Wiripu 3:19 - Sateré-Mawé

¹⁹ Aikotã saꞌawyꞌi areꞌe hap areꞌe i -Iꞌatueiam sese ti aru aria are katupono iꞌatuetupana sese iꞌatumikyꞌesat koꞌi miꞌu kape yn iꞌatuwanetup hap mesuwarotiat kape yn iꞌatuwanetup hap. Taꞌatuekat hap kape yn iꞌatuwanetup hap. Miꞌi hawyi yt naku i kahato taꞌatunug maꞌato taꞌatunug hawyi yt teꞌeruwemoti hin i inug te turan. -Waku nug haria uruto iꞌatuꞌe maꞌato iꞌatueiam ti aru aria kawiat.

Wiripu 3:19 ပူးပေါင်းရင်းမြစ်များ

Mateu 16:23

Mio tã e pote Iesui tuwemorem Peteru kape hawyi toꞌe -Erẽtem no uikaipyi ahiag e katupono en wyti aikotã nu toineꞌen muap tote aipysatpun hanuat ewy neꞌi. Miꞌi tupono ti ewat ewanetup hap mesuwat rotiaria miitꞌin wanetup hap ewy neꞌi. Yt Tupana woꞌonapin hap ewy hin i.

Mateu 25:41

Maꞌato iraniaꞌin uipo ran kawiaria pe ti aru toꞌe -Eweiwat ro uiꞌyatypepyi Tupana miꞌuhu koꞌi eipe are e. Eiwehytꞌok to aikope aria yt hasep i rakat pe Tupana minug hoꞌopot hamuat hap kape ahiag toineꞌen hap kape. Iꞌewyte ahiag powyro haria haiwot rakaria tukupteꞌen hap kape are ti aru uipo ran kawiaria pe.

Iruka 12:19

Miꞌi hawyi ti aru uimowepiit hap toineꞌen katupono uimiꞌu iwato hawyi karania anu waku aremohy. Uimiꞌu iwato kahato toineꞌen uikai pote waku arenuk yn aremahy u yn. Waku uimowepiit hap yn e so tuwepe towanetup hawe e.

Iruka 16:19

Miꞌi hawyi wẽtup sehay Iesui henoi iꞌatuepe. -Toineꞌen hekat rakat e. Miꞌi hesokpe ikahu kahato e. Wuatꞌi eꞌat pe yne imikyꞌesat koꞌi toineꞌen e. Ienuk hap tutunug kahato e. Yne miitꞌin itotiaria ikuap miꞌi hap ete e.

Iruka 18:4

Maꞌato so mekewat uwe waku uwe yt e hat yt tuwanetup hin hiwu kape. Maꞌato yt ipohep hin I hẽtup hamo. Aat kaꞌap tohẽtup tope ipowyro hamuat hap. Yt ipowyro teran hin I pykai wẽtup eꞌat pe toꞌe tuwepe. -Are paĩ e yt arekenꞌẽ i Tupana pupi e. Iꞌewyte iraniaꞌin mupi yt arekenꞌẽ hin i maꞌato mesuwat hiwu uimosero kahato raꞌyn e.

Humanu 16:18

Katupono woꞌopatꞌok patꞌok haria yt Aikaꞌiwat Iesui eropat haria i hin i. Taꞌi yt Aikaꞌiwat Iesui upiat hin i aimoꞌakagꞌaia hamo. Taꞌi miꞌiria tõꞌẽ tõꞌẽ ahowawi katupono taꞌatukyꞌesat kahato aito taꞌatuemiitꞌin no haype saꞌag nug hamuat aiꞌu hamo tõꞌẽ. Miꞌi pote eiweꞌeg wo o pyno iꞌatuehay sese kahato miꞌiria wẽtup sehay ete aimaꞌat taꞌatuehay iwese rakat nuat hamo -Yt uwe i poꞌog ikahuria eipe kawiat haria iꞌatuꞌe ahepe maꞌato yt pywo pe i aimaꞌat reran haype. Iꞌatuehay upi mekewat hirokaria wanetup hap ewywuaria meremo tuwat kahato iꞌatuehay upi. Miꞌi pote uipyꞌa pyi areꞌe -Eiweꞌeg wo o eimaꞌat tet pupi eipatꞌok hamuaria neꞌi pote ahekat kyewi aimaꞌat haria miꞌiria.

