1 Mga Cronica 11:10 - Marahay na Bareta Biblia

¹⁰ Iyo ini an bantog na mga soldados ni David, kaiba an bilog na Israel, na nagtabang saiya sa pagigin hade, siring sa ipinanuga nin Kagurangnan; pinakosog ninda an kahadean ni David.

1 Mga Cronica 11:10 ပူးပေါင်းရင်းမြစ်များ

2 Samuel 3:21

Sinabihan ni Abner si David, “Maduman na ako asin titiponon ko sa sakong kagurangnan, na hade, an bilog na Israel, tanganing makipagtipan sinda saimo. Aakoon ka ninda bilang hade asin mapapasaimo an gabos na minawot mo; sasakopon mo an bilog na daga.” Kaya pinalakaw ni David si Abner asin huminaleng matoninong si Abner.

1 Mga Cronica 11:3

Kaya nagduman ki Hadeng David sa Hebron an gabos na kamagurangan nin Israel. Nakipagtipan siya sa sainda sa atubangan nin Kagurangnan, asin linahidan ninda si David bilang hade nin Israel, siring sa ipinanuga nin Kagurangnan sa paagi ni Samuel.

1 Mga Cronica 12:21

Naglingkod sinda ki David bilang mga opisyal kan saiyang hukbo, huli ta gabos sinda mga bantog na soldados; nagin sindang mga opisyal sa hukbo kan mga Israelita.

1 Mga Cronica 12:23

Kan nasa Hebron si David, dakul na soldados na gabos andam sa pakilaban, an nag-ayon sa saiyang hukbo tanganing tabangan siyang magin hade na masalihid ki Saul, siring sa ipinanuga nin Kagurangnan. An bilang ninda iyo an minasunod: hale sa tribu ni Juda: seis mil otso syentos na mga soldados, gabos armado nin kalasag asin garod; hale sa tribu ni Simeon: syete mil syen na makokosog na mga soldados; hale sa tribu ni Levi: kwatro mil seis syentos na mga soldados; dai pa kabilang digdi an mga parasunod ni Joaida, na kapagarakian ni Aaron, na an bilang minaabot sa tres mil syete syentos. Dai pa man kabilang digdi an beynte y dos na mga opisyal, na mga kadugo ni Zadok, sarong hoben na paralaban; hale sa tribu ni Benjamin (an tribung ginikanan ni Saul): tres mil na mga soldados (kadaklan sa mga tawohan ni Benjamin nagdanay na maimbod ki Saul); hale sa tribu ni Efraim: beynte mil otso syentos na mga soldados, gabos bantog sa saindang sadiring kamaganakan; hale sa tribu ni Manases sa Solnopan: dyes y otso mil na mga soldados, na napili tanganing magduman ki David asin gibohon siyang hade; hale sa tribu ni Issakar: dos syentos na mga lider, kaiba an mga tawohan na nasasakopan ninda; (aram kan mga lider na ini kun ano an dapat gibohon nin Israel sa tamang panahon); hale sa tribu ni Zabulon: singkwenta mil na maimbod asin mapapaniwalaan na mga soldados, gabos andam sa paggamit nin anoman na armas; hale sa tribu ni Neftali: sangribo na mga lider, kaiba an treynta y syete mil na mga lalaking armado nin mga kalasag asin mga garod; hale sa tribu ni Dan: beynte otso mil seis syentos na mga soldados, gabos armado sa pakilaban; hale sa tribu ni Aser: kwarenta mil na mga soldados na andam sa pakilaban; hale sa mga tribu sa sirangan kan Jordan—Ruben, Gad, asin Manases sa Sirangan: syento beynte mil na mga soldados na gabos andam sa paggamit nin anoman na armas.

1 Mga Cronica 12:38

An mga soldados na ini, gabos andam sa pakilaban, nagduman sa Hebron na pano nin pagmawot na gibohon na hade si David kan bilog na Israel. Siring man an iba pang mga taga Israel nagkasararo sa katuyohan na ini.

1 Mga Cronica 12:39

Tolong aldaw sinda sa kaibahan ni David, nagkakan asin nag-inom kan inandam para sainda kan saindang mga kahimanwa.

1 Mga Cronica 27:1

Iyo ini an lista kan mga Israelita, na pamayo nin mga pamilya, saka an mga lider nin mga kamaganakan, asin an saindang mga opisyal na nagpalakaw kan trabaho sa kahadean. Lambang bulan kan taon, igwa nin sarong grupo na namamahala; lambang grupo igwa nin beynte y kwatro mil na kaayon, na nasa irarom kan pamamahala nin sarong pamayo.

1 Mga Cronica 28:1

Tiniripon ni David sa Jerusalem an mga opisyal nin Israel, an mga opisyal kan mga tribu, an mga pamayo kan mga grupong naglilingkod sa hade, an mga opisyal nin mga rinibo saka mga ginatos, an mga administrador kan gabos na rogaring saka mga hayop kan hade saka kan saiyang mga aking lalaki, dangan an gabos na opisyal, an makokosog na mga lalaki asin an mga bantog na paralaban.

1 Samuel 16:1

Tinaraman nin Kagurangnan si Samuel, “Sagkod nuarin ka magmomondo para ki Saul? Isinikwal ko na siya bilang hade nin Israel. Panoa nin lana an saimong laogan asin magduman ka sa Betlehem, sa sarong lalaki na an ngaran Jesse, huli ta pinili kong magin hade an saro kan saiyang mga aking lalaki.”