1 Samuel 14:15 - Marahay na Bareta Biblia

¹⁵ Nagkatarakot an gabos na Filisteo sa saindang namumugtakan; tinarakigan an mga parasalakay saka an mga soldados na nasa kampo huli sa takot; naglinog an daga, asin nagkaigwa nin dakulang kariribokan.

1 Samuel 14:15 ပူးပေါင်းရင်းမြစ်များ

Genesis 35:5

Kan magpoon na sindang maglakaw, natakot nin marahay an mga tawong nag-eerok sa mga syudad sa palibot ninda, kaya dai sinda linamag kan mga ini.

2 Samuel 5:24

Kun madangog mo na an pagmamartsa sa alitoktok kan mga kahoy na balsamo, magsalakay ka, huli ta ako an mangengenot saindo sa pagdaog kan hukbo kan mga Filisteo.”

An Libro ni Job 18:11

“Sa palibot niya naghahalat an kahandalan; nagsusunod ini saiya saen man siya magduman.

Salmo 14:5

Alagad sinda gabos magkakatarakot, huli ta kaibahan nin Dios an mga matanos.

Exodo 19:18

Napatos nin aso an bukid huli ta naghilig duman an Kagurangnan sa porma nin kalayo. Nag-itaas an aso arog sa aso nin sarong horno asin naglinog nin makosog an bilog na bukid.

Daniel 5:6

Nanlongsi an hade asin natakot nin marahay kaya nagtakig an saiyang mga tuhod.

Mateo 24:6

Makakadangog kamo nin ralaban saka mga huringhuding dapit sa gera. Alagad dai kamo mahandal, huli ta kaipuhan mangyari an mga bagay na ini, alagad bako pa iyan an kataposan.

Josue 2:9

asin nagsabi sainda, “Naaaraman ko na itinao saindo nin Kagurangnan an dagang ini. Natatakot saindo an gabos na nag-eerok digdi.

Hukom 7:21

Dai sinda nagharale sa saindang natitindogan sa palibot kan kampo, asin an bilog na hukbo kan saindang kaiwal nagdaralagan na nagkukurahaw.

1 Samuel 13:17

Nagruluwas sa saindang kampo an mga Filisteo sa tolong grupo tanganing magsalakay: an sarong grupo nagpasiring sa Ofra sa teritoryo nin Sual;

1 Samuel 13:18

an saro nagpasiring sa Bet-horon, asin an saro nagpasiring sa pagdolonan na minadungaw sa kapantayan nin Zeboiim asin sa kalangtadan.

1 Samuel 13:23

Nagpadara nin sarong grupo nin mga soldados an mga Filisteo sa dalan nin Micmas tanganing bantayan idto.

1 Samuel 14:14

Sa ralaban na idto, si Jonatan asin an saiyang kaiba nakagadan nin haros beynteng Filisteo sa lugar na an kahiwasan arog sa pang-apat na parte nin sarong ektarya.

1 Samuel 14:16

Nahiling kan mga tawohan ni Saul na nagbabantay sa Gibea sa teritoryo ni Benjamin an mayong direksyon na pagdalagan kan mga Filisteo.

1 Samuel 7:10

Mantang idinodolot ni Samuel an atang, nagpadagos sa pagsalakay an mga Filisteo; alagad nagdaguldol sa makosog na tingog an Kagurangnan laban sa mga Filisteo kan aldaw na idto. Nagkarilibong sinda asin nagdurulag sa takot.