Humanu 6:21

Saꞌawyꞌi te wuat aiminug saꞌag watunug i raꞌyn hawyi aiwemoti hap topyhuꞌat. Miꞌi koꞌi he kahato watipuẽti saꞌawyꞌi maꞌato koitywy watikuap taꞌyn aiꞌauka hamo topyhuꞌat. Aiꞌapiheg wuatꞌi eꞌat piat hap. Miꞌi pote waku watoiat sese miꞌi koꞌi saꞌawyꞌi wuat.

1 Kuriniu 3:3

Katupono eweikupteꞌen mesuwarotiat wanetup haria ewy yn. Eiwuꞌuka wuꞌuka eiwoꞌope sehay hit no. Miꞌi hawyi ehaꞌywyi eweikupteꞌen eiwoꞌope aikotã mesuwarotiaria yt Iesui mohey i haria eko ewy eweikupteꞌen.

1 Kuriniu 5:2

Miꞌi hap ete ti yt tuwemoti hin i te maꞌato poꞌog ni uruto uruewaku toꞌe neꞌi saꞌag. Miꞌi hawyi eipe yt paa eweiꞌe hin i maꞌato -Waku miꞌi tã watunug eweiꞌe saꞌag. Uiwyriaꞌin waku waire waire nug haria eweiꞌatuꞌywyk eiweꞌatunug hap kaipyi.

1 Kuriniu 5:6

Pyno yt eiwekyryꞌi teiꞌo mekewat miit minug saꞌag ete. Yt naku i kahato watuwehum miꞌi tã nug hat ete katupono mekewat miit topyhuꞌat mani puk ewywuat eipyꞌaset pe maꞌato eipe eweipyhuꞌat ipyre ewy. Miꞌi pote aikotã watopag ipyre mani puk pe hawyi toimorem yne mani puk hap ewy miꞌi hap ewy waku eweihep o mekewat miit saꞌag eipyꞌasetpyi hawyi ti aru eweipyhuꞌat miit wakuaria ewywuat. Yt naku i hap yt mig hin i haria eipe. Pyno saꞌawyꞌi wuaria Iuteuria tuwenoꞌẽ taꞌatuewanikaptia yi Esituꞌin po kaipywiat turan iꞌatumiꞌu man iteneg nakat yn iꞌatumiꞌu yt kat i nem nakat ewy.

2 Kuriniu 11:12

Eweikuap kat pote yt ahẽtup i eikai eimuꞌe hap saꞌup. Pyno ahenoi ehepe. Tukupteꞌen eipyꞌasetpe -Eimuꞌe haria Pauru ewy kahato iꞌatuꞌe ehepe maꞌato yt pywo pe i katupono ehekat koꞌi kyewi yn eimuꞌe. Waku apo eweiꞌe iꞌatuepe -Eipe Pauru ewy eweiꞌe pykai kat pote ewehẽtup haꞌup urukaipyi eweiꞌe o iꞌatuepe. Miꞌi hawyi yt eiwesat kuap i kat pote yt uiꞌewy i pote. Miꞌi pote yt karãpe i ahẽtup eikaipyi haꞌup. Yt urusaipepiaria hin i miꞌiria.

2 Kuriniu 11:15

Ahiag mepytꞌin koꞌi aikotã taꞌatuꞌywot ewy tukupteꞌen. Aimaꞌat kuap toꞌywot ewy. Iꞌatuwẽ pyi -Uruto waku nug haria kahato iꞌatuꞌe. Maꞌato iꞌatuminug yt iꞌatuehay ewy hin i tuwẽtem. Miꞌi pote meremo yt watikuap i sio aimaꞌat sio yt hap maꞌato meiũran watikuap. Iꞌatuꞌapiheg hap eꞌat pe Tupana timoherep wuatꞌi ehamo iꞌatuminug saꞌag koꞌi. Miꞌi hap eꞌat pe iꞌatuꞌapiheg hap putꞌok e iꞌatuminug saꞌag hap oktan.

