinugotan ka asin an saimong kapagarakian na maghade sa Israel sagkod lamang.

1 Samuel 15:24

Nagsimbag si Saul, “Nagkasala ako; dai ko kinuyog an kabotan nin Kagurangnan asin an saimong katukdoan. Natakot ako sa mga tawo, kaya sinunod ko an saindang kamawotan.

1 Samuel 15:30

“Nagkasala ako,” an simbag ni Saul. “Maski siring, pahilingan man giraray sa mga lider kan sakong banwaan asin sa bilog na Israel na ginagalangan mo ako. Mag-iba ka sako tanganing makapagsamba ako sa Kagurangnan na saimong Dios.”

1 Samuel 18:30

Minaabot an mga hukbo kan mga Filisteo tanganing makilaban; alagad sa lambang gera, orog na mapanggana si David ki sa arin man na opisyal ni Saul. Kaya orog na nagin bantog si David.

1 Samuel 24:17

Nagsabi pa si Saul ki David, “Mas matanos ka ki sa sako. Ginibohan mo ako nin karahayan, mantang karatan an ginibo ko saimo!

1 Samuel 26:22

Nagsimbag si David, “Uya an saimong garod, Mahal na Hade; ipakua mo sa saro kan saimong mga tawohan.

1 Samuel 26:24

Siring na pinahalagahan ko an saimong buhay ngunyan na aldaw, pahalagahan man logod nin Kagurangnan an sakong buhay; irayo niya logod ako sa gabos na karatan!”

1 Samuel 27:4

Kan mabaretaan ni Saul na nagdulag si David pasiring sa Gat, nag-ontok na siya sa paghanap ki David.