Wiripu 3:2 - Sateré-Mawé2 Eiweꞌeg wo kahato o saꞌag nug haria pupi katupono ehãꞌãg aru saꞌag nug hamo are. Eiweꞌeg wo o wẽtup muap moherep haria pupi. Eiweꞌeg wo o yt eiwemusin ãpy sokpe tek hep i pote yt kat i ehehakyeraꞌat hap e haria pupi. Miꞌiria pupi eweikenꞌẽ kahato aikotã awahuru sem pupi watokenꞌẽ hap ewy katupono eimaꞌat reran saꞌag nug hap etiat haype. Yt naku i kahato miꞌiria. အခန်းကိုကြည့်ပါ။ |
Wiripu 3:2
31 ပူးပေါင်းရင်းမြစ်များ
Miꞌi hawyi toꞌe Iesui itotiaria pe -Uimimuꞌeria e eiweꞌeg wo o mekewat Tupana ehay moherep yt pywuat piat i haria wywo e. -Uruimohey kahato Tupana iꞌatuꞌe pykai yt Tupana ehay ewy i taꞌatumoherep -Uruto ti Tupana hũria eiꞌewywuaria te iꞌatuꞌe pykai eimaꞌat teran haype neꞌi uimohey ehepiat hap moma teran haype i aikotã awahuru koꞌi tuꞌu teran aihũria hap ewywuaria neꞌi tukupteꞌen eipyꞌasetpe eimuꞌe hamo e.
Yt ewetum neiꞌo wakuat Tupana ehay awareria ewywuaria haiwot rakaria pe iꞌatumiꞌu wo katupono ewetum mote ti aru teꞌeruwemorem naꞌyn ehekatuꞌu hamo. Iꞌewyte yt eweiporokpun neiꞌo ehewahi ikahu rakat ewywuat Tupana ehay hamuat koꞌi eꞌyian kai katupono ti aru eweiporokpun pote ti aru taꞌatuꞌakit akit hawyi taꞌatumopit pit kahato neꞌi raꞌyn. Katupono ti miꞌiria Tupana ewanikap sese tukupteꞌen mote.
-Pyno Tupana mipoꞌororia sese uruto iꞌatuꞌe ehepe maꞌato yt pywo pe i iꞌatuꞌe ehepe miꞌi tã maꞌato eimaꞌat reran haype. Taꞌi teꞌeruwepoꞌoro eiꞌakag wo teꞌeroꞌe hamo -Taꞌi 12 ok takaria ewywuat koꞌi uruto iꞌatuꞌe. Aikaꞌiwat Iesui potmuꞌeria koꞌi uruto iꞌatuꞌe eimaꞌat reran haype. Iesui urupoꞌoro ehewowi iꞌatuꞌe ehepe yt pywo pe i iꞌatueso neꞌi.
Uiwyriaꞌin Tupana tum ahepe tesaika hap wakuap nug hamo aimikyꞌesat oktan nuat hamuat nug hamo. Maꞌato yt naku i -Uimikyꞌesat ewywuat yn aru atunug watoꞌe neꞌi pote yt naku i paĩ are. Katupono uiꞌairo raꞌyn tomikyꞌesat nug hamuat tupono waku watoꞌe. Yt naku i aimikyꞌesat yn watunug. Katupono towat tomikyꞌesat nug hamo aiꞌairo aiwoꞌopowyro woꞌokyꞌe hamuat etiat hap.
Maꞌato Aikaꞌiwat Iesui ahehakyeraꞌat teran haype Tupana yt tuwanetup hin i mekewat seko aiwemusin ãpy sokpe tek hap kape neꞌi. Maꞌato toiehakyeraꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimohãpyk kuap wuatꞌi ywania katupono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toineꞌen sio yt watikyꞌe i hap kape yn taꞌakasa.
Aikotã saꞌawyꞌi areꞌe hap areꞌe i -Iꞌatueiam sese ti aru aria are katupono iꞌatuetupana sese iꞌatumikyꞌesat koꞌi miꞌu kape yn iꞌatuwanetup hap mesuwarotiat kape yn iꞌatuwanetup hap. Taꞌatuekat hap kape yn iꞌatuwanetup hap. Miꞌi hawyi yt naku i kahato taꞌatunug maꞌato taꞌatunug hawyi yt teꞌeruwemoti hin i inug te turan. -Waku nug haria uruto iꞌatuꞌe maꞌato iꞌatueiam ti aru aria kawiat.
Aito yt miꞌiria mohey haria hin i katupono Tupana Paꞌãu sese aipiit pe Aipotypot Iesui mimoieineꞌen aito pote waku kahato Iesui waku kahato Iesui e haria aito. Maꞌato iraniaꞌin ahemusin ãpy sokpe tek hap ete yn miꞌiria iꞌatuehay. Yt watiꞌatumohey hin i miꞌiria katupono wẽtup kawiat aito Iesui mohey haria. Wẽtup ywania ewy yn watopyhuꞌat katupono Tupana titek taꞌyn aiminug saꞌag sio toĩ ahemusin ãpy sokpe sio yt. Pyno Tupana miehakyeraꞌat koꞌi raꞌyn aito katupono imohey haria aito pote.
Uhaꞌyru atimoheg kahato o epiat Iesui mohey hap aikotã enapin hap kape erewanetup kahato. Miꞌi hawyi etunug ewanetup hap kaipyi wakuap erenapin hap oktan katupono tukupteꞌen epyꞌasetpe yt naku i nug haria. Saꞌawyꞌi miꞌiria Iesui mohey haria tukupteꞌen maꞌato taꞌatupun naꞌyn Iesui mohey hap taꞌatukawiat. Miꞌiria ti tukupteꞌen hoꞌowasat rakaria ewywuaria aikotã aheꞌyara apyꞌat hap yt watipuẽti i raꞌyn hap ewywuaria miꞌiria tukupteꞌen yt kat i poꞌog Iesui mohey hap mio iꞌatukai.