Karasia 6:13

Pyno Iuteuria woꞌonapin hap ewy watunug wemusin ãpy sokpe tek hap ahehakyeraꞌat iꞌatuꞌe yt taꞌatuhenoi yne hin i Iuteuria eko pykai. Taꞌatukyꞌesat taꞌatumikyꞌesat nug hanuaria wo yne eipe haype.

Wiripu 2:21

Iraniaꞌin teꞌeruwanetup aat kaꞌap taꞌatumikyꞌesat nug hap kape yn. Miꞌi kape yn teꞌeruwanetup. Kat som kat som Aipotypot Iesui tikyꞌesat Tupana wanetup hap yt iꞌatuwanetup hap ewy hin i.

Korosi 3:2

Waku watuwanetup atipy kape aikope Aipotypot Iesui toineꞌen hap kape. Waku aiwanetup hap Aikaꞌiwat atipy piat wanetup hap ewy are. Yt naku i watuwanetup mesuwarotiaria yt imohey i haria ewy katupono mesuwarotiat kape yn teꞌeruwanetup.

2 Tesaronika 1:9

Miꞌi hawyi miꞌiria ewywuaria toiꞌatuꞌapiheg aru wuatꞌi eꞌat piat iꞌatumoewasat hamo. -Eweiwat ro aikope yt uiꞌakasa i hap kape. Eweiwat ro woꞌopugha hap kape. Yt karãpe i aru uikahu hap motypot hap kape eweiꞌakasa. Yt karãpe i ti aru uhesaika hap Morekuat nuat uheineꞌen hap kape eweiꞌakasa e.

2 Tesaronika 2:12

Miꞌi tupono tukupteꞌen miꞌi haria wuatꞌi eꞌat pe Tupana miꞌapiheg wo katupono taꞌatupun naꞌyn pywuat sehay iꞌewyte taꞌatukyꞌesat taꞌatunug saꞌag hap yn.

2 Tesaronika 2:8

Miꞌi hawyi tuwemoherep mekewat saꞌag nug hat koro maꞌato Aipotypot Iesui ti aru iꞌauka wẽtup tehay wo yn topyhu wo yn teẽtyhot kahato wywo tuut hap eꞌat pe.

1 Timoteu 6:5

Iꞌatuwanetup hap yt toto kuap i. Sehay wakuat yt kat i iꞌatuwanetup hawe. Miꞌi pote tuꞌuka yn hap toineꞌen iꞌatuehay kaipyi iꞌatuwanetup hawyi. -Iesui atimohey hawyi hekat rakatno areineꞌen iꞌatuꞌe teꞌeruwepe yt miꞌi tã hin i pykai i.

2 Timoteu 3:4

Taꞌatuwyriaꞌin maꞌatꞌi maꞌatꞌi hanuaria wo i tukupteꞌen. Iꞌatuhuhaiꞌi yn tukupteꞌen. -Uito poꞌog e hap yn iꞌatuwanetup hawe. Taꞌatuwepiit hap kape yn teꞌeruwanetup. Yt Tupana mowepiit hap yt kape i teꞌeruwanetup.

Tiaku 4:16

Yt naku i kahato watuwemowato kahato ahehay wo -Atunug kuap yne aiꞌe hap ete uiwyriaꞌin. Yt naku i watoꞌe -Uito poꞌog yne miitꞌin kai aiꞌe hap ete. Yt naku i aito watopyhuꞌat aiwehay pyi. Yt naku i -Uito poꞌog ekai e hatno watopyhuꞌat.

