Pyno waku eweiwat hawyi eweikatꞌi katꞌi ikuap ehepiat hamuat kat e som mekewat miwan saꞌawyꞌi wuat aimuꞌe hawiat hap e. -Pyno atikyꞌesat wyti miitꞌin woꞌokyꞌe haria wo tukupteꞌen hap katupono eihũria emiium uhepiat hap sese neꞌi yt ehewaku i. Kat pote ariot mesuwe yi kape yt nakuaria i kape. Yt ariot i wyti uito waku rakat e haria kape.
Wiripu 3:9 - Sateré-Mawé9 Koitywy atikuap taꞌyn uito yt naku i rakat. Atikuap taꞌyn yt karãpe i atipuẽti uhehakyeraꞌat hap uhewaku hap kaipyi. Katupono yt arewaku kuap i uito are. Yt karãpe i atikyiꞌat kuap uhehakyeraꞌat hap uiminug wakuap saꞌup mo. Tupana ainapin hap koꞌi koitywy atimohey Iesui. Miꞌi hawyi wẽtup miit piit ewy watopyhuꞌat. Miꞌi hawyi Iesui ewaku hap topyhuꞌat uiatno yt uiat pykai i maꞌato Iesui watno. Miꞌi yn waku koitywy Tupana uimoewaku raꞌyn atimohey Haꞌyru hawyi. အခန်းကိုကြည့်ပါ။ |
Wiripu 3:9
56 ပူးပေါင်းရင်းမြစ်များ
Saꞌawyꞌi Tupana toꞌe miwan me -Uimohey haria yn ni aru uimiehakyeraꞌat nuaria e. Miꞌiria yn uimimoieineꞌen wuatꞌi eꞌat piatnuaria e. Nimo pyi mesup te Tupana timoewaku Tosaꞌyru mohey haria yn. Pywo ti rat worohoꞌonug eipe wakuap Uiꞌewy uimohey hawyi e Tupana nimo te miwan me. Mesup te wy mio tã e -Uhaꞌyru mohey haria yn atiꞌatumoieineꞌen wuatꞌi eꞌat pe e wuatꞌi ywania pe. Uiwyriaꞌin pyno waku yne eꞌat watuwemoheg ahepiat Iesui mohey hap ete. Imohey haria sese pe Tupana toꞌe -Uiwanetup hawe uipyꞌa pe eiperia yn wakuaria e.
Miꞌi hawyi yt naku i nug hap upi yn watopyhuꞌat. Yt watoiat kuap i aiminug saꞌag iꞌewyte yt watoiat teran i. -Miꞌi tã etunug mote ekuꞌuro hap topyhuꞌat e Tupana pykai watunug teꞌen teꞌen neꞌi pote. Miꞌi hawyi aiminug saꞌag kaipyi aiꞌauka hap topyhuꞌat. Maꞌato aiꞌapiheg hap eꞌyian mete putꞌok e Aipotypot Iesui mesuwe aiꞌapiheg hap tutuꞌu yne tokuꞌuro hamo. Miꞌi pote aimoieineꞌen wuatꞌi eꞌat pe. Yt nakuaria i kahato aito pykai Tupana aikyꞌe. Koitywy aikyꞌe pote watopyhuꞌat hemiitꞌin no imikyꞌesat ewy watunug neran mesuwe. Imipoꞌoro Iesui aimohãpyk hawyi yt Atãu wat i aito maꞌato Iesui wat watoineꞌen wuatꞌi eꞌat pe. Pywo ti rat atiwan ewowi.