Miꞌiria -Uruikuap Tupana iꞌatuꞌe wen maꞌato iꞌatuminug koꞌi yt Tupana mohey haria minug ewy hin i katupono hemarakꞌa poityꞌi iraniaꞌin ete. Yt uwe ehay upi i miꞌiria teꞌeropyhuꞌat teran. Iꞌewyte yt kat i iꞌatuminug wakuap heremo. Yt taꞌatuhepapꞌi wakuap nug hap paĩ -Uruikuap kahato Tupana iꞌatuꞌe pykai. Miꞌi tã hap ewy miꞌiria.
Koitywy tuwehytꞌok tuereto aipyꞌasetpe Tupana mohey hap pun haria. Yt Tupana motypot rakaria i miꞌiria are. Miꞌiria aipyꞌasetpe tukupteꞌen maꞌato yt naku i nug hamuat aimaꞌat hamo tõꞌẽ ahowawi. Miꞌiria ti Tupana Saꞌyru yt kuap i haria. Miꞌiria ti aikotã Tupana ehay enoi haria teꞌeroꞌe saꞌawyꞌi te hap ewy. Mio tã iꞌatuꞌe -Tuut wyti aru eimaꞌat hanuaria sese e miwan me. Miꞌiria wyti aru uimiꞌatuꞌapiheg wuatnuaria teꞌeropyhuꞌat wuatꞌi eꞌat piat nuaria e Tupana miwan me miꞌiria etiat hap nug haria. Miꞌiria ti yt kat i uimotypot hap iꞌatuwanetup hawe haria e. Miꞌi haria wyti aru tuwehytꞌok wehytꞌok eipyꞌasetpe uimotypot yat pe yt naku i nug hamo e. Miꞌiria Tupana e hap ewy -Taꞌi waku ti watunug saꞌag aimikyꞌesat ewywuat iꞌatuꞌe. Waku ahewaire waire kahato iꞌatuꞌe aru are. Taꞌi Tupana yt aiꞌapiheg hin i katupono ti aikyꞌe kahato Tupana iwese kahato rakat pote iꞌatuꞌe aru aimuꞌe saꞌag neꞌi. Yt naku i watunug Tupana Mipoꞌoro Aipotypot no iꞌatuꞌe aru miꞌiria e saꞌawyꞌi te Tupana miwan me eimaꞌat reran haria etiat.
Uimohey haria tawa Simina piaria worohoꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap ewehoꞌopot uhetiatno hap e. Atikuap aikotã hoꞌopot kahato popuo eipotpap uimikyꞌesat nug hap ete. Satek takaria eweikupteꞌen maꞌato uiwanetup hawe hekat kahato rakaria wuatꞌi eꞌat piaria eweikupteꞌen e. Iꞌewyte atikuap aikotã itotiaria tukupteꞌen hap eiꞌatusatyꞌi satyꞌi kahato haria e. Atikuap aikotã uruto yn ni Tupana kuap haria katupono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌatuehay saꞌag wo ehepe. Yt Tupana emiitꞌin hin i miꞌiria maꞌato ahiag motypot yat piaria miꞌiria e. Yt Iuteu ywania hin i maꞌato ahiag ywania saꞌag tukupteꞌen miꞌiria Iuteu ywania ran neꞌi koꞌi e.
Maꞌato iraniaꞌin teꞌerokenꞌẽ uimohey hap moherep hamo e. Miꞌi pote miꞌiria aru tukupteꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌopotꞌauka haria paini koꞌi iꞌewyte hewaire hewaire rakaria iꞌewyte wuat minug Tupana motypot haria iꞌewyte woꞌomaꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuat i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipotypot Iesui atipy kaipywiat morekuat eiam note pyi.
Maꞌato iraniaꞌin me -Ereke ro yt e hin i e. Yt karãpe i -Ereke ro uhetawa pe e paini koꞌi pakup we e. Yt karãpe i -Ereko ro e woꞌoꞌauka haria pe e. Yt karãpe i -Ereke ro e hewaire waire rakaria pe e. Iꞌewyte uwe uwe imotypot mo wuat Tupana miꞌi haria pe -Ereke ro yt e hin i Iꞌewyte uwe uwe miitꞌin potmaꞌatꞌi maꞌatꞌi hat toineꞌen miꞌi hat pe -Ereke ro uhetawa pakup we yt e i e atipy piat.
Maꞌato tukupteꞌen ehetawa pe ahiag motypot sese haria -Uruto poꞌog eikai iꞌatuꞌe ehepe katupono uruto ti Aparãu emiariru sese koꞌi maꞌato eiperia yt iꞌatuꞌe. Iꞌatuꞌeso mio tã iꞌatuꞌe pote. Yt Iuteu ywania hin i miꞌiria e. Pyno atiꞌatumohit kahato miꞌiria hawyi eimotypot hamo teꞌeruwepỹꞌãtutuk ehewowi -Aparãu emiariru sese eipe iꞌatuꞌe aru ehepe katupono Iesui mikyꞌe sese koꞌi eipe iꞌatuꞌe aru ehepe. Atiꞌatumohit kahato miꞌiria ehamo hawyi teꞌeruwepỹꞌãtutuk ehewowi e.
ကြော်ငြာတွေ