2 Peteru 2:1

Saꞌawyꞌi tukupteꞌen Tupana ehay enoi haria maꞌato ti yt pywuat sese koꞌi i te. Miꞌi hap ewy te ti mesup tukupteꞌen ne eimuꞌe haria heso rakaria eipyꞌasetpe. Miꞌiria ti imoherep yt pywo piat i sehay eimaꞌat hamuat neꞌi Tupana etiat. Miꞌiria ti -Iesui ti yt Ahehakyeraꞌat hat i e haria. Yt Iesui kaipyi i ti ahehakyeraꞌat hap saꞌup e haria. Aiporekuat pun haria neꞌi mio tã e haria. Pyno mio tã e haria ti Aiporekuat Iesui atoiat haria. Miꞌi haria ti teꞌeruweꞌatuꞌuka aimaꞌat hap kaipyi.

2 Peteru 2:13

-Urumikyꞌesat ewy yn urutunug neran iꞌatuꞌe saꞌag. Miꞌi hawyi miitꞌin pyꞌasetpuo ihatꞌok puo yt naku i kahato taꞌatunug iraniaꞌin ehamo. Maꞌato Tupana haꞌup nug irane iꞌatuminug saꞌag hap koꞌi. Yne iꞌatumikyꞌesat ewy taꞌatunug hawyi yt teꞌeruwemoti hin i. Maꞌato eipe ti eiwemoti kahato eweipyhuꞌat mekewaria teꞌerenuk eipyꞌasetpe turan katupono teꞌeruwemoꞌok saꞌag kahato. Taꞌi eimaꞌat kahato ti eimiꞌu wuat teꞌerenuk turan. Iꞌatupiit moꞌok hap mowepiit hap yn taꞌatukyꞌesat. Miꞌiria ti teꞌeruwanetup hap ywyk hanuaria. Taꞌi saꞌag nug hap ete ti toꞌomowepiit kahato raꞌyn. Maꞌato iꞌatusaꞌup iꞌatuminug saꞌag hap ete putꞌok e irane. Taꞌi Tupana tiꞌatusatyꞌi satyꞌi irane yt naku i nug hap koꞌi ete. Taꞌatumosoꞌopot hap ewy taꞌatupuẽti irane.

2 Peteru 2:3

Pyno ehekat kyewi yn eimuꞌe haria. Taꞌi ehekat taꞌatukyꞌesat eiꞌatumuꞌe hap eimaꞌat hamuat hap kaipyi. Miꞌiria ti eikyꞌesat taꞌatuemiit no iꞌewyte taꞌatukyꞌesat torannia taꞌatupo puo hap ehekareꞌen eimepytꞌin. Miꞌi tã hap yn taꞌatukyꞌesat. Pyno Tupana toineꞌen ne miꞌiria apiheg hamo. Taꞌi Tupana toineꞌen eimaꞌat hanuaria moma hanuat. Taꞌi Tupana ti yt pya hin i iꞌatukai iꞌatuꞌuka hamo.

Iuta 1:10

Yt naku i watopyhuꞌat aikotã tawa Sutuma hawyi tawa Kumura eko ewy. Itotiaria yt teꞌerokenꞌẽ hin i atipy kaipywiaria pupi. Iꞌewyte miꞌiria taꞌatumikyryꞌi kahato yne akag koꞌi etiat haria. Yt taꞌatukuap i Tupana esaika hap pykai iꞌatuehay saꞌag neꞌi. Yne akag koꞌi ete iꞌatuehay saꞌag. Taꞌi miꞌiria ti aikotã gaꞌapy piaria haiwot rakaria ewy tukupteꞌen katupono torannia miitꞌin akag koꞌi ete iꞌatuhuhaꞌi neꞌi iraniaꞌin mimotypot koꞌi ete. Yt taꞌatukuap i waku rakaria haype hawyi yne wakuap koꞌi ete iꞌatusaiwot. Miꞌiria ti Tupana miꞌatusatyꞌi satyꞌi koꞌi katupono tuweupiaria raꞌyn taꞌatuminug saꞌag ete yn teꞌeremoehapap. Miꞌiria iraniaꞌin moweukaꞌi taꞌatueso wywuat haria. Miꞌiria wakuap sese koꞌi yt kuap i haria aikotã awyato miit auka hat ewywuaria iꞌatueko. Miꞌi pote miitꞌin miꞌauka wo teꞌeropyhuꞌat awyato auka hap ewywuat are. Iꞌatuhaiwot popuo syꞌat iꞌatuꞌe yt nakuap i utui hap ete hawyi teꞌeruwewi teꞌeruweꞌauka.

