1 Samuel 14:18 - Marahay na Bareta Biblia

¹⁸ Sinabihan ni Saul an pading si Ahias, “Daraha digdi an Kaban nin Tipan.” (Kan panahon na idto, an Kaban nin Tipan nin Dios yaon sa kaibahan kan mga Israelita.)

1 Samuel 14:18 ပူးပေါင်းရင်းမြစ်များ

2 Samuel 11:11

Nagsimbag si Urias, “Nasa gera an kalalakihan nin Israel saka Juda, asin an Kaban nin Tipan yaon sa kaibahan ninda; an sakong pamayo na si Joab, siring man an saiyang mga opisyal nagkakampo sa kahiwasan. Mapuli daw ako sa sakong harong tanganing magkakan, mag-inom, asin magdorog sa sakong agom? Sa ngaran kan gabos na banal, isinusumpa ko na dai ko iyan magigibo!”

Mga Bilang 27:21

Magsasarig siya sa pading si Eleazar na makakaaram kan sakong kabotan para saiya huli sa paggamit kan Urim asin Tummim. Sa paaging ini gigiyahan ni Eleazar si Josue asin an bilog na komunidad sa gabos nindang gigibohon.”

Hukom 20:18

Nagduman an mga Israelita sa lugar na pinagsasambahan sa Betel asin naghapot sinda sa Dios, “Arin sa mga tribu an enot na masalakay sa mga Benjaminita?” Nagsimbag an Kagurangnan, “An tribu ni Juda.”

1 Samuel 14:17

Kaya sinabihan ni Saul an saiyang mga tawohan, “Bilanga nindo an satong mga tawohan asin aramon nindo kun siisay an mayo digdi.” Binilang asin naaraman ninda na mayo duman si Jonatan dangan an hoben na paradara kan saiyang armas.

1 Samuel 14:36

Dangan sinabihan ni Saul an saiyang mga tawohan, “Magrulugsot kita dangan salakayon ta an mga Filisteo sa banggi; samsaman ta sinda sagkod mag-aga asin gadanon ta sinda gabos.” Nagsimbag an mga tawo, “Giboha an pinaghohona mong marahay.” Alagad nagsabi an padi, “Hapoton ta ngona an Dios.”

1 Samuel 23:9

Kan maaraman ni David na nagpaplanong salakayon siya ni Saul, sinabihan niya an pading si Abiatar, “Daraha digdi an efod.”

1 Samuel 5:2

Ilinaog ninda an Kaban sa templo kan saindang dios na si Dagon asin ibinugtak sa kataed kan estatwa kaini.

1 Samuel 7:1

Kaya nagduruman an mga taga Kiriat-jearim asin kinua ninda an Kaban nin Tipan. Dinara ninda ini sa harong ni Abinadab, na nag-erok sa sarong bulod. Kinonsagra ninda an aki niyang lalaki na si Eleazar tanganing iyo an mangataman kan Kaban nin Tipan nin Kagurangnan.