Saꞌawyꞌi Tupana ainapin kahato Muisei upi. -Miꞌi tã waku etunug e. Miꞌi tã yt naku i etunug e maꞌato mekewat eꞌat yt watunug kuap i imikyꞌesat koꞌi katupono aimikyꞌesat saꞌag aipyhyp kahato inug hap ete. Miꞌi hawyi Tupana piat ainapin hap yt aimohãpyk kuap i yt watunug i pote. -Pyno atimohãpyk miꞌiria e Tupana tuwepe. Miꞌi toꞌe hawyi toipoꞌoro Tosaꞌyru sese. Putꞌok e hawyi aiꞌewy ipiit Miit kahato Miꞌi. Toiꞌaparap kuap aito ewy wen maꞌato yt toiꞌaparap hin i. Yt karãpe i tutunug saꞌag. Toiꞌakit kahato tomikyꞌesat saꞌag nug hamuat -Yt atunug i e tuwepe. Miitꞌin mikyꞌesat saꞌag toiꞌakit yne. Miit no tuwenug hawyi aiꞌapiheg hap tutuꞌu yne ariaꞌyp posak ete.
Aito ti Aipotypot Iesui mohey haria pote Tupana ainug Tosaꞌyru wywo wẽtup miit ewy. Saꞌawyꞌi yt aiweꞌeg hin i pykai mesup aiweꞌeg kahato katupono Iesui amyãtym toineꞌen aipiit pakup we hawyi Iesui weꞌeg hawuo wahewyry mesup. Saꞌawyꞌi yt ahehay kuap i Tupana wywo maꞌato mesup Iesui wẽ aipiit pe pote ahehay kuap kahato Tupana wywo. Koitywy watoineꞌen Iesui piit ewy mesuwarote. Miꞌi pote watopyhuꞌat Tupana saꞌyruꞌin koꞌi Tupana sakiꞌytꞌin koꞌi mesuwe. Miꞌi pote watopyhuꞌat Tupana ywania ewywuat mesuwe.
Aikaꞌiwat Iesui yt karãpe i inug saꞌag watoꞌe. -Taꞌi Uhaꞌyru waku sakpo e Tupana. Maꞌato miꞌi pykai Tupana tiꞌapiheg aiminug saꞌag upi. Aiminug saꞌag yne iꞌokpe tote toineꞌen kahato iꞌauka hap. Miꞌi hawyi Iesui topyhuꞌat yt naku i nug hat ewy aiminug saꞌag topiit tote hawyi. Yt towat tominug saꞌag hap upi Tupana tiꞌapiheg Iesui maꞌato aiwat aiminug saꞌag upi tohoꞌopot kahato. Miꞌi watomohey hawyi Tupana ainug wakuat sese rakaria Tosaꞌyru suu aikoho hawyi. Tosaꞌyru ewaku hap totopag ahepe. Waku pe watoineꞌen Tupana wanetup hawe watoꞌe wuatꞌi ywania pe aikope aikope aipoꞌoro hap upi Tosaꞌyru haipepiatno.
Maꞌato koitywy watikuap taꞌyn wẽtup eko mio tã e -Aheko nug hap kaipyi neꞌi yt tuut i ahehakyeraꞌat hap e hap watikuap. Taꞌi yt Iuteuria i eko nug hap kaipyi hin i toineꞌen ahehakyeraꞌat hap e. Taꞌi Tupana wanetup hawe ahewaku hap yt tuut i aiꞌywania eko nug hap kaipyi neꞌi hap watikuap mesup Iesui e hap ewy. Taꞌi mekewat waĩꞌe hap watunug yne pykai yt ahewaku kuap i e Tupana mesup are. Mesup Uhaꞌyru Iesui mohey hap kaipyi yn ni worohoꞌomohãpyk kuap e Tupana ahepe mesup are. Koitywy ti watomohey raꞌyn Iesui Tupana Mipoꞌoro Aiporekuat nuat aito imohey kahato haria are. Koitywy watikuap taꞌyn yt uwe i tuwehakyeraꞌat kuap teko waku nug hap kaipyi neꞌi hap watikuap Peteru are. Watikuap taꞌyn aikotã Aikaꞌiwat Iesui yn ahehakyeraꞌat kuap hat topyhuꞌat hap watikuap Peteru are.