Iuta 1:16

Iꞌatuweukaꞌi tetiat hap sio tomohit hap koꞌi toiꞌapykok yne hamo. AheTupana tuut tesuraraꞌin sem wywo e Enoki nimo. Miꞌiria ti taꞌatumikyꞌesat saꞌag ewywuat raꞌyn nug aat kaꞌap maꞌato yt heremo i haria are. Taꞌatuwẽ pyi ti -Uito poꞌog wuatꞌi kai iꞌatuꞌe ahepe are. Miꞌiria tikyꞌesat kahato taꞌatumotypot kahato hap -En poꞌog urukai iꞌatuꞌe iraniaꞌin hap. Miꞌiria ti ikat kahato taꞌatumotypot kahato -En ni yt naku i rakat iꞌatuꞌe wakuaria pe. Karãpe aiwat aimikyꞌesat ete aipowyro hawyi aheromopusu kahato hap -Yt naku i ti meke tã miꞌi miit ewy watunug iꞌatuꞌe iraniaꞌin me ahetiat pe. Yt watiꞌatumowepiit kuap i raꞌyn miꞌiria are. Taꞌatumikyꞌesat saꞌag yn taꞌatunug neran mote wakuat yt taꞌatunug kuap i taꞌatuhãꞌãg pykai are. -Uito ti waku kahato poꞌog torannia kai wakuap atunug iꞌatuꞌe. Waku kahato en iꞌatuꞌe ahepe ahekat kyewi. Iꞌatuehay se rakat taꞌatuehay wo aimowepiit maꞌato yt pywo pe hin i aimaꞌat teran haype neꞌi are. Miꞌi tã hap ete teꞌeremopokuap kahato. Miꞌiria ti teꞌeropotmuꞌe wẽtup sehay yt Iesui etiat enoi haria hin i. Eiweꞌeg wo o Tupana ehay pun haria miꞌiria are.

Iuta 1:4

Koitywy tuwehytꞌok tuereto aipyꞌasetpe Tupana mohey hap pun haria. Yt Tupana motypot rakaria i miꞌiria are. Miꞌiria aipyꞌasetpe tukupteꞌen maꞌato yt naku i nug hamuat aimaꞌat hamo tõꞌẽ ahowawi. Miꞌiria ti Tupana Saꞌyru yt kuap i haria. Miꞌiria ti aikotã Tupana ehay enoi haria teꞌeroꞌe saꞌawyꞌi te hap ewy. Mio tã iꞌatuꞌe -Tuut wyti aru eimaꞌat hanuaria sese e miwan me. Miꞌiria wyti aru uimiꞌatuꞌapiheg wuatnuaria teꞌeropyhuꞌat wuatꞌi eꞌat piat nuaria e Tupana miwan me miꞌiria etiat hap nug haria. Miꞌiria ti yt kat i uimotypot hap iꞌatuwanetup hawe haria e. Miꞌi haria wyti aru tuwehytꞌok wehytꞌok eipyꞌasetpe uimotypot yat pe yt naku i nug hamo e. Miꞌiria Tupana e hap ewy -Taꞌi waku ti watunug saꞌag aimikyꞌesat ewywuat iꞌatuꞌe. Waku ahewaire waire kahato iꞌatuꞌe aru are. Taꞌi Tupana yt aiꞌapiheg hin i katupono ti aikyꞌe kahato Tupana iwese kahato rakat pote iꞌatuꞌe aru aimuꞌe saꞌag neꞌi. Yt naku i watunug Tupana Mipoꞌoro Aipotypot no iꞌatuꞌe aru miꞌiria e saꞌawyꞌi te Tupana miwan me eimaꞌat reran haria etiat.