Miꞌi turan atunug yne yne iꞌatuwoꞌonapin hap koꞌi Tupana waĩꞌe hap koꞌi paĩ. Miꞌi hawyi areineꞌen poꞌog iraniaꞌin kai iꞌatuꞌakag wo yne uhesaika hap wywo. Atiꞌatusatyꞌi satyꞌi kahato Iesui mohey haria saꞌawyꞌi. Atunug yne uruꞌywania mikyꞌesat ewy. Yt kat i urueko etiat iꞌaparap hap atunug. Yne uruꞌywania waĩꞌe hap atunug yne urueꞌaseꞌi urunapin saꞌawyꞌi wuat hap atunug yne. Iꞌewyte yne urunapin hap atunug. Yne miꞌi koꞌi nug hap aimoewaku kuap Tupana wanetup hawe pote waku pe areineꞌen mekewat eꞌat pe maꞌato yt pykai i. Yt uinug waku hin i Tupana wanetup hawe mekewat eꞌat pe. Yt atikuap hin i Tupana miꞌi turan.
Tupana ahehakyeraꞌat hawyi ainug temiitꞌin wo. Yt aiwanetup kahu hap upi i yt ahewaku hap upi i maꞌato tomikyꞌesat no tegyiꞌat hap oktan ahehakyeraꞌat wuatꞌi eꞌat piat aikotã Tupana toꞌe nimo saꞌawyꞌi tutunug yne wuatꞌi hap yian mete -Atiꞌatuehakyeraꞌat ti aru Uhaꞌyru mohey haria e Iesui etiat hap ewy.
Taꞌi Tupana yn ti Ahehakyeraꞌat kuap hat. Aito ti yt watiꞌatuehakyeraꞌat kuap hin i aiwewi. Iꞌewyte aiminug wakuap koꞌi ti yt putꞌok e i ahehakyeraꞌat hamuat kyiꞌat hamo. Tepiat ahehakyꞌeꞌi hap kaipyi yn ti Tupana ahehakyeraꞌat kuap. Iꞌewyte aiminug saꞌag ipit pit kahato hap koꞌi Tupana yn ikoho kuap. Iꞌewyte ti tutum ahepe Topaꞌãu Wakuat Sese raꞌyn. Miꞌi hawyi ti tosaꞌyruꞌin no tosakiꞌytꞌin no ainug Topaꞌãu wo. Miꞌi hawyi ti koitywy ipakup i rakaria wo raꞌyn watoineꞌen. Tupana tunug ni tuweran miꞌi tã hap ahetiat tuwepyi.
Pyno atipytꞌatnug uhehay Tupana Uito pote e. Pywo yt uwe i imonik kuap uiꞌe hap -Atunug aru Tupana e hap Tupana iꞌe pote. Tupana yt heso kuap i miꞌi pote waku watomohey kahato miꞌi tã -Atunug aru e hap koꞌi. -Urumowepiit hat kahato En Tupana watoꞌe. Ewowi uruteput wanikaptia pupi. Urutopytyk kahato ehay -Atunug aru eꞌe hap. Pyno typy toꞌe -Atunug aru e hap koꞌi. Typy tohenoi tehay ahepe.
Pyno torannia aito iꞌaparap haria watoineꞌen. Maꞌato ahehay wo ahẽku wo yt watiꞌaparap i pote yt karãpe i saꞌag nug hatno watoineꞌen katupono aipyꞌa piat aiwanetup hap moherep hap ahehay topyhuꞌat. Karãpe yt watiꞌaparap i ahehay wo pote hãpyk pe kahato watoineꞌen aheineꞌen hap tote. Ahehay hãpyk takat watunug kuap pote watuwepoꞌoro kuap yne aipiit wakuap nug hamo.
Uito ti Peteru Aipotypot Iesui eropat hat sese uito. Uito Iesui mipoꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria napin hat uito. Aimimohey ikahu rakat moherep hat uito. Hekat kahato rakaria ewywuaria watukupteꞌen katupono imohey hap saꞌup iwato kahato hap ewy topyhuꞌat imohey hap kaipyi. -Uhaꞌyru mohey haria ti eipe uiwanetup hawe uipyꞌa pe e Tupana ahepe. Miꞌi pote atum yne wakuat ehepe e Tupana.
ကြော်ငြာတွေ