Iesui Aru E Hap 18:7

Aikotã wepiit weneru haria sese ewy eweikupteꞌen tawa Papironia piaria e. -Yt karãpe i ikahuro uheꞌaitoria e haria ewy. Pyno uhekat rakatno motꞌi areineꞌen eweiꞌe. Yt karãpe i uhatek eweiꞌe pote yt iweꞌeg i rakat haryporia ewy eweikupteꞌen e. Aikotã teꞌeroꞌe -Uito areineꞌen morekuat eharyꞌi wo e haria ewy tawa Papironia piaria maꞌato yt miꞌi tã hin i e. Ihakyꞌe i rakaria sese eweikupteꞌen e. Aikotã aikotã ewehoꞌopot kak eweiꞌe kak eweiꞌe e. Eheꞌaito kak potiat ewy e Tupana. Saꞌawyꞌi eweimowato kahato ehekat koꞌi -Uruto poꞌog e hamo maꞌato Uito poꞌog eiꞌe pote Tupana eiwemowato hap kai poꞌog worohoꞌomohit neꞌi e Tupana.

Iesui Aru E Hap 19:20

Miꞌi hawyi tuꞌuka kahato itote. Maꞌato Iesui tiꞌatuꞌakit kahato neꞌi -Uito Tupana e hat heso rakat yt naku i nug hat. Iꞌewyte taꞌatuꞌakit mekewat heso rakat -Uito Tupana ehay moherep kahato hat e woꞌomaꞌatꞌi maꞌatꞌi hat neꞌi mekewat yt naku i nug hat set howatuꞌa etiat rakaria woꞌomaꞌatꞌi maꞌatꞌi hat. Toiꞌakit neꞌi mekewat -Eweimotypot ro Tupana iãꞌãkap e hat. Miꞌi haria Waku Rakat esuraraꞌin koꞌi tiꞌatuꞌakit yne. Miꞌi hawyi Wuatꞌi Porekuat Porekuat topytyk taꞌyn mekewat awyato tig saꞌag iꞌewyte mekewat -Uito Tupana ehay moherep hat woꞌomaꞌatꞌi hat hawyi toiꞌatupugha miꞌiria mekewat ihyemyiꞌa wato aria sapuẽ sapyhot pe ytyghe wuk hap puo rakat pe. Toipytyk taꞌyn wen maꞌato yt toiꞌatuꞌauka hin i maꞌato taꞌatupuhu hap wywo toiꞌatupugha aria pe wuatꞌi eꞌat piat pe. Miꞌi hap ewy araꞌakasa.

Iesui Aru E Hap 21:8

Maꞌato iraniaꞌin teꞌerokenꞌẽ uimohey hap moherep hamo e. Miꞌi pote miꞌiria aru tukupteꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌopotꞌauka haria paini koꞌi iꞌewyte hewaire hewaire rakaria iꞌewyte wuat minug Tupana motypot haria iꞌewyte woꞌomaꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuat i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipotypot Iesui atipy kaipywiat morekuat eiam note pyi.

Iesui Aru E Hap 22:15

Maꞌato iraniaꞌin me -Ereke ro yt e hin i e. Yt karãpe i -Ereke ro uhetawa pe e paini koꞌi pakup we e. Yt karãpe i -Ereko ro e woꞌoꞌauka haria pe e. Yt karãpe i -Ereke ro e hewaire waire rakaria pe e. Iꞌewyte uwe uwe imotypot mo wuat Tupana miꞌi haria pe -Ereke ro yt e hin i Iꞌewyte uwe uwe miitꞌin potmaꞌatꞌi maꞌatꞌi hat toineꞌen miꞌi hat pe -Ereke ro uhetawa pakup we yt e i e atipy piat.